2027: Sanatan APC a Gombe Ya Sauya Sheka zuwa PDP bayan Rasa Tikitin Takara

• Jam'iyyar APC mai mulki a jihar Gombe ta rasa daya daga cikin sanatocin da take da su a majalisar dattawan Najeriya
• Sanata Anthony Siyako Yaro ya fice daga APC bayan gaza samun tikitin takara domin komawa kan kujerarsa a zaben 2027
• Ya sanar da sauya shekarsa zuwa tsohuwar jam'iyyarsa ta PDP wadda bai dade da ficewa daga cikinta ba

​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Gombe - Sanata Anthony Siyako Yaro, sanata mai wakiltar Gombe ta Kudu a majalisar dattawa, ya yi murabus daga jam’iyyar APC.

Sanata Anthony Siyako Yaro ya koma tsohuwar jam’iyyarsa ta PDP bayan ya gaza samun tikitin takarar sanata na jam’iyya mai mulki don zaɓen 2027.

Hakan na kunshe ne a cikin wata sanarwa da sanatan ya fitar ranar Asabar, 9 ga watan Mayun 2026 wadda aka sanya a shafin Facebook.

Kara karanta wannan

Za a buga siyasa: Gwamnan Bauchi ya saye fom din neman takara a 2027

Sanata ya bar A​PC zuwa PDP

Dan majalisar ya ce ya ɗauki wannan shawarar ne bayan tuntuɓa mai faɗi da ya yi da abokan siyasa, shugabannin al’umma, da kuma magoya bayansa a faɗin mazaɓar.

Sanata Anthony Siyako Yaro ya siffanta PDP a matsayin jam’iyyar da ta fara amincewa da burin mutanen Gombe ta Kudu, kuma ta ba shi damar gudanar da manufofinsa na ci gaba.

“Ba a ɗauki wannan shawarar cikin sauƙi ba. Amma PDP ita ce jam’iyyar da ta fara amincewa da burinmu na haɗin gwiwa na ganin Gombe ta Kudu ta zama babba, burin samun ingantattun hanyoyi, makarantun da ke aiki yadda ya kamata, kiwon lafiya mai sauƙi, da kuma tallafa wa matasa da mata."

- Sanata Anthony Siyako Yaro

Sanata Anthony ya kare kansa

Sanatan ya yi watsi da duk wani ra’ayi na nuna yanke ƙauna ko rashin tabbas, inda ya bayyana matakin nasa a matsayin daukar nauyi da kuma riƙon amana ga mutanen da yake wakilta.

Kara karanta wannan

Sanata a Kaduna ya sauya sheka daga PDP zuwa jam'iyyar ADC

“Ga magoya bayana da mutanen mazaɓata, ina buƙatar ku kalli wannan komawar ba a matsayin alamar ruɗani ba, a’a, ku kalle shi a matsayin nuna jarumta da riƙon amana. Biyayyata a ko da yaushe tana ga mutane ne kafin komai, kuma hakan zai ci gaba da kasancewa."

- Sanata Anthony Siyako Yaro

Ya godewa magoya bayansa

Sanata Anthony Siyako Yaro ya nuna godiyarsa ga magoya bayansa bisa tsayawa tsayin daka da biyayyar da suka nuna masa, sannan ya jaddada ƙudurinsa na ci gaba da kawo ci gaba a mazaɓar, jaridar The Punch ta kawo labarin.

“Ina shirye na yi takara. Ina shirye na yi nasara. Ina shirye na ci gaba da kare muradunku da sauran numfashina."

- Sanata Anthony Siyako Yaro

Ya buƙaci mazauna yankin da su kasance cikin haɗin kai, yana mai jaddada cewa makomar Gombe ta Kudu dole ne ta kasance ƙarƙashin ikon nufin jama’a maimakon gajeran lissafin siyasa.

'Yan majalisar wakilai sun fice daga PDP

A wani labarin kuma, kun ji cewa wasu 'yan majalisar wakilai na jam'iyyar PDP daga jihar Oyo, sun yi murabus daga cikinta.

'Yan majalisun sun danganta rikicin shugabanci da ya addabi PDP a matsayin dalilin da ya sanya suka raba gari da jam'iyyar.

Sai dai, duk da ficewarsu daga PDP, 'yan majalisar ba su sanar da sabuwar jam'iyyar siyasa da za su koma ba.

Asali: Legit.ng