Jigawa: Kwanaki 6 da Mutuwarsa, INEC Ta Dauki Mataki Kan Kujerar 'Dan Majalisa

• Kwanaki shida da mutuwar ɗan Majalisar Tarayya a jihar Jigawa, hukumar INEC ya ce babu kowa a kujerar
• Hukumar ta dauki wannan mataki ne bayan mutuwar Hon. Isa Dogonyaro domin shirye-shiryen sake zaben cike gurbi
• Shugaban hukumar, Farfesa Mahmoud Yakubu shi ya tabbatar da haka a jiya Laraba 15 ga watan Mayu inda ya lissafo sauran mazabu a jihohi uku

Abdullahi Abubakar, Editan Legit Hausa ne a bangaren siyasa, kasuwanci da al'amuran yau da kullum ne, ya na da gogewar aikin jarida sama da shekaru uku.

FCT, Abuja - Hukumar zabe ta kasa (INEC) ta ce babu kujerar marigayi ɗan Majalisar Tarayya daga jihar Jigawa.

Hukumar ta ce za ta saka ranar sake zaɓen bayan mutuwar Hon. Isa Dogonyaro a ranar Juma'a 10 ga watan Mayu a Abuja.

Kara karanta wannan

Yayin da ake kukan tsadar kujerar hajji, Tinubu ya tausaya da tallafin biliyoyi

INEC za ta shirya zaben cike gurbi

Shugaban hukumar, Farfesa Mahmoud Yakubu shi ya sanar da haka a jiya Laraba 15 ga watan Mayu a Abuja, cewar The Nation.

Marigayin kafin rasuwarsa, ya wakilci mazabar Garki/Babura a jihar Jigawa a Majalisar Wakilai.

Farfesa Yakubu ya kuma sanar da karin wasu mazabu a jihohi uku sanadin mutuwa ko kuma murabus na masu rike da kujerun.

Sauran mazabu da INEC za tayi zaɓe

Mazabun sun hada da mazabar Khana 2 a jihar Rivers da Bagwai/Shanono a jihar Kano sai kuma mazabar Zaria Kewaye a jihar Kaduna.

Yakubu ya ce da zaran hukumar ta kammala shirye-shirye za ta sanar da lokacin gudanar da zaben a wadannan mazabu.

Ya ce nan ba da jimawa ba hukumar za ta yi martani kan sahihancin zaben ƙananan hukumomi da kansiloli a birnin Abuja.

Kara karanta wannan

Bulaliyar kan hanya: Tinubu, Shettima za su fara biyan harajin fakin a filin jirgin sama

Dan Majalisar Jigawa, Dogonyaro ya rasu

A wani labarin, kun ji cewa ɗan Majalisar Tarayya mai wakiltar mazabun Garki da Babura a jihar Jigawa, Isa Dogonyaro ya rasu.

'Dan Majalisar ya rasu ne a ranar Jumu'ah da ta gabata 10 ga watan Mayu a Abuja bayan gajeruwar jinya da ya yi fama da ita.

Yar uwarsa mai suna Amina Dogonyaro ita ta sanar da rasuwar a shafinta na Facebook tare da bayyana cewa za a masa sallah a masallacin kasa da ke Abuja bayan sallar Juma'a.

Muhammad Malumfashi, babban edita a sashen Hausa na Legit ya duba labarin.

Asali: Legit.ng