“Atiku Abubakar Zai Doke Bola Tinubu a Legas a Zaben Shugaban Kasan 2023”

• Sanata Dino Melaye yana ganin jam’iyyar PDP za ta shiga har Legas, ta koyawa Asiwaju Bola Tinubu darasi a siyasar 2023
• Melaye wanda shi ne Mai magana da yawun kwamitin takarar Atiku Abubakar yace ‘dan takaran ya samu karbuwa a jihar
• Ganin yadda ‘Dan takaran Gwamnan da PDP ta tsaida ya kifar da Gwamna a jihar Osun, Melaye ya hangowa PDP wata nasara

Abuja - Mai magana da yawun bakin kwamitin yakin neman zaben Atiku Abubakar, Dino Melaye yace mai gidansa zai doke APC a jihar Legas.

Daily Trust tace Sanata Dino Melaye ya yi wannan bayani ne a lokacin da aka yi wata tattaunawa da shi a gidan talabijin na Trust TV a makon nan.

Domin nuna irin galabar da ‘dan takaran PDP zai yi a zaben shugaban kasa mai zuwa, Dino Melaye yace zai doke Asiwaju Bola Tinubu ko a gidansa.

Kara karanta wannan

Mu ba butulu bane: Tinubu ne zan gaji Buhari a 2023, Insha Allahu, Masari ya bayyana dalilai

Asiwaju Bola Tinubu ya yi gwamna a jihar Legas tsakanin 1999 da 2007, kafin nan ya yi Sanata a 19992, kuma har yau ana zargin yana da ta-cewa.

Zaben Osun ya isa aya - Dino

Da aka zanta da Melaye, kakakin kwamitin yakin neman zaben na Atiku Abubakar ya bada misali da yadda jam’iyyar APC ta sha kashi a jihar Osun.

Sanata Melaye yake cewa asalin Bola Tinubu mutumin Osun ne, amma wannan bai hana ‘dan takaran PDP lashe zaben gwamna da aka yi a Yuli ba.

Bugu da kari, Melaye yace Tinubu tamkar uba yake a wajen Gwamna mai-ci da aka doke a Osun.

Abin da ya sa PDP za ta ci zabe

“Idan aka shirya zabe yau a Legas, jama’iyyar PDP za ta lashe zaben, Atiku Abubakar zai doke Asiwaju Bola Tinubu.”

Kara karanta wannan

Hantar Atiku da PDP Ta Kada Bayan Samun Bayanin Zaman Tinubu da Wike a Landan

“Atiku ya je Legas kwanaki biyu da suka wuce, kuma an tarbe shi duk inda ya je. Mutane na kaunarsa, zai lashe zabe.”

- Dino Melaye

Baya ga haka, an rahoto tsohon Sanatan yana cewa rikicin Atiku da tsagin Gwamna Nyesom Wike ba zai hana ‘dan takaran shugaban kasar cin nasara ba.

Babu adalci a PDP - Sanata Jibrin

An ji labari Walid Jibrin wanda shi ne shugaban majalisar BoT kuma da su ne aka kafa jam’iyyar a 1998, ya fito yana cewa an dannke 'Yan kudu a PDP

Yanzu maganar da ake yi a PDP, Shugaban jam’iyya na kasa, da Shugaban majalisar BoT da ‘dan takaran shugaban kasa duk 'Yan yankin Arewa ne.

Asali: Legit.ng