Dakarun Sojoji Sun Gwabza da 'Yan Ta'addan Boko Haram, an Samu Nasara kan Miyagu

• Dakarun sojojin Najeriya sun fuskanci hari daga ƴan ta'addan Boko Haram a wani shingen bincikensu da ke jihar Adamawa
• Sojojin tare da haɗin gwiwar ƴan sanda da sauran jami'an tsaro sun yi nasarar daƙile harin ƴan ta'addan
• Bayan an yi gumurzu na wani lokaci, jami'an tsaron sun tilastawa ƴan ta'addan tserewa zuwa cikin daji

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Adamawa - Dakarun sojojin Najeriya sun samu nasarar daƙile wani hari da ƴan ta’addan Boko Haram suka kai a jihar Adamawa.

Ƴan ta'addan na Boko Haram sun kai harin ne kan wani shingen bincike na sojoji da ke garin Garkida, cikin ƙaramar hukumar Gombi a jihar Adamawa.

Masani kan harkokin tsaro a yankin Tafkin Chadi da Arewacin Najeriya, Zagazola Makama, ya bayyana hakan a shafinsa na X.

Kara karanta wannan

Sojoji sun gwabza fada da 'yan bindiga, sun hallaka miyagu a Zamfara

Ƴan Boko Haram sun farmaki sojoji

Majiyoyi sun bayyana cewa harin ya faru ne a daren ranar Juma’a, 15 ga watan Maris, da misalin ƙarfe 1:05 na dare.

Rahotanni sun nuna cewa ƴan ta’addan sun yi ƙoƙarin kutsawa ta shingen binciken da ake kira Iron Gate, inda suka yi yunƙurin kai hari ga sojojin da ke bakin aiki.

Sai dai, dakarun sojojin Najeriya tare da hadin gwiwar ƴan sanda masu sintiri na musamman da kuma ƴan sa-kai na yankin sun ɗauki matakin gaggawa domin daƙile farmakin.

Wannan gaggawar ɗaukar matakin ta tilastawa maharan janyewa tare da tserewa daga yankin ba tare da samun wata nasara ba.

Bisa ga rahoton da hukumomin ƴan sanda suka fitar, ba a samu asarar rai ko jikkata daga ɓangaren jami’an tsaro ko fararen hula ba.

Wannan yana nufin cewa harin bai jawo ɓarna ga rayuka ko dukiyoyin jama’a ba, wanda hakan ya zama wata gagarumar nasara ga jami’an tsaro.

Kara karanta wannan

Katsina: Sojojin sama sun ragargaji 'yan bindiga, sun hallaka miyagu masu yawa

Duk da cewa harin ya tayar da hankula a cikin garin Garkida, amma bayan da sojoji suka yi nasarar fatattakar ƴan ta’addan, an samu dawowar zaman lafiya cikin gaggawa.

Mazauna yankin sun koma gudanar da harkokinsu na yau da kullum ba tare da wata fargaba ba.

Jami'an tsaro sun ɗauki matakai

A halin yanzu, dakarun sojoji sun ƙara ƙarfafa matakan tsaro a yankin domin hana sake aukuwar irin wannan hari.

Jami’an tsaro sun faɗaɗa sintirinsu, inda ake gudanar da bincike da duba yankunan da ke kewaye da Garkida domin tabbatar da cewa babu wata barazana daga ƴan ta’adda.

Gwamnati da hukumomin tsaro sun yi alkawarin ci gaba da daukar matakan kariya domin tabbatar da cewa al’ummar yankin suna cikin kwanciyar hankali.

Sojoji sun kuma gargadi mazauna yankin da su kasance masu lura tare da gaggauta kai rahoto idan sun ga wani abu da ba su yarda da shi ba domin hana sake faruwar irin wannan hari.

Kara karanta wannan

Yan bindiga sun sace matashin da ya lashe gasar Kur'ani bayan ya gana da gwamna

Wannan nasara ta kara karfafa gwiwar jami’an tsaro da kuma al’ummar yankin wajen yaƙi da ayyukan ƴan ta’adda a yankin Arewa maso Gabas.

Sojoji sun daƙile harin ƴan bindiga

A wani labarin kuma, kun ji cewa dakarun sojojin Najeriya sun samu nasarar daƙile wani harin ta'addanci na ƴan bindiga a jihar Zamfara.

Sojojin sun daƙile harin ne a garin Mada cikin ƙaramar hukumar Gusau, inda suka yi nasarar hallaka ƴan bindiga mutum huɗu.

Asali: Legit.ng