Da Gaske Gwamnatin Tinubu Za Ta Daure Daliban da Suka Kasa Biyan Bashin NELFUND?

• NELFUND ta yi magana kan wani hoto da ke cewa za a ɗaure ɗaliban da suka kasa biyan bashin karatu bayan kammala karatu
• Hukumar ta ce ba Shugaba Bola Tinubu ya sanar da daurin rai da rai ga ɗaliban da suka gaza biyan bashin karatu ba
• A tsarin doka, biyan bashin yana farawa ne shekaru biyu bayan kammala NYSC idan mai cin gajiyar yana da aikin yi.

​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Asusun Kula da Bashin Ilimi na Najeriya (NELFUND) ya yi magana kan batun daure daliban da suka gaza biyan bashin da suka ci.

NELFUND ta musanta wani hoto da ke yaɗuwa a kafafen sada zumunta, wanda ke cewa Shugaba Bola Ahmed Tinubu ya sanar da daurin rai da rai ga ɗaliban da suka kasa biyan bashin karatunsu.

Kara karanta wannan

Kano da wasu jihohi 7 da cutar 'Diphtheria' ta fi kama mutane, NCDC ta gano matsalar

Hukumar ta bayyana hoton a matsayin ƙarya NELFUND ta bayyana hakan ne a wani saƙo da ta wallafa a shafinta na X ranar Lahadi, 6 ga watan Satumban 2026.

Hukumar ta wallafa hoton wata takarda da aka yi wa kwaskwarima, wadda ta yi kama da shafin farko na jaridar The Daily Tribune, mai kwanan wata Alhamis, 27 ga Mayu, 2027.

Kanun labarin da ke cikin hoton ya ce, “Tinubu: Duk ɗaliban da suka kasa biyan bashinsu bayan kammala karatu za su je gidan yari daurin rai da rai.”

Sai dai NELFUND ta sanya babbar alamar “FAKE”, wato ƙarya, a kan hoton, tare da jaddada cewa ikirarin ba gaskiya ba ne.

NELFUND ta sha musanta labaran ƙarya

Wannan ba shi ne karon farko da NELFUND ke musanta bayanan ƙarya da ake yaɗawa game da shirin bashin karatu ba.

A baya, hukumar ta yi ƙarin bayani kan wasu takardu da aka ƙirƙira, da suka haɗa da sanarwar dakatar da tallafin kuɗin kula da rayuwa da kuma ikirarin cewa masu cin gajiyar shirin dole ne su fara biyan bashin tun suna makaranta.

Kara karanta wannan

Shugaban da ya nemi mata su kashe aurensu kan zaben APC ya magantu

Hukumar ta kuma musanta cewa dole ne ɗalibai su fara biyan bashin jim kaɗan bayan kammala karatu.

Yaushe ake fara biyan bashin?

An kafa NELFUND ne ƙarƙashin Student Loans (Access to Higher Education) Act, dokar da Shugaba Tinubu ya sanya wa hannu, sannan aka sake aiwatar da ita a shekarar 2024.

Hukumar ce ke kula da bayar da bashin karatu marar ruwa ga ɗaliban Najeriya da suka cancanta a manyan makarantun gwamnati.

Bashin na taimaka wa ɗalibai wajen biyan kuɗaɗen makaranta tare da samar musu da tallafin kuɗin kula da rayuwa na wata-wata.

A ƙarƙashin dokar, biyan bashin yana fara zama wajibi ne bayan shekaru biyu da kammala shirin yi wa ƙasa hidima na NYSC.

Sai dai hakan yana faruwa ne kawai idan mai cin gajiyar bashin ya samu aikin yi ko wata hanyar samun kuɗin shiga.

An kayyade adadin kuɗin da ake cirewa

Jaridar The Punch ta ce dokar ta tanadi cewa kuɗin da ake cirewa a kowane wata ba zai wuce kashi 10 cikin 100 na albashin ko kuɗin shiga na mai cin gajiyar bashin ba.

Kara karanta wannan

Babbar magana: Abin da zai faru da masu zagi da sukar gwamnatin Tinubu

Idan yana aiki da kamfani ko wata hukuma, ana iya cire kuɗin kai tsaye daga albashinsa ta hannun mai ɗaukar nauyin aikinsa.

Masu sana’ar kansu ko kasuwanci kuma ana sa ran su riƙa biyan irin wannan kaso daga kuɗin shigarsu.

Ga waɗanda ba su samu aikin yi ba bayan cikar shekaru biyun, dokar ta ba su damar neman ƙarin lokaci ta hanyar gabatar da shaidar rantsuwa.

Saboda haka, NELFUND ta buƙaci jama’a su yi watsi da hoton da ake yaɗawa, tare da dogaro da bayanan da hukumar ke fitarwa ta kafafen hukumarta.

SERAP ta mika bukata ga Tinubu

A wani labarin kuma, kun ji cewa kungiyar kare hakkin jama’a da tabbatar da gaskiya a harkokin tattalin arziki, SERAP, ta bukaci binciken gwamnatin Shugaba Bola Tinubu.

Kungiyar ta bukaci Tinubu ya dauki matakin gaggawa kan zargin almundahanar kudaden gwamnati na tallafi da yake bayarwa.

Asali: Legit.ng