A Karshe, Trump Ya Amince Iran Ta Mallaki Makamai Masu Karfin Gaske

• Bayan sulhu da tsayar da yaki, Shugaban Amurka, Donald Trump ya ce babu laifi kasar Iran ta mallaki makamai masu linzami masu cin dogon zango
• Rahotanni sun nuna cewa Donald Trump ya bayyana cewa makamai masu linzami ba su da haɗarin da makaman nukiliya ke da shi a duniyar yau
• Bugu da kari, Trump ya kafa hujja da cewa ba yadda za a hana Iran mallakar makaman alhali kasashen da ke kusa da ita sun mallaki irinsu

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

France - Shugaba Donald Trump ya ce Iran na iya mallakar makamai masu linzami masu cin dogon zango yayin da yarjejeniyar zaman lafiya ta fara aiki.

A ranar Laraba, Trump ya bayyana cewa ya kamata a bai wa Iran damar ci gaba da mallakar wasu makamai domin kare kanta daga barazana.

Kara karanta wannan

"Suna farin ciki": Shugaba Trump ya fadi nasarar da ya samu a Jamhuriyar Musulunci ta Iran

Maganar Donald Trump kan makaman Iran

Times of Israel ta wallafa cewa Trump ya fadi haka ne yayin da yake kare yarjejeniyar fahimtar juna da gwamnatinsa ta kulla da Tehran, jim kaɗan kafin yarjejeniyar ta fara aiki.

“Idan sauran ƙasashe suna da su, ba zai zama adalci ba a hana su mallakar wasu kaɗan,”

In ji Trump a Faransa, inda ya gudanar da taron manema labarai a gefen taron ƙasashen G7.

Ya kara da cewa:

“Idan Saudiyya da Qatar, da sauran ƙasashe suna da su, ina ganin bisa la’akari da daidaito, babu laifi Iran ma ta mallaki wasu makamai masu linzami masu cin dogon zango.”

“Makamai masu linzami ba su ne matsalar ba... Suna iya lalata wani ƙaramin wuri, amma ba sa iya tarwatsa duniya baki ɗaya (kamar yadda makaman nukiliya za su iya yi),”

In ji Trump.

Ya batun lalata makaman Iran?

Lalata shirin makamai masu linzami na Iran na daga cikin manufofin Isra’ila a lokacin da ta ƙaddamar da yaƙi da Jamhuriyar Musulunci tare da Amurka a ranar 28 ga Fabrairun 2026.

Kara karanta wannan

Sulhu tsakanin Iran da Amurka ya fusata Isra'ilawa, sun dura kan Netanyahu

Duk da cewa Amurka ta ɗauki lokaci tana bayyana ainihin manufofinta a yaƙin, ta dage cewa Iran na ƙoƙarin amfani da shirinta na makamai masu linzami a matsayin kariya domin hana sauran ƙasashe dakatar da ita daga ƙera makamin nukiliya.

Rage muhimmancin batun makamai masu linzami da Trump ya yi ya nuna wani sauyi a matsayin Amurka, duk da cewa ya bayyana cewa za a tattauna batun a zaman tattaunawar da ɓangarorin suka amince za su yi..

Batun nukiliyar Iran

Bayanan yarjejeniyar sun tabbatar da cewa takardar fahimtar juna ba ta tilasta wa Iran mika ajiyar uranium ɗinta ba, wanda za a iya amfani da shi wajen ƙera bama-baman nukiliya guda 11.

Maimakon haka, takardar ta nuna cewa Amurka da Iran sun amince za a warware batun ta wata hanya da za a tattauna cikin watanni biyu masu zuwa.

Al Jazeera ta wallafa bidiyon da Trump ya yi bayani a X:

Donald Trump ya soki Benjamin Netanyahu

A wani labarin, mun kawo muku cewa Shugaban Amurka, Donald Trump ya caccaki Benjamin Netanyahu game da kai hare-hare Lebanon.

Yayin da ya je taro Faransa, Trump ya bayyana cewa Isra'ila na kashe fararen hula a Lebanon da sunan yaki da kungiyar Hezbollah.

A kan haka ya ce yana ganin idan Netanyahu ba zai iya yakin ba tare da kashe mutane ba, zai mika ragamar aikin ga kasar Syria domin ta yi shi.

Wanda ya tantance Muhammad Malumfashi, babban edita a Legit.ng.

Asali: Legit.ng