Tinubu Ya Kori Manyan Shugabannin Hukumomi 4, Ya Maye Gurbinsu Nan Take

• Shugaban kasa, Bola Tinubu ya yi sabbin nade-nade inda ya sallami shugabannin hukumomin FAAN da NAMA
• Tinubu ya kori Kabir Mohammed a matsayin shugaban hukumar FAAN inda ya maye gurbinsa da Olabunmi Kuku
• Shugaban ya kuma sallami Tayyib Odunowo a matsayin shugaban hukumar NAMA tare da nada Umar Farouk a madadinsa

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

FCT, Abuja – Shugaba Tinubu ya sallami shugaban Hukumar Kula da Jiragen Sama (FAAN), Kabir Mohammed.

Shugaban ya kuma kori Tayyib Adetunji Odunowo a matsayin shugaban hukumar NAMA, cewar TheCable.

Yaushe Tinubu ya yi sabbin nade-naden?

Wannan na kunshe ne a cikin wata sanarwa da hadimin shugaban a bangaren yada labarai, Ajuri Ngelale ya fitar a yau Laraba 13 ga watan Disamba.

Kara karanta wannan

Kasa da awa 24 bayan Tinubu ya kori shugabannin hukumomi, ya sake korar daraktocin da Buhari ya nada

Ngelale ya ce Tinubu ya nada Olabunmi Kuku a matsayin wanda zai maye gurbin Kabir a hukumar FAAN.

Har ila yau, shugaban ya nada Umar Farouk a matsayin wanda zai maye gurbin Odunowo a hukumar NAMA.

Sabbin nade-naden za su fara aiki ne nan take kamar yadda sanarwa ta tabbatar, Legit ta tattaro.

Sauran wadanda aka sallama a hukumominsu

Sanarwar ta ce:

"Shugaba Tinubu ya amince da dakatarwa da sallama da kuma nadin shugabannin wadannan hukumomi da ke ma'aikatar kula da jiragen sama."

Shugaban ya kuma amince da nadin Alex Badeh Junior a matsayin shugaban hukumar NSIB bayan ya sallami Akinola Olateru a matsayin shugaban hukumar.

Sanarwar ta kara da cewa:

"Tinubu ya sallami shugaban hukumar NIMET, Mansur Bako Matazu inda ya maye gurbinsa da Charles Anosike a matsayin babban daraktan hukumar.

Kara karanta wannan

Babban magana: Obasanjo ya nemi bayar da shaida kan tsohon ministan da EFCC ke nema ruwa a jallo

Tinubu ya shiga tsakani a rikicin Ondo

A wani labarin, Shugaban kasa, Bola Tinubu ya sake shiga tsakani kan rikicn siyasa a jihar Ondo da ta ki ci ta ki cinyewa.

Wannan shi ne karo na biyu da shugaban ke saka baki amma a karon farko da ya shiga ba a samu abin da ake bukata ba.

Wannan na zuwa ne yayin da rikicin siyasar jihar ke kara kamari a jihar tun bayan rashin lafiyar Gwamna Rotimi Akeredolu.

Asali: Legit.ng