Gwamnatin Borno Ta Yi Maganar Biyan Boko Haram Kudin Fansa kafin a Ceto Mutane 360

• Rundunar sojojin Najeriya ta bayyana cewa dakarunta sun samu nasarar ceto mutane 360 da 'yan ta'addan Boko Haram suka sace
• Biyo bayan ceto mutanen, an yi ta maganar cewa ko gwamnati ta biya kudin fansa kafin su kubuta daga hannun 'yan ta'addan
• Gwamnatin jihar Borno, ta fito ta yi martani kan ikirarin cewa sai da aka ba 'yan ta'addan kudade kafin su saki wadannan mutanen

​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Borno - Gwamnatin jihar Borno ta yi martani kan batun biyan kudin fansa kafin sako mutane 360 da 'yan Boko Haram suka sace.

Gwamnatin ta yi watsi da iƙirarin cewa an biya kuɗin fansa kafin a saki mutane 360 da aka sace daga Ngoshe a karamar hukumar Gwoza.

Usman Tar, kwamishinan yaɗa labarai da tsaron cikin gida, ya bayyana matsayar gwamnatin jihar a cikin shirin ‘Morning Brief’ na tashar Channels Tv ranar Litinin, 8 ga watan Yunin 2026.

Kara karanta wannan

Ndume: Sanata ya faɗi wurin da ya dace Amurka ta kafa sansanin soji a jihar Borno

Sojoji sun ceto mutane 360 a Borno

A ranar Lahaba, rundunar Operation Hadin Kai (OPHK) ta sanar da ceto mutanen da aka sacen daga sansanin ƙungiyar Jama’atu Ahlis Sunna Lidda’awati wal-Jihad (JAS).

A cikin wata sanarwa, Haruna Sani, mai riƙon muƙamin jami'in yaɗa labarai na OPHK, ya ce aikin, wanda ya haɗa da dakarun musamman a dakarun ɓangare na 1, ya biyo bayan makonni da dama na tattara bayanan sirri, binciken sirri na sa ido, da kuma tsara dabarun aiki.

Sani ya ce waɗanda abin ya shafa, waɗanda suka haɗa da maza, mata, da yara, an tsare su ne a ƙarkashin yanayi mai tsanani bayan an sace su daga al'ummomi da dama, musamman a cikin yankin Ngoshe.

Shin an ba Boko Haram kudin fansa

Usman Tar ya jaddada cewa aikin ya dogara ne kacokan a kan bayanan sirri kuma dakarun soja ne suka aiwatar da shi cikin kwarewa, tare da tallafi daga hukumar tsaron farin kaya (DSS).

Kara karanta wannan

Yadda sojoji suka yi wa 'yan Boko Haram dabara wajen ceto mutane 360 da aka sace a Borno

“Wane ne ya biya kuɗin fansar? Kuma wane ne aka biya kuɗin fansar? Ina hujjar?”

“Mu ne jami'ai da ke wajen. Babu wani biyan kuɗin fansa da aka yi. An gudanar da gagarumin aikin soja ne tare da tallafin bayanan sirri daga DSS wanda ya kai ga ceto fararen hula guda 360. Wannan ita ce gaskiyar da ke ƙasa. Idan akwai wasu hujjoji na daban, to ana iya kawo su.”

- Usman Tar

Kungiyar Boko Haram ta sauya salo

Kwamishinan ya bayyana cewa tawayen Boko Haram ya sauya salo fiye da asalin tushen akidar, inda ya zama wata sana'ar aikata laifuffuka da ke dorewa ta hanyar amfani da mutane da kuma garkuwa da su.

“Tawayen Boko Haram sakamako ne na akidar tunani ta wasu tsirarun mutane waɗanda suka fara fafutukar."

“Amma waɗannan mutanen sun tafi. Tawayen Boko Haram tun a lokacin ya sauya zuwa wata gagarumar sana'ar kasuwanci. Don haka wannan shi ne abin da ke faruwa a yanzu haka. Kuma babu wani bayani na daban.”

Kara karanta wannan

Gwamnatin Katsina ta yi magana kan sace Janar da matarsa, ta fadi kokarin da take yi

- Usman Tar

'Yan Boko Haram sun kashe sojoji

A wani labarin kuma, kun ji cewa yan ta'adda da ake zargin mayakan Boko Haram/ISWAP ne sun kashe sojoji a wani sansanin soja da ke Mandara-Girau, a karamar hukumar Biu ta jihar Borno.

'Yan ta'addan sun bude wa dakarun sojojin wuta ba zato ba tsammani a yayin da ruwan sama mai karfi ke sauka.

Wata majiya ta bayyana cewa sun kashe dakarun sojoji tara tare da jikkata wasu da dama. Sannan kuma sun datse kawunan wadanda aka kashe.

Wanda ya tantance Muhammad Malumfashi, babban edita a Legit.ng.

Asali: Legit.ng