Me Ya Yi Zafi: An Nemi Wasu Jiga Jigan ADC an Rasa a Kwamaitin Yakin Neman Zaben Atiku

• Atiku Abubakar ya kafa kwamitin yaƙin neman zaɓen ADC na 2027, wanda ya ƙunshi wasu manyan jiga-jigan jam’iyyar da abokansa na siyasa
• Jerin bai ƙunshi Sakataren ADC na ƙasa Rauf Aregbesola da Sakataren Yaɗa Labarai na ƙasa Bolaji Abdullahi ba, duk da matsayinsu a jam’iyyar
• Bolaji Abdullahi ya ce rashin sunayen wasu shugabannin jam’iyyar a kwamitin ba alamar rabuwar kai ba ce, yana mai cewa tsarin jam’iyyar zai ci gaba da aiki

​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Ɗan takarar shugaban ƙasa na African Democratic Congress (ADC), Atiku Abubakar, ya kafa kwamitin yaƙin neman zaɓen jam’iyyar domin zaɓen shugaban ƙasa na 2027.

Atiku ya fitar da jerin sunayen kwamitin mai shafuka biyu ranar Alhamis, wanda ya ƙunshi wasu daga cikin manyan abokansa na siyasa da jiga-jigan ADC.

Kara karanta wannan

"Yanzu ne lokacin": Atiku ya sake aika sako ga 'yan Najeriya kan Shugaba Tinubu

Amaechi, David Mark da El-Rufai na cikin kwamitin

Legit Hausa ta fahimci cewa daga cikin sunayen da aka sanya a cikin kwamitin akwai Rotimi Amaechi, abokin takarar Atiku; David Mark, shugaban ADC na ƙasa; da Nasir El-Rufai, tsohon gwamnan Kaduna.

Haka kuma, an sanya John Oyegun, tsohon gwamnan Edo kuma tsohon shugaban jam’iyyar APC, cikin jerin sunayen kwamitin.

Phrank Shaibu, mai taimaka wa Atiku kan harkokin yaɗa labarai, ya ce tsarin kwamitin an gina shi ne domin gudanar da aiki tare da sanya alhakin yin abin da ya dace kan kowane jami’i.

“Wannan tsari ne da aka gina domin aiki. Kowane fanni tana da aikinsa. Kowane fanni yana da nauyin da aka ɗora masa. Kowane wanda aka naɗa dole ne ya bayar da bayanin sakamakon aikinsa,” in ji shi.

Aregbesola da Bolaji ba su cikin jerin

Sai dai nazarin jerin sunayen ya nuna cewa Rauf Aregbesola, Sakataren ADC na ƙasa, da Bolaji Abdullahi, Sakataren Yaɗa Labarai na ƙasa, ba su cikin kwamitin yaƙin neman zaɓen.

Kara karanta wannan

APC ta fito da sabon gargadi game da zaben Atiku a 2027

Rashin sunan Aregbesola ya jawo hankali musamman saboda yana daga cikin manyan shugabannin jam’iyyar na ƙasa, kuma yana taka rawa wajen ƙoƙarin wayar da kan jama’a daga matakin ƙasa.

A ranar Alhamis ma, Aregbesola ya kasance tare da Atiku da sauran shugabannin ADC a Akure, babban birnin Jihar Ondo, wajen tarbar Eyitayo Jegede, tsohon ɗan takarar gwamnan jihar, da ya koma ADC.

Bolaji ya ce ba alamar rabuwar kai ba ce

Da yake magana da TheCable a safiyar Juma’a, 25 ga watan Satumban 2026, Bolaji Abdullahi ya ce rashin sunayen wasu shugabannin jam’iyyar a kwamitin bai kamata a fassara shi da cewa akwai rabuwar kai a ADC ba.

Ya ce tsarin gudanar da jam’iyyar dole ne ya ci gaba da aiki yayin da ƙungiyar yaƙin neman zaɓen ke fara gudanar da ayyukanta.

“Akwai shugabannin jam’iyya da yawa waɗanda ba a sanya sunayensu ba. Muna taka muhimmiyar rawa a cikin jam’iyyar. Don haka, ba wani abu ba ne,” in ji Bolaji Abdullahi

Ya ƙara da cewa zai kasance abin da bai dace ba idan jam’iyyar ta cire manyan jami’anta daga tsarin shugabancinta domin kawai a gudanar da yaƙin neman zaɓe.

Kara karanta wannan

Duk da yana tsare, Atiku ya nada Nasir El Rufai a kwamitin yakin neman zaben ADC

Bolaji Abdullahi ya ce ya kamata tsarin jam’iyyar na ƙasa ya ci gaba da gudanar da ayyukansa yayin da kwamitin yaƙin neman zaɓen ke aiwatar da nasa nauyin.

Atiku ya samu nasara a zaben gwaji

A wani labarin kuma, kun ji cewa Abba Hikima bayyana sakamakon zaben gwaji da aka gudanar kan 'yan takarar da aka fi so a zaɓen shugaban ƙasa na 2027.

Abba Hikima ya ce jimillar kuri’a 109,799 aka samu a ƙarshen zaben, inda tikitin Atiku Abubakar da Rotimi Amaechi na jam’iyyar ADC ya samu mafi yawan kuri’un.

Asali: Legit.ng