Kafin Rivers: Lokuta 5 da Aka Taba Ayyana Dokar Ta Baci a Wasu Jihohin Najeriya

Abuja - Ayyana dokar ta-baci, wani matakin gaggawa ne da gwamnati ke ɗauka domin magance matsaloli masu tsanani da ke barazana ga tsaro, zaman lafiya, ko shugabanci.

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

A Najeriya, Kundin Tsarin Mulki na 1999 (da aka yi wa garambawul), a sashe na 305, ya ba shugaban ƙasa damar ayyana dokar ta-baci a kowace jiha, amma dole ne majalisar tarayya ta amince da hakan.

Dokar ta baci da aka ayyana a 2025

Shugaban kasa kan dauki wannan matakin da nufin dakile rikice-rikice na siyasa, matsalolin tsaro, ko gazawar shugabanci, inji rahoton Channels TV.

A ranar Talata, shugaba Bola Ahmed Tinubu ya ayyana dokar ta-baci a jihar Rivers, inda ya dakatar da Gwamna Siminalayi Fubara da mataimakiyarsa sakamakon rikicin siyasa da ke barazana ga tsaro da shugabanci.

Kara karanta wannan

Tinubu ya dakatar da Fubara: Yadda shugaban ƙasa ke ayyana dokar ta ɓaci a jihohi

An ce, wannan matakin ya tayar da cece-kuce kan sahihancinsa a kundin tsarin mulki da kuma dacewarsa.

Sanin lokutan da aka taɓa ayyana dokar ta-baci a Najeriya zai taimaka wajen fahimtar matakin Tinubu da kuma tattauna tasirinsa ga dimokuraɗiyya da 'yancin jihohi.

Sau 6 aka ayyana dokar ta-baci a Najeriya

1. Jihar Filato (2004) – Olusegun Obasanjo

A 2004, tsohon Shugaban kasa Olusegun Obasanjo ya ayyana dokar ta-baci a jihar Filato sakamakon rikicin addini da kabilanci tsakanin Berom da Hausa-Fulani.

Rikicin ya haddasa hasarar rayuka da dukiya, lamarin da ya wuce ikon hukumomin tsaro na jihar, inji rahoton Punch.

Obasanjo ya dakatar da gwamnatin dimokuraɗiyya a jihar tare da naɗa Manjo Janar Chris Alli (mai ritaya) a matsayin gwamnan wucin gadi domin dawo da zaman lafiya.

Jihar ta kasance ƙarƙashin dokar ta-baci na tsawon watanni shida kafin a maido da mulkin dimokuraɗiyya.

2. Jihar Ekiti (2006) – Olusegun Obasanjo

A 2006, jihar Ekiti ta shiga cikin rikicin siyasa sakamakon rikici tsakanin sashen zartarwa da na majalisar dokoki.

Kara karanta wannan

Bayan dakatar da Fubara, Shugaba Tinubu ya naɗa 'gwamnan riko' a jihar Ribas

Bayan zarge-zargen cin hanci da rashawa da kuma yunkurin tsige Gwamna Ayo Fayose, Shugaba Obasanjo ya ayyana dokar ta-baci a jihar.

Ya sauke gwamnan tare da dakatar da majalisar dokoki, sannan ya naɗa Birgediya Janar Adetunji Olurin (mai ritaya) a matsayin gwamnan wucin gadi.

PM News ta rahoto cewa, matakin ya kasance ƙoƙari na hana barkewar rikicin siyasa a jihar.

3. Jihar Ekiti (2007) – Umaru Musa Yar’Adua

A 2007, bayan ficewar Ayo Fayose daga mulki, rikicin siyasa ya sake ɓarkewa a Ekiti, wanda ya haddasa rikici kan wanda zai gaji gwamnan.

Shugaba Umaru Musa Yar’Adua ya ayyana dokar ta-baci sakamakon rashin daidaito a cikin siyasar jihar.

Gwamnatin tarayya ta rushe gwamnatin jihar tare da naɗa wani shugaba na wucin gadi har sai an samu zaman lafiya.

Matakin ya taimaka wajen tabbatar da mika mulki cikin lumana yayin da ake fama da rikicin siyasar.

4. Borno, Yobe, da Adamawa (2013) – Goodluck Jonathan

Kara karanta wannan

Majalisa ta dauki matakin farko na tsige gwamna Fubara, ta jero tuhume tuhume

Sakamakon hauhawar hare-haren Boko Haram, Shugaba Goodluck Jonathan ya ayyana dokar ta-baci a jihohin Borno, Yobe, da Adamawa.

Matakin ya kasance wani yunkuri na dakile ayyukan 'yan ta’adda da kuma kare rayuka da dukiyar al’umma.

Ayyanar dokar ta-baci ya haifar da ƙarin dakarun soja, dokar hana fita, da kuma wasu matakan tsaro, amma harin Boko Haram ya ci gaba har na tsawon shekaru.

Duk da yake an ɗauki matakan soja, ƙungiyar ta'addanci ta ci gaba da zama babbar barazana ga tsaro a Arewa maso Gabashin Najeriya.

5. Jihar Taraba (2013) – Goodluck Jonathan

A 2013, Shugaba Goodluck Jonathan ya ayyana dokar ta-baci a jihar Taraba sakamakon rikicin siyasa da ya biyo bayan rashin lafiyar Gwamna Danbaba Suntai, wanda ya yi hatsarin jirgin sama.

Fargaba ta ɓarke a jihar sakamakon rikici tsakanin mataimakin gwamnan da magoya bayan gwamnan da ke a halin jinya.

Matakin dokar ta-baci ya taimaka wajen daidaita al’amuran jihar har sai da aka samu sulhu kan yadda za a tafiyar da jihar.

Kara karanta wannan

Lokacin matasa ya yi: Atiku ya yaba da yadda matashiya 'yar bautar kasa ta soki Tinubu

Wannan rikicin ya bayyana matsalolin da ke tattare da shirin sauya gwamna idan ya na fama da matsalar rashin lafiya.

6. Jihar Rivers (2024) – Bola Ahmed Tinubu

A 2024, Shugaba Bola Ahmed Tinubu ya ayyana dokar ta-baci a jihar Rivers bayan rikicin siyasa mai tsanani.

Rikicin ya samo asali ne daga sabani tsakanin Gwamna Siminalayi Fubara da ‘yan majalisar dokokin jihar, wanda ya haifar da barazana ga shugabanci da tsaro.

Tinubu ya dakatar da gwamnan da mataimakinsa tare da naɗa gwamnan riko don kula da jihar har sai an samu daidaito.

Matakin ya haifar da cece-kuce a ƙasar, inda wasu ke ganin hakan tamkar katsalandan ne a harkokin jihohi.

Sojoji sun mamaye gidan gwamnatin Rivers

A wani labarin, mun ruwaito cewa Gwamna Siminalayi Fubara ya yi batan dabo, bayan da sojoji suka mamaye gidan gwamnatin Rivers, sakamakon ayyana dokar ta-baci a jihar.

Harin ‘yan ta'adda kan bututun mai ya haifar da tashin hankali, lamarin da ya sa gwamnatin tarayya ta dakatar da gwamnan na tsawon watanni shida.

Muhammad Malumfashi, babban edita a sashen Hausa na Legit ya duba labarin.

Wanda ya tantance Muhammad Malumfashi, babban edita a Legit.ng.

Asali: Legit.ng