Zaben Osun: Davido Ya Yi Magana kan Nasarar Kawunsa, Ya Cika da Murna

• Shahararren mawakin Afrobeats na Najeriya, David Adeleke, wanda aka fi sani da Davido, ya yi murnar nasarar kawunsa Ademola Adeleke a zaben gwamnan Osun
• Davido ya bayyana farin cikinsa jim kadan bayan INEC ta ayyana Ademola Adeleke a matsayin wanda ya lashe zaben
• Gwamnan ya samu kuri’u 511,067 inda ya doke dan takarar APC, Munirudeen Bola Oyebamiji, wanda ya samu kuri’u 444,815

​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Osun - Shahararren mawakin Afrobeats na Najeriya, David Adeleke, wanda aka fi sani da Davido, ya yi murnar nasarar kawunsa, Ademola Adeleke, a zaben gwamnan jihar Osun.

Davido ya taya Gwamna Adeleke murna bayan nasarar da ya samu a zaben gwamnan jihar Osun a ranar Asabar, 15 ga watan Agustan 2026.

Davido, wanda yana daga cikin fitattun ahalin Adeleke, ya yi murnar ne a shafinsa na X a ranar Lahadi, 16 ga watan Agustan 2026.

Kara karanta wannan

Zaben Osun: Gwamna Adeleke ya yi magana kan nasararsa, ya aika sako ga Tinubu

Davido ya taya Adeleke murna

Ya yi murnar nasarar zaben ne jim kadan bayan Hukumar Zabe Mai Zaman Kanta ta Kasa (INEC) ta ayyana gwamnan mai ci a matsayin wanda ya lashe zaben.

Mawakin ya kuma nuna goyon bayansa ga kawunsa a bainar jama’a tun lokacin kada kuri’a har zuwa tattara sakamakon zaben, inda ya yi amfani da shafukansa na sada zumunta wajen bayyana goyon bayansa yayin da tsarin zaben ke gudana.

A wani sako da ya wallafa tare da bidiyon kansa yana murnar sakamakon zaben, Davido ya rubuta:

"Mun yi nasara kawu!!! @aadeleke_01.”

Bidiyon ya nuna Davido cike da murna yayin da yake mayar da martani kan nasarar kawunsa, inda mawakin ya kasa boye yadda sakamakon ya shafe shi bayan ya fahimci muhimmancin nasarar.

Adeleke ya lashe zaben gwamnan Osun

Martanin Davido ya zo ne jim kadan bayan INEC ta ayyana Gwamna Ademola Adeleke na jam’iyyar Accord a matsayin wanda ya lashe zaben gwamnan jihar Osun da aka gudanar ranar Asabar.

Kara karanta wannan

Abin da Atiku ya ce duk da shan kayen dan takarar gwamnan ADC a zaben Osun

Adeleke ya samu kuri’u 511,067 inda ya doke babban abokin hamayyarsa, dan takarar jam’iyyar All Progressives Congress (APC), Munirudeen Bola Oyebamiji, wanda ya samu kuri’u 444,815.

Nasarar ta ba Adeleke damar sake samun wa’adi a matsayin gwamnan jihar Osun bayan zaben da aka fafata sosai.

Gwamnan mai ci, wanda ya tsaya takara a karkashin jam’iyyar Accord, ya doke Oyebamiji na APC, wanda ya samu kuri’u 444,815.

Adeleke ya yi nasara a kananan hukumomi 19, yayin da Oyebamiji ya yi nasara a kananan hukumomi 11.

Kananan hukumomin da Adeleke ya lashe

A cewar sakamakon da jami’in tattara sakamakon zaben ya sanar, Adeleke ya samu nasara a Ede North, Ede South, Ejigbo, Iwo, Egbedore, Ife North, Ife East, Ife Central, Oriade, Ifelodun, Orolu, Ayedaade, Ayedire, Odo Otin, Boluwaduro, Ilesa West, Ifedayo, Osogbo da kuma wani karin karamar hukuma.

Oyebamiji ya yi nasara a Irewole, Isokan, Olorunda, Atakumosa East, Atakumosa West, Ilesa East, Boripe, Irepodun, Obokun da sauran kananan hukumomin da aka sanar yayin tattara sakamakon.

Yayin da yake sanar da alkaluman karshe, Ogunwole ya ce adadin masu kada kuri’a da aka tantance ya kai 1,010,684, yayin da jimillar kuri’un da suka inganta ta kai 985,079.

Kara karanta wannan

Zaben Osun: Kananan hukumomin da Gwamna Adeleke da dan takarar APC suka lashe

Ya ce an soke kuri’u 20,721, lamarin da ya sanya jimillar kuri’un da aka kada ta kai 1,005,800.

An yi wa dan jarida duka a zaben Osun

A wani labarin kuma, kun ji cewa wasu magoya bayan jam’iyyar APC sun kai hari kan wani ɗan jarida a zaɓen gwamnan da ake yi a Osun.

Majiyoyi sun tabbatar da cewa lamarin ya faru ne a mazabar dan takarar gwamnan jam'iyyar APC, Bola Oyebamiji.

Asali: Legit.ng