Babbar Magana: El Rufai Ya Fallasa Sabuwar Makarkashiyar da Ake Kulla Masa

• Tsohon gwamnan jihar Kaduna, Nasir Ahmad El-Rufai, ya nuna damuwa kan sabon shirin da ya yi zargin ana kullawa a kansa
• El-Rufai ya nuna cewa ana yin wata kulla-kulla domin ganin an ci gaba da tsare shi a hannun hukumomi
• Tsohon gwamnan ya yi zargin cewa ana kokarin alakanta da wasu laifuffuka domin ganin ya gaza samun beli

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

FCT, Abuja - Tsohon gwamnan jihar Kaduna, Malam Nasir El-Rufai, ya nuna damuwa kan abin da ya bayyana a matsayin wani sabon kulla-kulla na sanya shi cikin ayyukan laifi.

El-Rufai ya yi zargin cewa akwai wani tsari na hadin gwiwa da nufin bata masa suna da kuma tsawaita tsare shi.

Hakan na kunshe ne a cikin wata sanarwa da mai ba shi shawara kan harkokin yada labarai, Muyiwa Adeyeke, ya sanya a shafinsa na X a ranar Lahadi, 19 ga watan Afirilun 2026.

Kara karanta wannan

Saraki ya jefi gwamnatin Buhari da zargi kan fashin Offa, ya fallasa gwamnan Kwara

Wane abu El-Rufai ya ce?

El-Rufai ya yi gargaɗi game da kulla-kullar da ake a kansa, yana mai nuni da wasu abubuwa da suka faru kwanan nan waɗanda ya ce suna nuna wani salo na damuwa.

Tsohon gwamnan ya tuna da wani lamari da ya faru a ranar 12 ga Fabrairu, 2026, lokacin da aka yi yunkurin kama shi bayan isowarsa filin jirgin sama na Abuja daga birnin Cairo, inda ya bayyana hakan a matsayin alamar farko ta ƙalubalen da ke tafe.

Ya ƙara bayyana cewa ya amsa gayyatar da hukumar EFCC ta yi masa a ranar 16 ga Fabrairu, inda aka tsare shi, sannan daga baya aka mayar da shi hannun hukumar ICPC a ranar 18 ga Fabrairun 2026.

Wane abu El-Rufai yake damuwa a kansa

Babban abin damuwar na baya-bayan nan dai ya samo asali ne daga wani rahoto da jaridar The Nation ta wallafa a ranar 18 ga Afrilu, mai taken “Shari’ar El-Rufai: ’Yan bindiga sun mamaye gidan babban mai ba da shaida”

Kara karanta wannan

An kama gungun barayin mai da suka nufi matatar Dangote a Legas

Rahoton ya yi bayanin iƙirarin wani mai suna Mohammed Umar Karage, shaida a wata shari’a da ke gudana a babbar kotun jihar Kaduna, na cewa wasu mutane ɗauke da makamai sun shiga gidansa.

Yayin da sansanin El-Rufai ya amince da haƙƙin ɗan ƙasa na bayar da rahoton laifufuka, sun zargi jaridar da ƙara gaba wajen wallafa abin da suka bayyana a matsayin “tuhume-tuhumen ƙarya” da zarge-zargen da ke alaƙanta tsohon gwamnan da wannan lamari.

Rahoton ya ambato shaidan yana nuna cewa harin na iya kasancewa yana da alaƙa da matsayinsa a shari’ar kuma yana iya zama yunƙurin rufe masa baki, inda ya yi kwatanci da bacewar mai fafutuka na Kaduna, Abubakar Idris Dadiyata, wanda har yanzu ake tattaunawa kansa.

Zargin da El-Rufai ya yi

Sansanin El-Rufai ya yi watsi da waɗannan iƙirari, yana mai cewa wallafar an tsara ta ne da gangan domin ɓata masa suna, da lalata takardar neman belinsa da ke jiran hukunci, da kuma shigar da shi cikin wasu manyan laifuffuka.

“Duk wani mai karatu mai adalci zai gane nufin da ke bayan waɗannan kalamai: shi ne a ɓata masa suna kuma a samar da dalilin ci gaba da tsare shi."

Kara karanta wannan

Atiku ya kare kansa kan zargin cin hanci, ya tuna baya kan abin da Obasanjo ya yi maaa

- Muyiwa Adekeye

Kotu ta ba da belin El-Rufai

A wani labarin kuma, kun ji cewa tsohon gwamnan jihar Kaduna, Nasir El-Rufai, ya samu beli a wajen kotu.

Alkalin babbar kotun jihar Kaduna, mai shari'a, Rilwan Aikawa, ne ya amince da bukatar belin da El-Rufai ya gabatar.

Tsohon gwamnan na Kaduna dai ya samu belin ne dai a karar da hukumar yaki da cin hanci da rashawa ta ICPC ta shigar a kansa.

Asali: Legit.ng