Tashin Hankali Yayin da Gwamnan PDP Ya Sanya Dokar Hana Fita, Bayanai Sun Fito

• An samu ɓarkewar rikici a tsakanin ƙauyukan Ilobu da Ifon na jihar Osun a ranar Litinin, 29 ga watan Janairu
• Sabon rikicin wanda ya ɓarke a tsakanin ƙauyukan biyu ya sanya Gwamna Adeleke na jihar sanya dokar hana fita a ƙauyukan
• Rikicin dai wanda ya ɓarke ya jawo asarar rayukan mutum biyu yayin da ƴan sanda suka cafke wasu mutum da ake zargi akwai hannunsu a rikicin

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Osun - Gwamnan jihar Osun, Ademola Adeleke, ya sake sanya dokar hana fita daga ƙarfe 6:00 na yamma zuwa karfe 6:00 na safe a ƙauyukan Ilobu da Ifon, biyo bayan sabon rikici da ya ɓarke a garuruwan.

Ya kuma kafa rundunar haɗin gwiwa tare da tura jami’an tsaro ciki har da sojoji zuwa ƙauyukan da a ke rikicin, cewar rahoton The Punch.

Kara karanta wannan

Gwamnan PDP ya fusata, ya sanya dokar kulle a garuruwa biyu bayan faɗa ya kaure

Gwamnan ya bayyana hakan ne a wata sanarwa da kwamishinan yaɗa labarai da wayar da kan jama’a, Kolapo Alimi, ya fitar ranar Talata, 30 ga watan Janairun 2024, rahoton jaridar Vanguard ya tabbatar.

Meyasa aka sanya dokar hana fitan?

Ƴan bindiga daga ƙauyukan Ilobu da Ifon sun sake fafatawa a ƙauyukan waɗanda ke kan iyakar jihohin Osun da Oyo a ranar Litinin.

Ƴan sanda sun tabbatar da mutuwar mutum biyu tare da lalata dukiyoyi a rikicin da ya ɓarke.

Kafin rikicin baya-bayan nan dai, Adeleke a watan Oktoban shekarar da ta gabata ya sanya dokar hana fita a tsakanin ƙauyukan biyu bayan ɓarkewar ƙazamin rikici.

Sai dai an dage dokar hana fitan a watan Disamba bayan dawowar zaman lafiya a yankin.

Sai dai a ranar Litinin rikici ya sake ɓarkewa, lamarin da ya sa mazauna yankin da dama suka tsere.

Kara karanta wannan

"Idan ba za ka iya ba ka sauka": Atiku ya caccaki Tinubu kan abu 1 tak

Ƴan sanda sun yi kame

A halin da ake ciki, rundunar ƴan sandan jihar Osun ta ce jami’anta sun kama wasu mutum biyu da ake zargi da hannu a rikicin da ya ɓarke tsakanin Ifon da Ilobu.

Wata sanarwa da mai magana da yawun rundunar, Yemisi Opalola, ya fitar, yayin da yake kira da a kwantar da hankula, ta ce an tura jami’an tsaro a yankin domin dawo da zaman lafiya.

Gwamnan Plateau Ya Sa Dokar Hana Fita

A baya rahoto ya zo cewa gwamnan jihar Plateau, Caleb Mutfwang, ya sanya dokar hana fita ta tsawon sa'o'i 24 a ƙaramar hukumar Mangu ta jihar.

Gwamnan ya ɗauki wannan matakin ne biyo bayan sabon rikicin da ya ɓarke a ƙaramar hukumar.

Asali: Legit.ng