Bayan Kalaman El Rufai game da Komawa SDP, Buhari Ya Fadi Matsayarsa a APC

• Tsohon Shugaban Kasa Muhammadu Buhari ya jaddada cewa har yanzu shi 'dan jam’iyyar APC kuma yana son a rika kiransa da hakan
• Muhammadu Buhari ya ce ba zai taba juyawa jam’iyyar baya ba, domin ita ce ta ba shi damar shugabanci kasar nan har sau biyu
• Ya ce ya na matukar godiya da irin goyon bayan da APC ta ba shi tun kafin ya zama shugaban kasa har zuwa karshen mulkinsa
• Buhari ya jinjinawa wadanda suka kafa jam’iyyar, ya ce sadaukarwar da suka yi domin kare dimokuradiyya na da matukar muhimmanci

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

FCT, Abuja - Tsohon Shugaba Muhammadu Buhari ya yi magana kan matsayarsa game da jam'iyyar APC.

Buhari ya sake jaddada cewa har yanzu shi mamba ne na jam’iyyar kuma yana so a kira shi da hakan.

Kara karanta wannan

"Na san waɗanda suka biya kuɗi kafin a naɗa su minista," El Rufai ya tona asiri

El-Rufai ya fadi yadda suka yi da Buhari

Hadimin Buhari a bangaren sadarwa, Garba Shehu shi ya bayyana hakan a yau Alhamis 13 ga watan Maris, 2025 a shafin X.

Hakan ya biyo bayan kalaman Nasir El-Rufai da yake fadin yadda suka yi da tsohon shugaban kasa, Muhammadu Buhari a gidansa kafin komawa SDP.

Malam Nasir El-Rufai ya tabbatar da cewa da sanin tsohon shugaban ƙasa, Muhammadu Buhari ya fice daga APC zuwa SDP.

El-Rufai ya ce ya je har gida, ya faɗa wa Buhari cewa ga shirin da yake yi na barin APC kuma ya amince da hakan.

Tsohon gwamnan ya ce Buhari ne mai gidansa na farko a siyasa kuma ba ya ɗaukar kowane irin mataki tun yana gwamna sai ya tuntuɓe shi.

Buhari ya fadi matsayarsa game da APC

Tsohon shugaban ya ce yana so ya tabbatar wa kowa cewa ba zai taba juya wa jam’iyyar baya ba, wadda ta ba shi damar mulki sau biyu.

Kara karanta wannan

"Jonathan ya yi bankwana da siyasa," PDP ta magantu kan fito da shi takara

Buhari ya ce:

“Ni mamba me na APC kuma ina son a rika kirana haka, zan yi iya kokarina wajen tallata jam’iyyar ta kowane hali.”

Ya kara da cewa a yanzu babu abin da yake da shi sai godiya ga goyon bayan da jam’iyyar ta ba shi kafin da lokacin mulkinsa.

Buhari ya ce wannan goyon bayan da ya samu a matsayin shugaban kasa, shi ne mafi girma a rayuwarsa, kuma ba zai bukaci wani abu fiye da haka ba.

Ya bayyana cewa wahalhalun da wadanda suka kafa jam’iyyar suka sha don samar da tsayayyen tsarin kare kundin tsarin mulki da dimokuradiyya abin yabo ne.

Sowore ya zargi Buhari da kisan gilla

Kun ji cewa tsohon dan takarar shugaban kasa, Omoyele Sowore ya zargi Nasir El-Rufai da hannu a kisan fiye da 'yan Shi’a 300 a 2015.

Omoyele Sowore ya bukaci a gurfanar da El-Rufai, Muhammadu Buhari da Tukur Buratai a gaban kotun ICC saboda zargin laifuffukansu.

Kara karanta wannan

El Rufai ya bayyana yadda suka yi da Buhari kan batun ficewarsa daga APC zuwa SDP

Ɗan gwagwarmaya kuma 'dan siyasar ya caccaki masu murna da sauya shekar da El-Rufai ya yi daga jam’iyyar APC zuwa SDP mai adawa.

Muhammad Malumfashi, babban edita a sashen Hausa na Legit ya duba labarin.

Wanda ya tantance Muhammad Malumfashi, babban edita a Legit.ng.

Asali: Legit.ng