Gwamna Ya ba Mutane Mamaki a Wani Faifan Bidiyo, Ya Tuna Lokacin da Yake Koyarwa

• Gwamnan jihar Ondo, Lucky Aiyedatiwa ya ba mutane da dama mamki yayin da ya shiga aji kuma ya koyar da ɗalibai a makaranta
• A wani faifan bidiyo da ke yawo a kafafen sada zumunta, an ga Gwamna Aiyedatiwa na tambayar ɗalibai nau'ikan magunguna
• Mai girma Gwamnan ya bayyana cewa gwamnatinsa za ta inganta harkokin ilimi a Ondo ta yadda za a goga da ɗalibai a duniya

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Jihar Ondo - A wani faifan bidiyo mai taɓa zuciya da ya karade kafafen sada zumunta a ranar Juma’a, an ga Gwamnan Jihar Ondo, Lucky Aiyedatiwa, ya na koyarwa a aji.

Faifan bidiyon ya nuna Gwamna Aiyedatiwa yana koyarwa a wani aji da ke wata makaranta da ba a bayyana sunanta ba.

An wallafa bidiyon a shafin Gwamna Lucky Aiyedatiwa na Facebook tare da taken, "Malamin makaranta malami ne a kowane lokaci."

Yadda gwamna ya koyar da ɗalibai a Ondo

A cikin bidiyon an ga Gwamna Aiyedatiwa ya rubuta kalmar "Drugs" watau magunguna a kan allo yana kuma tambayar ɗalibai su faɗi nau’ikan magunguna.

Gwamna ya nuna farin ciki da gamsuwa yadda ya ga ɗaliban suna ba shi amsoshin tambayar da ya yi masu.

Za a ɗauki malaman makaranta a Ondo

Wannan lamari na zuwa ne makonni bayan gwamnan ya amince da daukar sababbin malamai 1,100 domin koyarwa a makarantun firamare a fadin ƙananan hukumomi 18 na jihar Ondo.

A cewar Aiyedatiwa, shirin ɗaukar malaman, wanda ya samu tallafin hadin gwiwa tsakanin hukumomin UBEC da SUBEB na 2023/2024, yana daga cikin matakan da gwamnatinsa ke ɗauka domin inganta harkokin ilimi.

Nasarorin da gwamnan Ondo ya samu

A wani karin bayani da ya wallafa tare da bidiyon, gwamnan ya bayyana wasu muhimman nasarori da aka samu a fannin ilimi da suka haɗa da:

• Raba littattafai, wayoyin hannu na zamani (Android tablets), da kayan wasanni ga makarantun gwamnati.
• Ginawa da gyaran azuzuwa a makarantu sama da 100
• Raba sama da littattafai 75,000 da kayan koyo na zamani
• Daukar malamai 2,100 da horar da su sanin makamar aiki
• Inganta harkokin wasannin yara a makarantu don ƙara hazaƙar ɗalibai.

Aiyedatiwa ya ce:

“Muna gina tubalin cigaba mai ƙarfi ga ƙarni na gaba, za mu tabbatar da cewa yaranmu sun samu kwarewar da ake buƙata don cin nasara a zamanin da muke ciki da ke ƙara sauyawa."

Gwamnan Ondo ya biya wa ɗalibai kudin WAEC

A wani rahoton, kun ji cewa Gwamna Lucky Aiyedatiwa ya amince da fitar da kudi sama da Naira miliyan 600 domin biya wa ƴaƴan talakawa kuɗin jarabawar WAEC.

A wata sanarwa da mai magana da yawunsa, Mista Ebenezer Adeniyan, ya fitar, gwamnan ya biya wa ɗaliban da ke karatu a makarantun sakandiren gwamnatin kuɗin WAEC ta 2024/2025.

Rahoto ya nuna cewa matakin zai bai wa dalibai 23,048 da suka ci jarabawar karin girma ta JSS II damar yin rajista domin zana jarabawar WASSCE ta bana.

Wanda ya tantance Muhammad Malumfashi, babban edita a Legit.ng.

Asali: Legit.ng