Mutane 9 da Aka Sace Sun Taki Sa'a, Sun Shammaci 'Yan Bindiga a Jihar Katsina
- Dakarun rundunar sojojin Operation Fansan Yamma sun ceto mutum tara da suka tsere daga hannun masu garkuwa a Katsina
- Sojojin sun kuma kwato shanu hudu da tumaki 52 da 'yan ta'adda suka sace kuma sun kuma kama wani da ake zargi da alaka da ayyukan ta'addanci
- Rundunar sojojin ta ce za ta ci gaba da matsa wa miyagu lamba har sai an kawo karshen ta'addanci
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Katsina, Nigeria - Dakarun Rundunar Hadin Gwiwa da ke aiki Arewa maso Yamma, Operation Fansan Yamma, sun ceto mutum tara da suka tsere daga hannun masu garkuwa da mutane a Katsina.
Gwarzan sojojin sun kwato dabbobi 56 da aka sace tare da kama wani da ake zargi da alaka da 'yan ta'adda a wasu hare-hare daban-daban da suka gudanar a jihar Katsina.
Source: Twitter
Rahoton Daily Trust ya bayyana cewa jami'in yada labarai na rundunar, Laftanar Kanar Aliyu Danja, ne ya bayyana hakan a cikin wata sanarwa da ya fitar ranar Juma'a.
Mutum 9 sun shammaci yan bindiga a Katsina
A cewarsa, dakarun sojoji na sashe na 2 sun ceto mutanen yayin da suke sintiri a yankin karamar hukumar Faskari da ke Kudancin Katsina
Ya ce mutanen da aka ceto sun hada da mata uku, maza hudu da yara biyu.
Aliyu Danja ya bayyana cewa an yi garkuwa da su ne a ranar 9 ga Yulin 2026 a kan hanyar Tsafe zuwa Kuchere da ke karamar hukumar Tsafe ta jihar Zamfara.
Binciken farko ya nuna cewa mutanen sun samu damar tserewa ne bayan masu garkuwar sun yi barci, kafin dakarun suka same su a cikin daji tare da ceto su.
Ya ce:
"A halin yanzu wadanda aka ceto suna hannun jami'an tsaro, inda ake kammala wasu matakai kafin a mika su ga iyalansu."
Sojoji sun kwato dabbobi 56
A wani samame na daban, Kanal Danja ya ce dakarun sojojin sun kai dauki bayan samun sahihan bayanan sirri cewa 'yan ta'adda na kokarin sace dabbobi a karamar hukumar Bakori.
Ya ce 'yan ta'addan sun bude wa sojoji wuta, amma sun tsere zuwa cikin daji bayan dakarun sun yi galaba a kansu, kamar yadda Leadership ta kawo.
Sojojin sun kwato dabbobi 56 da suka hada da shanu hudu da tumaki 52, wadanda ake tsare da su kafin a mika su ga hukumomin da suka dace.
Source: Original
An kama wanda ake zargi da ta'addanci
Haka kuma, dakarun sun cafke wani da ake zargi da alaka da ayyukan ta'addanci yayin sintiri a karamar hukumar Danmusa.
A cewar Aliyu Danja, kayayyakin da aka samu tare da wanda ake zargin sun nuna cewa yana iya kasancewa yana da alaka da ayyukan 'yan ta'adda, amma ana ci gaba da gudanar da bincike a kansa.
Sojoji sun ragargaji yan bindiga a Zamfara
A wani labarin, kun ji cewa dakarun rundunar sojoji ta Operation Fansan Yamma sun dakile hare-haren 'yan bindiga a Kaura Namoda da ke jihar Zamfara.
Sojojin sun kashe wani fitaccen kwamandan 'yan bindiga tare da tarwatsa wani shirin kai babban hari ta hanyar luguden wuta daga sama.
Bugu da kari, rundunar sojin sama ta Operation Fansan Yamma kai farmaki kan 'yan bindiga kusan 300 da ke kan babura, inda suka kashe da dama daga cikinsu a Zamfara.
Asali: Legit.ng
