Arewa Ta Yi Rashi, Mai Martaba Sarkin Gabas na Gwandu Ya Rasu

• Hakimin Gwandu wanda aka fi sani da Sarkin Gabas, Alhaji Muhammadu Rasheed, wanda aka fi sani da Sarkin Gabas, ya rasu a ranar Laraba
• An tsara gudanar da sallar jana’izarsa da ƙarfe 3:00 na rana a fadar Sarkin Gwandu da ke Birnin Kebbi a jihar Kebbi
• Gwamna Nasir Idris, wanda ke halartar Babban Taron Majalisar Ɗinkin Duniya a Amurka, ya bayyana rasuwar a matsayin babban rashi ga Kebbi

​​​​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Birnin Kebbi - Allah Ya yi wa Hakimin Gwandu na Jihar Kebbi, Alhaji Zayyanu Bello, wanda aka fi sani da Sarkin Gabas, rasuwa.

An tabbatar da rasuwar ne ranar Laraba, 23 ga watan Satumban 2026 ta bakin Babban Sakataren Yaɗa Labarai na Gwamnan Kebbi, Ahmed Idris, da Mai ba Gwamna shawara kan Harkokin Sadarwa da Dabaru, Abdullahi Idris.

Kara karanta wannan

Tafiyar Tinubu: Sowore ya sanar da majalisa hanyar mika mulki ga Shettima

Za a yi jana’iza a fadar Sarkin Gwandu

Jaridar The Punch ta ce Abdullahi Idris ya ce Sarkin Gabas ya rasu ne a ranar Laraba, inda za a gudanar da sallar jana’izarsa da ƙarfe 3:00 na rana a fadar Sarkin Gwandu da ke Birnin Kebbi.

“Mai martaba ya rasu a yau, kuma za a yi sallar jana’izarsa a fadar Sarkin Gwandu da ke Birnin Kebbi da ƙarfe 3:00 na rana. Allah Ya ji kansa.”

Ya bayyana cewa marigayin ya gaji mahaifinsa, marigayi Alhaji Muhammadu Bashar Mai-Wurno, wanda shi ne babban ɗan marigayi Sarkin Gwandu, Alhaji Haruna Rasheed.

Gwamna Nasir Idris ya yi jimamin rasuwar

Shi ma Ahmed Idris ya tabbatar da rasuwar, yana mai bayyana ta a matsayin babban rashi ga Jihar Kebbi da kuma masarautun gargajiyar jihar.

Ya ce Gwamnan Kebbi, Nasir Idris, wanda a halin yanzu yake ƙasar Amurka domin halartar Babban Taron Majalisar Ɗinkin Duniya tare da Mataimakin Shugaban Ƙasa, Kashim Shettima, ya kaɗu matuƙa da labarin rasuwar hakimin.

Kara karanta wannan

Kwankwaso da Obi sun samu babbar dama a kwamitin yakin neman zaben NDC

A cewarsa, rasuwar Hakimin Gwandu babban rashi ne ga Jihar Kebbi da kuma tsarin masarautun gargajiya.

“Rasuwar Hakimin Gwandu babban rashi ne ga Jihar Kebbi da kuma masarautun gargajiya,” in ji shi.

Ya ƙara da cewa Gwamna Nasir Idris ya shiga jimami bayan samun labarin rasuwar Sarkin Gabas ba zato ba tsammani.

An yi addu’ar Allah Ya ji kansa

Mai taimaka wa gwamnan ya roƙi Allah Ya gafarta wa marigayin kurakuransa, Ya kuma ba shi Aljannatul Firdaus.

Ya kuma roƙi Allah Ya bai wa iyalan marigayin, al’ummar Gwandu da daukacin al’ummar Jihar Kebbi ƙarfin jure wannan babban rashi.

Tsohon gwamnan Kogi ya rasu

A wani labarin kuma, kun ji cewa tsohon gwamnan jihar Kogi, Alhaji Ibrahim Idris, ya rasu ya koma ga Mahaliccinsa.

Marigayi Alhaji Ibrahim Idris ya rasu ne ranar Lahadi, 20 ga watan Satumba 2026, a kasar Birtaniya yana da shekaru 77.

Ibrahim Idris ya zama gwamnan jihar Kogi a watan Mayun 2003, bayan ya lashe zaben gwamna karkashin jam’iyyar Peoples Democratic Party (PDP). Ya sake lashe zaben shekarar 2007, inda ya ci gaba da mulkin jihar a wa’adinsa na biyu.

Asali: Legit.ng