Magana Ta Fito: An Gano Waɗanda Matashi Ya Yi Niyyar Kashewa a Harin Amurka
- Matashin da ya kai hari wajen liyafa a Washington ya yi magana bayan cafke shi da jami'an tsaro suka yi a yau Lahadi
- Maharin ya bayyana waɗanda ya yi yunƙurin kashewa yayin harin da ya tayar da hankula da martani daga kasashen duniya
- Rahotanni sun nuna cewa ya zo da makamai da dama, ya yi kokarin shiga cikin dakin taro amma jami’an tsaro sun dakile shi kafin ya aikata mummunar barna
CHECK OUT: How to Start Earning with Copywriting in Just 7 Days – Even if You’re a Complete Beginner
Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.
Washington DC, US - Wani mutum mai suna Cole Tomas Allen, mai shekaru 31, ya kai hari wajen wani taro a Washington, inda ya nufi jami’an gwamnatin Donald Trump.
Rahotanni sun ce Allen ya shaida wa ‘yan sanda cewa yana son kai farmaki kan jami’an gwamnati da ke cikin liyafar da aka shirya a otel din Washington Hilton.
Source: Getty Images
Sai dai jami’an tsaro sun bayyana cewa ba a tabbatar da cewa yana son kashe Trump kai tsaye ba, amma yana kokarin kai hari ga duk wanda ya samu, cewar New York Post.
Yadda matashi ya kutsa fadar White House
Wani jami’in tsaro ya ce Allen na kokarin kutsawa cikin taron ne domin ya kai hari ba tare da la’akari da wanda zai samu ba.
Mataimakin daraktan Secret Service ya ce harin na iya zama babban bala’i na kasa, amma tsaron da aka tanada ya dakile shirin tun farko.
Rahotanni sun bayyana cewa Allen ya zo da bindiga, wuka da sauran makamai, inda ya yi kokarin shiga cikin dakin taro mai dauke da mutane kusan 2,500.
An ce ya samu shiga otel din ne bayan ya biya kudin daki, sannan ya boye makamai kafin daga bisani ya fito da su domin kai hari.
Harin ya faru ne bayan mintuna 20 da shiga Shugaba Trump da matarsa Melania, inda jami’an tsaro suka fitar da su cikin gaggawa.
Source: Getty Images
Harin ya jikkata wani jami'in DSS
Wani jami’in DSS ya jikkata yayin musayar wuta, amma an kai shi asibiti kuma yana cikin yanayi mai kyau kamar yadda Trump ya bayyana.
An tuhumi Cole Allen da amfani da makami wajen aikata laifi da kuma kai hari ga jami’in gwamnati, yayin da bincike ke ci gaba da gano dalilin harin.
Jami’ai sun ce Allen ya yi tafiya daga Los Angeles zuwa Washington ta jirgin kasa, kuma ana duba ko hakan yana da alaka da kokarinsa na boye motsinsa.
Trump ya bayyana cewa bai yi imanin harin yana da alaka da rikicin Amurka da Isra’ila da Iran ba, yana mai cewa hakan ba zai hana shi ci gaba ba.
Netanyahu ya yi fusata da hari kan Trump
An ji cewa shugabannin duniya sun nuna goyon baya ga Donald Trump bayan harin bindiga a liyafar manema labarai ta Fadar White House
Firaministan Isra’ila Benjamin Netanyahu da wasu shugabanni sun bayyana firgici kan harin, suna yaba wa jami’an tsaro kan gaggawar dakile maharin.
Shugabannin kasashe kamar Indiya, Pakistan da Taiwan sun yi Allah wadai da tashin hankali a siyasa, suna addu’ar samun lafiya ga jami’in dan sanda da ya jikkata.
Asali: Legit.ng
