Ganduje Sun Yi Wa Maryam Shetty Izgili a Bidiyo Bayan ‘Tunbuke’ Ta a Jerin Ministoci
- Wani fai-fen bidiyo ya nuna Abdullahi Umar Ganduje da wasu mata su na magana a kan Maryam Shetty
- Ana zargin shugaban na APC ya yi ruwa da tsaki wajen ganin an canza wanda za ta wakilci Kano a FEC
- Wasu su na cewa Dr. Mariya Mahmoud Bunkure da aka zabo daga baya, ta na da alaka da iyalin Ganduje
DUBA NAN: Bibiyi shafin Legit.ng Hausa a kafar TikTok. Kada ka bari bidiyo mai daukar hankali ya wuce ka!
Abuja - Sabon shugaban jam’iyyar APC na kasa, Abdullahi Umar Ganduje, ya kalubalanci masu caccakar mai dakinsa, Hafsat Abdullahi Ganduje.
A wani faifen bidiyo da yake yawo a shafukan zumunta, an ji Dr. Abdullahi Umar Ganduje ya na bayani abin ya faru a kan zakulo Minista daga Kano.
Jim kadan bayan tura Mariya Mahmoud Bunkure, a tantance ta a majalisa, aka ga tsohon Gwamnan da wasu mata su na yi wa Maryam Shetty dariya.
Asali: Facebook
Ta leko ta komawa Maryam Shetty
Dr. Mariya Bunkure ta maye gurbin Maryam Shetty wanda da farko aka zabe ta domin zama Minista, lamarin da ya jawo ce-ce-ku-ce sosai a kasar.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Legit.ng Hausa ta saurari bidiyoyin, ta ji inda wata mata ta ke cewa an daura kwarya a gurbinta da tsohuwar Kwamishinar ta kama hanyar zama Minista.
Maryam wa...? Shetty! Daga ina?
Da ake tambayar sunan wanda aka cire watau Maryam Shetty, za a iya ganin tsohon Gwamna watau Abdullahi Umar Ganduje ya kyalkyace da Dariya.
Daily Trust wanda ta wallafa bidiyon, ta ce da wata ta tambayi sunan wanda aka canza, sai wata a wurin ta bada amsa da cewa “Maryam Shetty”.
Maryam Shetty dukkanmu kan mu ya kulle, an ce Maryam Shetty, na ce ‘Yar ina ce Shettyn? ‘Aka ce ‘Yar Kano’
- Inji wata a cikin matan
Ganduje: "Na fi so su yi ta fadan Goggo"
A wani fai-fen, da Dr. Ganduje ya tashi zai yi jawabi, sai aka ji yana caccakar masu sukar matarsa, Hafsat Ganduje da mutane su ke yawon kira da Goggo.
Shugaban jam’iyyar ta APC mai mulki yake cewa ya fi so mutane su yi ta maganar Goggo, sannan ya nuna farin cikinsa da Dr. Bunkure za ta shiga FEC.
Ba tare da ya ambaci sunan kowa ba, ‘dan siyasar ya kara da nuna ‘yan adawarsa su na sukar shi game da matarsa ne saboda matan aurensu dakikai ne.
Akwai hannun Shugaban APC?
A wani rahoton, kun ji cewa ana zargin Abdullahi Ganduje ya jawo aka soke sunan Maryam Shetty daga jerin sunayen mutanen da za su zama Ministoci.
Mutane sun yi ta magana da jin Bola Ahmed Tinubu ya zabi Dr. Mariya Mahmoud Bunkure ta canji tsohuwar abokiyar karatunta a sakandare da jami’a.
Asali: Legit.ng
