El Rufai Ya Girgiza Siyasar Najeriya, Manyan Jiga Jigan APC na Shirin Komawa SDP

• Sauya shekar tsohon gwamnan Kaduna, Nasir El-Rufai daga APC zuwa SDP ta fara jawo hankulan manyan ƴan siyasa
• Alamu sun nuna wasu manyan jiga-jigan APC na shirin bin sahun El-Rufai zuwa SDP gabannin babban zaɓen 2027
• Shugaban SDP na ƙasa, Shehu Musa Gabam ya ce jam'iyyar tana da tsare-tsare da manufofin da aka gina ta a kai tun can

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Abuja - Bayan ficewar tsohon gwamnan jihar Kaduna, Nasir El-Rufai, daga jam’iyyar APC zuwa SDP, akwai alamun cewa wasu manyan ’yan siyasa suna shirin bin sahunsa.

Alamu masu karfi sun nuna cewa wasu manyan jiga-jigan APC da ƴan adawa a ƙasar nan na shirye-shiryen sauya sheka zuwa SDP domin su haɗe da El-Rufai.

Shugaban jam’iyyar SDP na kasa, Shehu Musa Gabam, ne ya bayyana hakan a wata hira da aka yi da shi a jiya Litinin a Trust TV.

Kara karanta wannan

2027: Yan adawa na shirin firgita Tinubu, ƙusa a PDP ya ce guguwar canji za ta tafi da APC

Ya ce wannan matakin da El-Rufai ya dauka ya ja hankalin mutane da dama daga jihar Kaduna, kuma ana sa ran wasu shahararrun jiga-jigan siyasa daga APC da sauran jam’iyyu za su bi sahu.

Waɗanda ake hasashen za su bi El-Rufai

Duk da cewa Gabam bai bayyana sunayen jiga-jigan da za su koma SDP ba, wasu majiyoyi daga cikin jam’iyyar sun ce ana hasashen har da tsofaffin gwamnoni biyu.

Majiyoyin sun ce tsohon gwamnan jihar Ekiti, Kayode Fayemi, da tsohon gwamnan Osun, Rauf Aregbesola, na cikin waɗanda shirin sauya sheka zuwa SDP.

Hakan ya biyo bayan wata ganawa da El-Rufai ya yi da Aregbesola da fitaccen limanin cocin nan, Fasto Tunde Bakare, a birnin Lagos a ranar Lahadi.

Haka kuma, El-Rufai ya gana da tsohon shugaban kasa, Muhammadu Buhari, da tsohon mataimakin shugaban kasa, Atiku Abubakar, a kwanakin baya.

Wadannan tarurruka da ziyarce-ziyarce na El-Rufai sun kara rura wutar jita-jitar cewa ficewarsa daga APC wata alama ce ta sabuwar dabara ta siyasa.

Kara karanta wannan

Fadar shugaban ƙasa ta yi magana kan sauya sheƙar El Rufai daga APC zuwa SDP

Kayode Fayemi ya musanta barin APC

Duk da haka, Kayode Fayemi, a wata sanarwa da ya fitar a jiya, ya musanta jita-jitar cewa yana shirin barin APC.

"An jawo hankalina kan wata jita-jita da ke yawo a kafafen sada zumunta cewa na raba gari da APC. A baya na sha bayyana cewa ni mamba ne na asali a APC, kuma hakan bai canza ba."

"Ko da yake ina daga cikin masu kira da a yi gyara a cikin jam’iyyar ta hanyar samar da cikakken dimokuradiyya, ina ganin har yanzu ba a makara ba. APC na da damar gyara matsalolinta domin hadin kan ’ya’yanta."

SDP na shirin haɗaka da wata jam'iyya?

A hirar da aka yi da shi, Shugaban SDP, Shehu Musa Gabam, ya jaddada cewa tururuwar da ake yi zuwa SDP wani yunkuri ne na inganta dimokuradiyya a ƙasar nan.

Duk da rade-radin cewa El-Rufai yana da burin takarar shugabancin kasa a 2027, Gabam ya ce jam’iyyar SDP tana da tsare-tsarenta wanda aka gina ta akai.

Kara karanta wannan

APC ta yi martani kan sauya shekar El Rufai, ta fadi shirin da take yi

Shugaban SDP ya ce:

"Manufofin SDP sun fi mayar da hankali kan siyasa tun daga tushe domin tabbatar da cewa duk wani dan takara ya biyo ta hanyoyin da suka dace, maimakon a ba wasu damar mallake jam'iyya.

Ya kuma musanta rade-raɗin cewa SDP za ta yi hadaka da wata jam’iyya, yana mai cewa;

"Ba mu da wani shirin hadaka da wata jam’iyya domin hakan zai haifar da rudani."

APC ta yi magana kan fitar El-Rufai

A wani labarin, kun ji cewa jam'iyyar APC reshen jihar Kaduna ta ce fitar El-Rufai daga cikinta zuwa SDP ba za ta hana ta komai ba.

Sakataren APC na reshen jihar Kaduna, Alhaji Yahaya Baba-Pate, ya ce jam’iyyar ba ta damu da ficewar tsohon gwamnan ba.

Muhammad Malumfashi, babban edita a sashen Hausa na Legit ya duba labarin.

Wanda ya tantance Muhammad Malumfashi, babban edita a Legit.ng.

Asali: Legit.ng