Da Sauran Rayuwa: Tsohon Sanata Mai Shekaru 70 Ya Auri Budurwa Ƴar Shekara 18

• Tsohon Sanatan Kogi ta Gabas mai shekaru 70, ya auri sabuwar matarsa a wani bikin aure da aka gudanar a birnin Abuja
• An gudanar da bikin auren ne ranar 19 ga Satumba 2026, inda wani bidiyo ya nuna tsohon sanatan da amaryarsa suna rawa yayin bikin
• Tsohon sanatan lauya ne kuma ɗan siyasa daga Idah, Kogi, wanda ya wakilci Kogi ta Gabas a Majalisar Dattawa tsakanin 2011 da 2015

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Lokoja, Kogi - Duk da tarun shekarunsa a duniya, wani tsohon Sanatan Kogi ta Gabas ya kara kinkimo wata sabuwar amarya.

Majiyoyi suka ce Sanata Emmanuel Dangana Ocheja, mai shekaru 70, ya auri sabuwar matarsa a wani bikin aure da aka gudanar Abuja.

Tsohon sanata ya angwance da amaryarsa

Kara karanta wannan

Tsohon gwamna ya rasu a Najeriya, majalisar tarayya ta karrama shi

An gudanar da bikin auren ne ranar 19 ga Satumba 2026, inda wani bidiyo ya nuna Ocheja da amaryarsa suna rawa yayin bikin, cewar Punch.

Ocheja, lauya kuma ɗan siyasa daga Idah, ya wakilci Kogi ta Gabas a Majalisar Dattawa tsakanin 2011 da 2015 karkashin jam’iyyar PDP.

Ya kasance cikin Majalisar Dokoki ta Ƙasa ta bakwai, inda ya yi aiki a kwamitoci da dama, ciki har da tsaro da sojoji, kasafi, gas da shari’a.

An haifi Ocheja ranar 3 ga Afrilu 1956, kamar yadda bayanan tarihinsa suka nuna. Ya karanci shari’a a Jami’ar Ahmadu Bello, sannan aka kira shi Bar a 1982.

Daga bisani, ya koma jam’iyyar APC kuma ya ci gaba da taka rawa a siyasar jihar Kogi kafin wannan lokaci da ya yi aure wanda hotunan bikin aurensa ya jawo martani daga masu amfani da kafafen sada zumunta.

Yan Najeriya sun yi martani kan bikin Sanata

Wannan aure da ya ba zu a kafofin sada zumunta ya jawo martani mabambanta a tsakanin yan Najeriya wanda ya nuna irin bambancin ra'ayi sa fahimtar rayuwa daga bangarori da dama na ƙasar.

Kara karanta wannan

Gwamna ya fitar da sanarwa, ya hana bikin ranar samun 'yancin kan Najeriya

Shafin Linderikejiblog ya wallafa faifan bidiyon a shafin Facebook inda mutane da dama ke nuna damuwa kan shekarun tsohon sanatan idan aka kwatanta da na yarinyar mai shekaru 18.

Yan Najeriya da dama sun yi ta yi wa dan siyasar shagube duba da ratar shekaru da ke tsakaninsa da yarinyar wacce ake ganin ya kai ta zama sa'ar jikarsa.

Wasu ko hankalinsu ya karkata ne kan tasirin da kudi ke da shi a rayuwar dan Adam inda mafi yawa ke ganin saboda kudinsa kawai ta aure shi.

Sanatan Kano ya angwance a Najeriya

A baya, mun ba ku labarin cewa Sanatan Kano ta Kudu, Kawu Sumaila ya angwance da amaryarsa Hindatu Adda’u Isah, jami’ar sojojin saman Najeriya.

An daura auren ne a fadar Sarkin Rano, Muhammad Isa Umar, lamarin da ya jawo cece-kuce saboda ya zo a ba-za-ta ba kamar yadda aka saba ba.

Manyan mutanen da aka hango sun halarci daurin auren Kawu Sumaila sun hada da A.A. Rano da Kabiru Alhassan Rurum.

Asali: Legit.ng