Bidiyo: An Fito da Gawar Ali Khamenei, za a Yi Kwana 7 ana Jana'iza a Iran
- Za a fara jana'izar marigayi jagoran Iran, Ayatollah Ali Khamenei, daga ranar 3 ga Yulin 2026, inda ake sa ran miliyoyin mutane za su halarta
- Legit ta rahoto cewa an kashe Khamenei mai shekaru 86 a wani farmakin sama da Amurka da Isra'ila suka kai a ranar 28 ga Fabrairun 2026
- Za a binre Khamenei a ranar 9 ga Yulin 2026 a harabar Imam Reza da ke Mashhad, garin da aka haife shi kuma ya fara karatu a cikinsa
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.
Iran - Daga ranar 3 ga Yulin 2026 miliyoyin masu jimami za su taru domin halartar bukukuwan jana'izar da za su ɗauki kwanaki bakwai na marigayi Jagoran Ƙoli na Iran, Ali Khamenei.
An dage jana'izar, wadda tun farko aka tsara za a yi a watan Maris 2026, saboda yaƙin da Amurka da Isra'ila suka yi da Iran ya daɗe yana ci gaba.
Kara karanta wannan
Mojtaba ya fadi dalilin da ya sa ba zai halarci jana'izar mahaifinsa, Khemenei ba
Source: Getty Images
Al Jazeera ta wallafa cewa an kashe Khamenei, mai shekaru 86, tare da wasu daga cikin 'yan uwansa a wani harin sama na haɗin gwiwa tsakanin Amurka da Isra'ila a Fabrairun 2026.
Waye Ayatollah Ali Khamenei?
Ayatollah Ali Khamenei ya jagoranci Iran tun daga shekarar 1989, bayan rasuwar Ayatollah Ruhollah Khomeini, wanda ya jagoranci juyin juya halin Musulunci a kasar.
Yayin da Khomeini ya kasance jagoran juyin juya halin da ya kawo ƙarshen mulkin daular Pahlavi, ya ƙarfafa rundunonin soji da na sa-kai masu ɗauke da makamai a Iran.
Kwanakin jana'izar Khamenei
Za a gudanar da shirye-shiryen jana'izar na tsawon kwanaki bakwai a Iran da Iraki, inda za a fara a Tehran ranar 3 ga Yulin 2026.
Shugabannin duniya, manyan jami'ai, malamai da shugabannin addini daga sassa daban-daban na duniya za su halarta domin nuna girmamawarsu.
Ranakun 4 da 5 ga Yulin 2026
A ranakun 4 da 5 ga Yuli za a fara gudanar da jana'izar a Tehran. Za a ajiye akwatin gawarsa tare da na wasu daga cikin 'yan uwansa a Grand Mosalla domin jama'a su yi masa bankwana.
An gina Grand Mosalla ne domin ɗaukar tarukan jama'a masu yawa, kuma yana daga cikin manyan wuraren ibada mafi girma a Iran, inda aka saba gudanar da manyan bukukuwan addini da na gwamnati.
Tashar IRIB ta wallafa bidiyon yadda aka dauko gawar Khamenei a X:
Ranakun 6 da 7 ga Yulin 2026
A ranakun 6 da 7 ga Yuli, jerin gwanon jana'izar zai bi ta wasu sassan Tehran kafin ya wuce zuwa birnin Qom, mai nisan kusan kilomita 120.
Qom ce cibiyar ilimin addinin Shi'a mafi muhimmanci a Iran kuma ɗaya daga cikin birane mafi tsarki a ƙasar. A nan ne manyan makarantun addini na ƙasar suke, inda dubban malamai ke karatu da koyarwa, ciki har da marigayi Ali Khamenei.
Ranar 8 ga Yulin 2026
Jami'an Iran da Iraki sun ce za a gudanar da tarbar hukuma a Filin Jirgin Sama na Ƙasa da Ƙasa na Najaf ranar 8 ga Yuli, sannan a gudanar da jerin gwanon jana'iza a biranen Najaf da Karbala na Iraki.
Haramin Imam Ali da ke Najaf na daga cikin wuraren ibada mafi tsarki ga mabiya Shi'a, kuma yana jawo miliyoyin mutane daga kasashe a kowace shekara.
Source: Getty Images
Ranar 9 ga Yulin 2026
Daga nan za a mayar da gawar zuwa Iran domin jana'izar ƙarshe, wadda aka tsara za a yi ranar 9 ga Yuli a Haramin Imam Reza da ke Mashhad.
Mashhad ita ce birni mafi tsarki a Iran. Imam Reza shi ne Imam na takwas a mazhabar Shi'a.
Har ila yau, Mashhad na da muhimmanci ga Ali Khamenei, domin a nan aka haife shi a shekarar 1939, kuma ya yi yawancin rayuwarsa ta farko a birnin.
Dan Amurka na taimakon Iran
A wani rahoton, kun ji cewa gwamnatin kasar Isra'ila ta kama wani dan Amurka da ta ke zargi yana taimakawa Iran da bayanan sirri.
An ce matashi dan shekara 20 din da Isra'ila ta kama shi ne dan Amurka na farko da ya shiga jerin wadanda ake zargi da taimakon Iran.
Rundunar 'yan sandan kasar ta tabbatar da cewa za ta gurfanar da shi a gaban kotu tare da cigaba da farautar masu irin halin shi a Isra'ila.
Asali: Legit.ng
