INEC Ta Yi Maganar Goyon Bayan Wani Dan Takara ko Jam'iyya a Zaben 2027
- INEC ta tabbatar wa ’yan Najeriya da jam’iyyun siyasa cewa ba za ta goyi bayan wani ɗan takara ko wata jam’iyyar siyasa ba a zaɓen 2027
- Joash Amupitan ya ce hukumar za ta kasance alkalin da ba ya sassauci wajen tabbatar da daidaito ga dukkan ’yan takara
- Shugaban INEC ya bukaci ’yan siyasa su mayar da hankali kan batutuwan da suka shafi ’yan Najeriya maimakon cin mutuncin juna
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
FCT, Abuja - Shugaban Hukumar Zaɓe Mai Zaman Kanta ta Ƙasa (INEC), Farfesa Joash Amupitan, ya tabbatar wa ’yan Najeriya da jam’iyyun siyasa cewa hukumar za ta kasance tsaka-tsaki a zaɓen 2027, ba tare da fifita wani ɗan takara ko jam’iyyar siyasa ba.
Amupitan ya bayyana hakan ne ranar Talata a Abuja yayin rattaba hannu kan yarjejeniyar zaman lafiya ta ƙasa ta farko kan yaƙin neman zaɓe, wadda Kwamitin Zaman Lafiya na Ƙasa ya shirya tare da haɗin gwiwar Cibiyar Kukah.
Source: Facebook
Rahoton jaridar Tribune ya nuna cewa an gudanar da taron ne kwana guda kafin fara yaƙin neman zaɓen shugaban ƙasa da na Majalisar Ƙasa a hukumance.
INEC ba ta goyon bayan kowa
Amupitan ya ce INEC ba ta da wani ra’ayi kan wanda zai yi nasara ko wanda zai sha kaye a kowane zaɓe.
“Bari na bayyana a bayyane cewa INEC ba ta da wani ra’ayi kan wanda ya ci ko ya sha kaye a kowane zaɓe. Hukumar ba ta da ɗan takara, kuma ba ta fifita wata jam’iyyar siyasa. Abin da muke so kawai shi ne tsari na halal, gaskiya, sahihanci da kuma haɗa kowa,” in ji shi.
Ya yi alkawarin cewa INEC za ta kasance “alkalin da ba ya sassauci kuma mai adalci” domin tabbatar da daidaito tsakanin dukkan ’yan takara.
An bukaci a yi yaƙin neman zaɓe mai ma’ana
Shugaban INEC ya bukaci jam’iyyun siyasa da ’yan takara su mayar da hankali kan batutuwan da suka shafi ’yan Najeriya a lokacin yaƙin neman zaɓe, maimakon kai wa juna hare-hare, ɓata suna da kuma yin kalaman da za su iya tayar da hankali.
Ya ce lokacin rattaba hannu kan yarjejeniyar zaman lafiya ya ba da damar tsara ƙa’idojin da suka dace na fafatawar tun kafin fara yaƙin neman zaɓe ranar Laraba, 19 ga Agusta, 2026, jaridar TheCable ta kawo rahoton.
Amupitan ya ce ’yan Najeriya sun cancanci jin muhawara mai ma’ana kan bunƙasar tattalin arziki, tsaron ƙasa, ababen more rayuwa, kiwon lafiya, ilimi da kuma haɗa kowa cikin harkokin al’umma.
Ya bukaci ’yan takara su gabatar da shirye-shirye bayyanannu kuma masu sauƙin auna nasararsu kan waɗannan batutuwa.
Gargadi kan yaɗa karya
Amupitan ya kuma yi gargaɗi kan yaɗa bayanan ƙarya da kuma bayanan da aka karkatar da su daga jam’iyyun siyasa, ƙungiyoyin kafafen yaɗa labaran dijital na ’yan takara da kuma magoya bayansu a intanet.
A cewarsa, sanar da sakamakon zaɓe ba tare da tantance shi ba ko kuma yin hakan da wuri na iya jawo fargaba tare da rage amincewar jama’a da tsarin zaɓe.
Shugaban INEC ya kuma yi gargaɗi kan tunzura jama’a, tayar da zaune tsaye bisa ƙabilanci ko wata alama ta shaidar jama’a, da kuma amfani da ƙungiyoyin ’yan daba masu ɗauke da makamai.
Farfesa Amupita ya ce irin waɗannan ayyuka na iya kawo cikas ga sahihancin zaɓe tun kafin ranar kada kuri’a.
Source: Facebook
Tanadin doka kan kamfen
A wani labarin kuma, kun ji cewa dokar zaɓe ta 2026 ta tanadi hukunci mai tsauri kan jam’iyyun siyasa da ‘yan takarar da suka yi amfani da addini ko ƙabilanci wajen yakin neman zabe.
Sashe na 99 da na 101 na dokar sun tanadi matakai daban-daban na hukunci ga jam’iyyu, ‘yan takara da kafafen yaɗa labarai da suka karya ƙa’idojin yaƙin neman zaɓe.
Asali: Legit.ng
