"Na Samu Labari Mara Dadi"; Atiku Ya Haska Matsalar da Matasa ke Fuskanta a Gwamnatin Tinubu
- Atiku Abubakar ya ce yana samun rahotannin matasan Najeriya da ake zargin suna sayar da ƙodojinsu domin samun kuɗin biyan bukatun yau da kullum
- Tsohon mataimakin shugaban ƙasar ya danganta lamarin da tsadar abinci, sufuri, haya, kuɗin makaranta, magunguna da wutar lantarki
- Atiku ya ce dokokin hana safarar gabobin jiki kaɗai ba za su isa ba, sai an magance talauci da matsananciyar rayuwar da ke jefa matasa cikin haɗari
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
FCT, Abuja - Tsohon Mataimakin Shugaban Ƙasa, Atiku Abubakar, ya yi magana kan halin da matasa ke ciki a Najeriya.
Atiku ya nuna damuwa kan abin da ya bayyana a matsayin ƙaruwa da ake samu na matasan Najeriya da ke sayar da ƙodojinsu domin samun tsira.
Source: Twitter
Atiku, wanda yake ɗan takarar shugaban ƙasa na African Democratic Congress (ADC), ya bayyana hakan ne cikin wani saƙo da ya wallafa a shafinsa na X ranar Alhamis, 3 ga watan Agustan 2026.
Atiku ya samu labari
Ya ce ya ji “labarai masu tayar da hankali” game da yadda wasu matasan Najeriya ke shiga matsananciyar rayuwa har suke neman sayar da sassan jikinsu domin samun kuɗi.
Atiku ya ce abin da ya fi tayar masa da hankali shi ne rahotannin da ke cewa wasu matasa na sayar da sassan jikinsu, musamman ƙoda, saboda matsananciyar buƙatar kuɗi.
“Na ji labarai masu tayar da hankali game da irin yanayin da ake tura matasan Najeriya ciki domin kawai su tsira.”
“Wataƙila abin da ya fi ban tsoro shi ne rahotannin da ke ƙaruwa cewa matasa na sayar da sassan jikinsu, musamman ƙoda, saboda matsananciyar buƙatar samun kuɗi.” In ji shi.
Ya ƙara da cewa irin wannan yanayi ya kamata ya tayar da hankalin duk wani ɗan Najeriya mai kishin ƙasa.
Ya ambaci N1.7m kan ƙoda
Atiku ya yi iƙirarin cewa ana samun rahotannin matasan da ake tura su sayar da ƙodojinsu kan kuɗi kaɗan kamar Naira miliyan 1.7.
Kara karanta wannan
Atiku ya ɗauki alkawarin da zai faranta wa ɗaliban Najeriya rai kan kuɗin NELFUND
Sai dai bai danganta wannan adadi da wani rahoto ko wata hukuma ta musamman ba.
Har zuwa lokacin wallafa rahoton, ba a samu damar tabbatar da sahihancin wannan adadi daga wani tushe mai zaman kansa ba.
Ya ɗora alhakin lamarin kan tsadar rayuwa
Atiku ya danganta wannan yanayi da ƙarin tsadar rayuwa da ya ce manufofin tattalin arzikin gwamnatin Shugaba Bola Ahmed Tinubu suka haifar.
Ya lissafa abinci, sufuri, haya, kuɗin makaranta, magunguna da wutar lantarki a matsayin wasu daga cikin abubuwan da suka ƙara tsada ga talakawan Najeriya.
“A Najeriya ƙarƙashin Tinubu, kusan duk abin da ake buƙata domin rayuwa cikin mutunci yana ƙara tsada a kullum.” In ji shi.
Ya ƙara da cewa rahotannin matasan da ke sayar da ƙodojinsu kan N1.7m ya kamata ya karya zuciyar al’umma.
Atiku ya ce matsalar ta wuce talauci
Atiku ya ce matasan Najeriya ya kamata su kasance suna gina sana’o’insu, fara kasuwanci, kafa iyalai da kuma bin burinsu.
Ya ce bai kamata su riƙa tunanin nawa za a ba su idan suka sayar da wani ɓangare na jikinsu domin kawai su samu abin da za su rayu da shi ba.
A cewarsa, idan matasa suka fara kallon ƙodojinsu a matsayin hanyar samun kuɗin gaggawa, to matsalar ta wuce talauci da matsin tattalin arziki na yau da kullum.
Source: Facebook
Wike ya ce Atiku ba zai ci zabe ba
A wani labarin kuma, kun ji cewa ministan babban birnin tarayya Abuja, Nyesom Wike, ya bayyana cewa Atiku Abubakar, ba zai lashe zabe ba a 2027.
Wike ya ce burin Atiku na neman shugabancin ƙasar ƙarƙashin jam’iyyar African Democratic Congress (ADC) ya saɓa wa tsarin karba-karba na mulki tsakanin Arewa da Kudu.
Asali: Legit.ng
