Jami'an NDLEA Sun Kama Wata Mata Dauke da Alburusan AK-47 a Hanyar Abuja
- NDLEA ta kama wata mata mai suna Aisha Isah da alburusai 266 na bindigar AK-47 a wani shingen bincike a kan hanyar Abuja zuwa Kaduna
- Hukumar ta kuma kama wasu mutane da ake zargi da safarar miyagun ƙwayoyi tare da kwace tabar wiwi da wasu magunguna a jihohin Kano, Sokoto, Edo da Ondo
- A Edo, jami’an NDLEA tare da sojoji sun lalata gonar tabar wiwi mai girman hekta 1.646 wadda aka kiyasta za ta iya samar da kilogram 4,115.53 na tabar wiwi
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Jami’an Hukumar Hana Sha da Fataucin Miyagun Ƙwayoyi ta Najeriya (NDLEA) sun kama wata mata mai suna Aisha Isah da alburusai 266 na bindigar AK-47 a kan babbar hanyar Abuja zuwa Kaduna.
An kama matar ne a wani shingen binciken ababen hawa da ke kan hanyar yayin da jami’an hukumar ke gudanar da sintiri.
Daraktan yaɗa labarai da wayar da kan jama’a na NDLEA, Femi Babafemi, ne ya bayyana hakan a cikin wata sanarwa da ya fitar ranar Lahadi.
Sai dai hukumar ba ta bayyana inda Aisha ta taso ba, inda take shirin zuwa ko kuma yadda aka gano alburusai a hannunta.
Source: UGC
Haka kuma, sanarwar ba ta bayyana ko an gurfanar da ita a gaban kotu ko kuma an miƙa ta ga wata hukumar tsaro domin ci gaba da bincike ba.
An kama dattijo da magunguna a Zaria
A wani samame daban da aka gudanar a kan hanyar Zaria zuwa Kano, jami’an NDLEA sun kama wani mutum mai shekara 68 mai suna Ifeanyi Egwolonwu a Gwargwaje da ke Zaria.
Hukumar ta ce an same shi da kwalabe 2,770 na allurar pentazocine, kwalabe 100 na allurar diazepam, ƙwayoyin diazepam 11,000 da kuma ƙwayoyin Exol-5 guda 4,500.
An kama masu safarar ƙwayoyi a Kano
A Jihar Kano, jami’an NDLEA sun kama wasu mutane biyu, Ziya’ulhaq Abdullahi mai shekara 35 da Garba Muhammed mai shekara 52, a yankin Dorayi ranar 28 ga Oktoba.
Ana zargin mutanen biyu da mallakar ƙwayoyin tramadol guda 19,250 masu nauyin kilogram 13.6.
A wani samame da aka kai Tashan Banke, hukumar ta kama wasu mutane bakwai da ake zargi, ciki har da Faisal Adamu.
Jami’an sun kuma kwace tabar wiwi mai nauyin kilogram 178.85 tare da wasu ƙwayoyin diazepam, tramadol, Exol-5 da pregabalin.
An kama dattijo da tabar wiwi a Sokoto
A Jihar Sokoto, NDLEA ta sanar da kama wasu mutane biyu. Ɗaya daga cikinsu shi ne Ibrahim Ayuba mai shekara 68, wanda aka kama ranar Asabar, 31 ga Oktoba, da tabar wiwi mai nauyin kilogram 236.6.
A Jihar Edo, jami’an NDLEA tare da taimakon sojoji sun kai samame sansanin Eko Camp da ke Ilushi, a ƙaramar hukumar Esan ta Kudu maso Gabas, ranar 28 ga Oktoba.
Samamen ya kai ga lalata gonar tabar wiwi mai girman hekta 1.646, wadda hukumar ta kiyasta za ta iya samar da kilogram 4,115.53 na tabar wiwi.
A yayin aikin, an kama wata mata mai shekara 50 mai suna Christiana Uboi da tabar wiwi da aka sarrafa mai nauyin kilogram 301. Jami’an sun kuma kwace wasu kilogram 176 na tabar wiwi a wurin.
An kama mutane hudu a Ondo
A Jihar Ondo, jami’an NDLEA sun kama mutane huɗu yayin samamen da suka kai gonakin tabar wiwi da ke Dajin Ijare ranar 25 ga Oktoba.
Hukumar ta ce jami’an sun kwace buhuna 16 na tabar wiwi da aka sarrafa, masu nauyin kilogram 180.
Ba a bayyana cikakken bayani kan alburusai ba
Duk da sanar da kama Aisha Isah da alburusai 266 na AK-47, NDLEA ba ta bayyana ƙarin bayanai kan yadda aka gano su ko dalilin da ya sa take ɗauke da su ba.
Haka kuma, hukumar ba ta bayyana ko akwai wata alaƙa tsakanin wannan kamu da ayyukan safarar miyagun ƙwayoyi da ta gudanar a wasu sassan ƙasar ba.
Bayanan da hukumar ta fitar sun fi mayar da hankali kan kamen da ta yi da kuma kayan da ta kwace a jihohi daban-daban.
Asali: Legit.ng
