‘Yan Bindiga Sun Sace Gawar Babban Jami’in FRSC da Masu Rakiyarta a Hanyar Jana’iza
- Ana zargin ‘yan bindiga sun tare motar da ke ɗauke da gawar tsohon babban jami’in FRSC, Augustine O. Ikwue, a jihar Kogi
- Rahotanni sun nuna cewa gawar da mutane tara, ciki har da jami’an FRSC biyu, sun fada hannun masu garkuwa da mutane
- Sai dai bayanai sun nuna cewa daga baya an gano gawar marigayin a garin Ejule, inda aka mika ta ga iyalansa
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Kogi, Nigeria - Wasu masu garkuwa da mutane sun kai hari kan motar da ke dauke da gawar tsohon Mataimakin Kwamandan Hukumar Kiyaye Haddura ta Kasa (FRSC), Augustine O. Ikwue.
Maharan sun sace gawar da kuma mutanen da ke rakiyar ta zuwa garinsu na Otukpo da ke jihar Benue.
Source: Original
Daily Trust ta ruwaito cewa lamarin ya faru ne da misalin karfe 6:00 na yammacin ranar Alhamis da ta wuce a hanyar Ochadamu zuwa Ejule da ke karamar hukumar Ofu a jihar Kogi.
Marigayi jami'in FRSC ya rasu ne a Osogbo, babban birnin jihar Osun, bayan gajeruwar rashin lafiya.
Yan bindiga sun bukaci Naira miliyan 450
Rahotanni sun ce masu garkuwar sun tuntubi iyalan marigayin tare da neman a biya kudin fansa har Naira miliyan 450 domin sakin mutanen da suke tsare da su.
Kwamandan FRSC na jihar Kogi, Lawal Fagge, ya tabbatar da faruwar lamarin, inda ya ce mutum tara ne aka yi garkuwa da su, ciki har da jami’an FRSC biyu da ke cikin tawagar zuwa jana’izar.
Hukumar FRSC ta gano gawar Ikwue
Sai dai ya bayyana cewa daga baya an gano gawar marigayin a yankin Ejule, inda aka mika ta ga iyalansa domin gudanar da jana’izarsa.
Ya ce:
“Mun gano gawar marigayin a garin Ejule a ranar Juma’a bayan bincike mai zurfi, sannan muka mika ta ga iyalansa. An birne shi a ranar Asabar a garinsu na Otukpo da ke jihar Benue.”
Source: Twitter
Fagge ya ce masu garkuwar sun yi amfani da wayar marigayin wajen kiran matarsa domin sanar da ita bukatar kudin fansa.
“Masu garkuwar sun yi amfani da wayar marigayin suka kira matarsa, inda suka bukaci a biya makudan kudade domin sakin mutanen da suke tsare da su," in ji shi.
Matakin da jami'an tsaro suka dauka
Rahotanni sun ce jami’an tsaro da suka hada da sojoji, ‘yan sanda, mafarauta da masu sintiri sun bazama yankin domin ceto wadanda aka yi garkuwa da su tare da kamo wadanda suka kai harin.
Lamarin ya janyo martani daga mutane da dama, inda suka nuna damuwa cewa har gawar mamaci ba ta tsira daga hare-haren ‘yan bindiga ba.
Yan bindiga sun sace dalibai 3
A wani labarin, kun ji cewa 'yan bindiga sun kutsa masaukin daliban Jami'ar Tarayya ta Lafia da ke jihar Nasarawa, tre da yin awon gaba da mutum uku.
An ce 'yan ta'addar sun farmaki gidan kwanan daliban ne da ke a kan titin Awe, kusa da matsugunnin jami'ar na wucin gadi da ke Akunza a Lafia, jihar Nasarawa.
Kwamishinan 'yan sandan jihar Nasarawa, CP Shetima Jauro Mohammed, ya umarci tura jami'an musamman da masu sintiri domin gudanar da aikin ceto a cikin dazukan da ke kewaye da yankin.
Asali: Legit.ng
