An Gano Inda Gwamna Fubara Yake bayan Sojoji Sun Mamaye Fadar Gwamnatin Ribas

• Wata majiya daga fadar gwamnatin Ribas ta tabbatar da Simi Fubara ya na nan cikin gidansa na gidan gwamnati bayan an ayyana dokar ta ɓaci
• A jiya Talata ne shugaban kasa, Bola Ahmed Tinubu ya dakatar da Simi Fubara, mataimakiyarsa da dukkan ƴan Majalisar dokokin Ribas
• Jim kaɗan bayan haka, dakarun sojoji da motocin sulƙe suka mamaye fadar gwamnatin da ke Fatakwal, lamarin da ya kara jefa ruɗani

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Rivers - Shugaban ƙasa, Bola Ahmed Tinubu, ya ayyana dokar ta-baci a jihar Ribas da ke Kudu maso Kudancin Najeriya a daren Talata, 18 ga watan Maris, 2025.

Bola Tinubu ya sanar da wannan mataki ne yayin wani jawabi da ya yi wa ‘yan ƙasa kan halin da jihar Ribas ta tsinci kanta.

Mai magana da yawun shugaban kasa, Bayo Onanuga ya tabbatar da hakan a wata sanarwa da ya wallafa a shafinsa na X.

Kara karanta wannan

Tsohon hadimin Jonathan ya dauko zancen tsige Tinubu kan dakatar da Gwamnan Ribas

A cewarsa, matakin ya zama dole domin dawo da doka da oda a jihar mai dinbin arzikin man fetur..

Bola Tinubu ya naɗa gwamnatin riko

Sanarwar ta kuma haɗa da dakatar da Gwamna Siminalayi Fubara, mataimakiyarsa Ngozi Odu, da dukkan ‘yan majalisar dokokin jihar na tsawon watanni shida.

Shugaban ƙasa ya naɗa tsohon hafsan sojan ruwa, Vice Admiral Ibokette Ibas (mai ritaya), a matsayin wanda zai jagoranci al’amuran jihar.

Bayan ‘yan sa’o’i kaɗan da sanarwar, sojoji suka mamaye gidan gwamnati da ke birnin Fatakwal.

Ina Gwamna Fubara ya shiga?

Wata majiyar Punch ta bayyana cewa gwamnan na nan a gidansa da ke cikin fadar gwamnati lokacin da sojoji suka mamaye wurin da misalin ƙarfe 9:00 na dare.

"To, a halin da ake ciki yanzu, akwai sojoji a cikin gidan gwamnati amma gwamna ya na nan a gidansa da ke fadar gwamnati, ya yi zamansa."

Kara karanta wannan

Rikicin Rivers: Manyan zunubai 3 da Tinubu ya nuna Gwamna Fubara ya aikata

Har ila yau, an girke wata motar sulƙe ta yaƙi (APC) a ƙofar shiga fadar gwamnati, tana kallon babban titin da ke gabanta.

Wani ɗan jarida da ya ziyarci wurin da misalin ƙarfe 9:00 na dare ya ga motocin alfarma (SUVs) da dama a gaban ƙofar gidan gwamnati, masu fitilu a kunne.

Sai dai babu tabbacin ko gwamnan yana shirin barin gidan gwamnati ne ko akasin haka.

Halin da ake ciki bayan dakatar da Fubara

A cikin birnin Fatakwal, an ga jama’a da direbobi na hanzarta komawa gidajensu bayan sun ji sanarwar ayyana dokar ta-baci.

Haka nan, mutane da yawa sun taru a kan tituna suna tattauna batun, inda wasu suka nuna damuwa da takaici game da lamarin, suna zargin ‘yan siyasa da haddasa rikicin da ya kai ga wannan mataki.

Ribas: PDP ta yi watsi da matakin Tinubu

A wani rahoton, kun ji cewa jam'iyyar PDP ta yi fatali da matakin ayyana dokar ta ɓaci a jihar Ribas da shugaban ƙasa, Bola Ahmed Tinubu ya yi.

Kara karanta wannan

Gwamnatin Rivers ta fadi mamakin da Tinubu ya ba ta kan dakatar da Fubara

Babbar jam'iyyara dawa ta ƙasa ta bayyana cewa dakatar da Fubara da naɗa wanda zai jagoranci gwamnatin riko a Ribas ya saɓawa kundin tsarin mulki.

Muhammad Malumfashi, babban edita a sashen Hausa na Legit ya duba labarin.

Wanda ya tantance Muhammad Malumfashi, babban edita a Legit.ng.

Asali: Legit.ng