Atiku da Amaechi Sun Dura Jihar Sakkwato domin Kaddamar da Yakin Neman Zaben ADC
- Ɗan takarar shugaban ƙasa na ADC, Atiku Abubakar, da abokin takararsa, Rotimi Amaechi, sun isa Sakkwato domin ƙaddamar da yakin neman zabe
- Isowar Atiku ta haddasa cunkoson ababen hawa a manyan tituna da kewayen shiga birnin Sakkwato
- An tura jami’an tsaro zuwa muhimman wurare yayin da ake fargabar rikici kan rufe ofishin kamfen jam’iyyar ADC da zargin kai hare-hare ga magoya bayanta
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Sokoto, Nigeria - Ɗan takarar shugaban ƙasa na ADC, Atiku Abubakar, abokin takararsa, Rotimi Amaechi, da wasu manyan jiga-jigan jam’iyyar sun isa Jihar Sakkwato.
Hakan na zuwa ne yayin da Atiku Abubakar ke shirin ƙaddamar da yakin neman zabensa a babban zaben shugaban kasa na 2027.
Source: Facebook
Atiku da Amaechi ya isa Sakkwato
Daily Trust ta rahoto cewa Atiku da Amaechi sun iso ne a jiragen sama daban-daban, inda tsohon Ministan Sufuri, Amaechi, ya sauka kafin ɗan takarar shugaban ƙasar ya karasa.
A halin yanzu, suna kan hanyarsu ta zuwa sakatariyar ADC ta jihar Sokoto da ke kan titin Ilorin, cikin ayarin motocin da magoya baya ke rakiyarsu, suna ɗauke da tutocin jam’iyyar da fastocin kamfen.
Zuwan tsohon mataimakin shugaban ƙasar ya haddasa cunkoson ababen hawa a tituna da kewayen ƙofar Sakkwato, yayin da magoya bayansa suka fito domin tarbarsa.
Jaridar Leadership ta gano cewa bikin ƙaddamar da kamfen ɗin zai gudana ne da ƙarfe 5:000 na yamma a ofishin ADC da ke Sakkwato.
Hakan na zuwa ne daidai lokacin da ake fama da tashin hankali kan rufe ofishin kamfen ɗin jam’iyyar ADC da kuma zargin kai hare-hare ga magoya bayanta cikin sa’o’i 48 da suka gabata.
ADC ta dage kan kaddamar da kamfe
Duk da wannan lamari, shugaban ADC na jihar, Alhaji Bello Muhammad Goronyo, ya dage cewa za a gudanar da taron kamar yadda aka tsara. Ya bayyana rufe ofishin a matsayin “ƙoƙarin tsoratar da ’yan adawa”.
Tsohon mataimakin shugaban ƙasar ya samu rakiyar manyan jiga-jigan jam’iyyar, ciki har da tsohon gwamnan Jihar Sakkwato, Sanata Aminu Waziri Tambuwal, Sanata Abdul Ningi da ɗan takarar gwamnan ADC a jihar, Hon. Manir Muhammad Dan’iya.
Legit Hausa ta gano cewa an tura jami’an tsaro zuwa muhimman wurare a cikin birnin Sakkwato domin tabbatar da zaman lafiya da kiyaye doka da oda.
Rundunar ’yan sandan jihar ta ce ta ɗauki matakan da suka dace domin tabbatar da gudanar da taron cikin kwanciyar hankali.
ADC, wadda gamayyar shugabannin jam’iyyun adawa suka yi hadaka a ciki, ta zaɓi Sakkwato a matsayin ɗaya daga cikin jihohin farko da za ta ƙaddamar da kamfen ɗin takarar shugaban ƙasa a shiyyar Arewa maso Yamma.
Karin bayani na tafe...
Asali: Legit.ng
