Sojoji Sun Kashe Kwamandojin 'Yan Ta'adda a Katsina, an Kwato Makamai da Kudade
- Gwamnatin jihar Katsina ta sanar da nasarar da dakarun sojoji suka samu a yakin da suke yi da 'yan ta'adda
- A cewarta dakarun sojoji sun samu nasarar hallaka wasu kwamandojin 'yan ta'adda yayin da suke gudanar da aikin sintiri
- Hakazalika, sojojin sun samu nasarar kwato makamai da kudade masu yawa daga hannun tsagerun 'yan ta'addan da aka kashe
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
Jihar Katsina - Gwamnatin jihar Katsina ta bayyana cewa dakarun bataliya ta 17 sun samu nasarar kashe 'yan ta'adda.
Dakarun sojojin sun kashe mutane hudu da ake zargi ’yan ta’adda ne yayin aikin sintiri a kan hanyar Turare zuwa Yantumaki.
Source: Twitter
Jaridar Daily Trust ta kawo rahoton cewa hakan na kunshe ne a cikin wata sanarwa da ma’aikatar tsaron cikin gida da harkokin gida ta fitar ranar Asabar, 2 ga watan Mayun 2026.
Sojoji sun kashe 'yan ta'adda a Katsina
Aikin ya gudana ne da misalin ƙarfe 11:40 na safiyar ranar Juma’a lokacin da wasu mahara suka kai wa dakarun hari.
Sojojin sun mayar da martani cikin gaggawa, inda suka fi ƙarfin maharan tare da kashe duka mutane hudun ba tare da dakarun sun samu wani rauni ba.
Jami’an tsaro sun ƙwato bindiga ƙirar AK-47 guda ɗaya mai ɗauke da harsasai biyar masu kaurin 7.62mm, babura biyu, wayoyin hannu da dama, da tsabar kuɗi har N153,400.
Hukumomi sun bayyana cewa wasu daga cikin wayoyin Android da aka ƙwato suna ɗauke da hotunan waɗanda ake zargin sanye da kayan sojoji, kuma an riga an miƙa su domin gudanar da bincike na ƙwararru.
Wadanne 'yan ta'adda aka kashe?
Bayanai na sirri sun gano waɗanda aka kashen a matsayin Bishir Holami, Jamilu Baki, Ibrahim Doro, da Abdurraman Maje, shafin Fasaha Stream ya kawo rahoton.
Gwamnatin ta bayyana su a matsayin manyan mutane da ke da hannu a jerin hare-haren kisa da aka kai a Gobirawa, Raddawa, Kuki, da sauran al’ummomi a cikin ƙananan hukumomin Dutsinma da Matazu na jihar.
Jami’ai sun lura cewa kashe su ya zama babban koma-baya ga wani sanannen jagoran ’yan bindiga, Muhammadu Fulani, wanda aka alaƙanta ƙungiyarsa da ayyukan ta’addanci a yankunan Matazu, Musawa, Charanchi, da Kankia.
Source: Original
Gwamnati ta ba da tabbaci
Kwamishinan tsaron cikin gida da harkokin gida, Dr. Nasir Mu’azu, ya ce wannan nasara tana ƙarfafa ƙudurin Gwamna Dikko Umaru Radda na magance rashin tsaro da maido da zaman lafiya a faɗin jihar.
Ya tabbatar wa mazauna jihar cewa gwamnati tana nan daram kan ƙoƙarinta na kare rayuka da dukiyoyi, yana mai jaddada cewa jami’an tsaro sun tsananta kai hare-hare kan miyagun mutane.
Kwamishinan ya buƙaci jama'a da su ci gaba da kasancewa cikin shiri tare da ba jami’an tsaro haɗin kai, inda ya bayyana cewa sahihan bayanan sirri akan lokaci daga al’ummomi sun taka rawar gani sosai a nasarorin da aka samu kwanan nan.
Sojoji sun kashe 'yan ta'adda
A wani labarin kuma, kun ji cewa dakarun sojoji sun samu nasarar hallaka 'yan ta'adda a jihar Borno da ke yankin Arewa maso Gabas.
Jaruman dakarun sojoji na rundunar Operation Hadin Kai sun kashe mutane hudu da ake zargi ’yan ta’adda ne a jihar Borno.
Hakazalika, dakarun sojojin sun kuma ƙwato makamai da kayan masarufi yayin wani harin kwanton bauna da suka kai a yankin dajin Sambisa.
Asali: Legit.ng
