Magana Ta Fito: Dalilin da Ya Sa Sojojin Amurka Za Su Janye daga Najeriya

• Rundunar sojin Najeriya ta ce janyewar kusan sojojin Amurka 200 ba ta nufin kawo ƙarshen haɗin gwiwar tsaro tsakanin ƙasashen biyu ba
• DHQ ta ce haɗin gwiwar Najeriya da Amurka kan leƙen asiri, horar da sojoji da musayar bayanai na nan daram
• Rundunar ta bayyana janyewar a matsayin sauyin da ya shafi wasu ayyuka na musamman, ba dakatar da hulɗar tsaro tsakanin ƙasashen biyu ba

​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja – Hedkwatar tsaro ta kasa (DHQ) ta yi magana kan janyewar sojojin Amurka daga Najeriya.

DHQ ta bayyana cewa shirin janye wasu sojojin Amurka daga ƙasar ba ya nufin cewa haɗin gwiwar tsaro tsakanin Najeriya da Amurka ya lalace ko ya zo ƙarshe ba ne.

Premium Times ta ce mai magana da yawun Hedikwatar Tsaro ta Najeriya (DHQ), Manjo Janar Samaila Uba, ne ya bayyana hakan a ranar Talata, 1 ga watan Satumban 2026 yayin wani taron tsaro da Cibiyar Yaƙi da Ta’addanci ta Ƙasa (NCTC) ta shirya.

Kara karanta wannan

Shirin dawo da tallafin man fetur ya firgita shugaban APC, ya fadi illar shirin Atiku

DHQ ta ce haɗin gwiwar tsaro na nan daram

Uba ya ce ya samu tambayoyi da dama daga ‘yan jarida game da rahotannin janyewar sojojin Amurka, lamarin da ya sa ya shirya bayani domin fayyace matsayar rundunar.

Ya ce rahoton cewa kusan jami’an Amurka 200 za su janye daga Najeriya bai kamata a fassara shi a matsayin rushewa ko kawo ƙarshen haɗin gwiwar tsaro tsakanin ƙasashen biyu ba.

“Rundunar Sojin Najeriya na son bayyana cewa rahoton janyewar kusan jami’an Amurka 200 bai kamata a fassara shi da cewa an samu matsala ko an kawo ƙarshen haɗin gwiwar tsaro tsakanin Najeriya da Amurka ba,” in ji Uba.

‘Dangantakar tsaro tana da ƙarfi’

Mai magana da yawun DHQ ya ce dangantakar tsaro tsakanin Najeriya da Amurka tana nan da ƙarfi, tana daɗewa kuma tana amfanar ƙasashen biyu, The Punch ta kawo labarin.

Ya bayyana cewa tura jami’an Amurka zuwa Najeriya yana da alaƙa da wasu ayyuka na musamman, musamman ayyukan yaƙi da ta’addanci.

Kara karanta wannan

Tirkashi: Rundunar sojojin Najeriya ta gamu da gagarumar matsala da aka yi mata kutse

Saboda haka, ya ce sauya yawan jami’an da ke ƙasar wani ɓangare ne na sauye-sauyen da ake samu yayin da manufofin ayyukan soji ke canzawa.

Leƙen asiri da horar da sojoji na ci gaba

Uba ya ce wasu muhimman fannoni na haɗin gwiwar Najeriya da Amurka za su ci gaba da gudana.

Daga cikin su akwai musayar bayanan sirri, horar da sojoji, taimakon fasaha da sauran hanyoyin ƙwarewar aikin soja.

Ya ce haɗin gwiwar na taimaka wa Najeriya wajen ƙarfafa ƙarfin jami’an tsaronta domin tunkarar ta’addanci da sauran barazanar tsaro da ta shafi ƙasashe da dama.

Rundunar ta yi kira ga jama’a

DHQ ta buƙaci ‘yan jarida da sauran jama’a da su guji fassara sauyin yawan jami’an sojin ƙasashen waje a matsayin alamar cewa haɗin gwiwar tsaro ko ƙarfin kare ƙasar ya durƙushe.

Uba ya ce sauyin jami’an Amurka wani tsari ne da ya shafi takamaiman ayyuka, kuma bai kamata a danganta shi da rushewar dangantakar tsaro tsakanin Najeriya da Amurka ba.

Sojoji sun kashe kwamandojin 'yan ta'adda

A wani labarin kuma, kun ji cewa dakarun sojoji sun kashe wasu manyan kwamandojin kungiyar ’yan ta’adda da ke ƙarƙashin jagorancin fitaccen ɗan bindiga, Kachalla Muhammadu Filani.

An kashe kwamandojin biyu, Hamisu, wanda aka fi sani da Mamiyo, da Umar Bocho, yayin wani samame da sojoji suka gudanar a kusa da ƙauyen Kogo da ke Ƙaramar Hukumar Matazu ta Jihar Katsina.

Asali: Legit.ng