Jerin tafiye-tafiye 9 da shugaba Buhari ya yi zuwa kasashen waje a shekarar 2021

Jerin tafiye-tafiye 9 da shugaba Buhari ya yi zuwa kasashen waje a shekarar 2021

Shugaban kasa Muhammadu Buhari ya ci gaba da tafiye-tafiyen da yake yi a kasashen waje wadanda suka zama wani muhimmin bangare na diflomasiyyar Najeriya da huldar kasashen duniya.

Ya zuwa watan Disamba a shekarar 2021, shugaba Buhari ya yi tafiya akalla sau tara zuwa kasashen waje.

Duk da cewa a baya fadar shugaban kasar ta bayyana wadannan tafiye-tafiyen a matsayin masu muhimmaci, ‘yan Najeriya da dama sun ce shugaban zai iya tura wakilai.

Yawancin 'yan kasar na da ra'ayin cewa hakan zai rage kashe kudi da kuma baiwa Buhari karin lokaci domin halartar muhimman batutuwan da suka shafi kasa.

Jerin tafiye-tafiyen da Shugaba Buhari ya yi zuwa kasashen waje a shekarar 2021
Shugaba Buhari zai shiga jirgi | Hoto: bbc.com
Asali: UGC

A duk lokacin da Buhari ya yi irin wadannan tafiye-tafiye, yakan tafi tare da rakiyar jami’an gwamnati da suka hada da masu daukar hoto, jami’an tsaro, da mataimakansa a harkokin yada labarai daban-daban.

Kara karanta wannan

Dirarsa ke da wuya, Shugaba Buhari ya gana da Shugaban kasar Turkiyya

Shin kana da labarin da ka/ki ke son an wallafa ma ka/ki? Ka tuntubemu a info@corp.legit.ng!

Legit.ng ta kawo muku jerin tafiye-tafiyen da shugaban kasar ya yi zuwa kasashen duniya a shekarar 2021.

1. Burtaniya karo na farko

A ranar 30 ga watan Maris ne shugaba Buhari ya tashi zuwa birnin Landan domin duba lafiyarsa kuma ya dawo mako na biyu na watan Afrilu.

Wannan ita ce ziyarar jinya ta farko da shugaban na Najeriya ya kai kasar waje tun bayan barkewar cutar Korona.

A watan Yuli, shugaban ya sake tafiya Landan, wannan lokacin don halartar taron koli na Ilimi na Duniya na GPE 2021-2025.

Bayan kammala taron ilimi Buhari ya shafe lokaci a Landan domin duba lafiyarsa. Ya dawo mako na biyu na watan Agusta.

2. Kasar Amurka

A watan Satumba, shugaba Buhari ya halarci taro na 76 na Majalisar Dinkin Duniya (UNGA76).

Ya yi jawabi ga shugabannin kasashen duniya a ranar Juma’a, 24 ga watan Satumba, inda ya yi jawabi kan taken taro da sauran batutuwan duniya.

Kara karanta wannan

Matasan Arewa ga Obasanjo: Kai dai ba ka da bakin sukar gwamnatin shugaba Buhari

3. Kasar Habasha

A farkon watan Oktoba shugaba Buhari ya je kasar Habasha inda ya halarci bikin rantsar da Firayim Minista, Abiy Ahmed.

Buhari wanda ya bar Abuja zuwa babban birnin kasar Habasha a ranar Lahadi, 3 ga watan Oktoba, ya shafe kwanaki uku a kasar dake gabashin Afrika.

4. Kasar Saudiyya

A ranar Litinin, 25 ga watan Oktoba, shugaba Buhari ya tafi kasar Saudiyya, domin halartar taron zuba hannun jari da kuma aikin Umarah.

Shugaba Buhari ya dawo Najeriya tare da mukarrabansa a ranar Juma'a 29 ga watan Oktoba.

5. Burtaniya karo na biyu

Bayan dawowarsa daga Umrah a kasar Saudiyya ranar Juma'a 29 ga watan Oktoba, Shugaba Buhari ya cilla zuwa Burtaniya a karo na biyu a 2021 ranar 31 ga watan Oktoba.

Shugaban ya sauka a birnin Glasgow, Scotland ne don halartan taron COP26 na taron gangamin majalisar dinkin duniya kan sauyin yanayi.

Kara karanta wannan

Kawai ka alanta dokar ta baci a jihar Sokoto, Tambuwal ya bukaci Buhari

A rahoton da Legit.ng Hausa ta kawo, Garba Shehu ya bayyana cewa Buhari ya gabatar da jawabi a taron ga shugabannin kasashen duniya ranar Talata, 2 ga Nuwamba, 2021.

5. Kasar Faransa

Bayan shafe kwanaki a Scotland, Shugaba Muhammadu Buhari ya dira kasar Faransa ranar Talata, 9 ga watan Nuwamba domin zumunci da halartar taron zaman lafiya a birnin Faris.

Shugaba Buhari ya zauna na kwanaki kadan a kasar Faransa, inda ya fita daga kasar a ranar Asabar 13 ga watan Nuwamba.

6. Kasar Afrika ta kudu

Daga kasar Faransa Buhari ya garzaya kasar Afrika ta kudu don halartan kasuwar bajakolin Afrika da aka yi a birnin Durban.

Shugaban ya bar Faransa ne a ranar 13 ga watan Nuwamba tare da tawagarsa inda ya zarce birnin Durban na Afrika ta kudu.

Kana shugaban ya dawo Najeriya a ranar 16 ga watan Nuwamba bayan shafe kwanaki akalla 16 a kasashe uku na waje.

Kara karanta wannan

Umahi ga IPOB: Kun yi kadan, ba ku isa hana shugaban kasa ziyartar kudu maso gabas ba

7. Daular larabawa, Dubai

Shugaba Buhari ya dira birnin Dubai, haddadiyar daular Larabawa da daren Laraba 1 ga watan Disamba domin halartan taron baja kolin EXPO 2020.

Wannan taron baja koli ya auku ne a ranar Juma'a, 3 ga watan Disamban 2021.

Bayan shafe kwanaki a Dubai, Buhari ya dira filin jirgin Nnamdi Azikwe dake birnin tarayya Abuja da yammacin Lahadi, 5 ga watan Disamba, 2021.

9. Kasar Turkiyya

Jim kadan bayan dawowarsa daga daular laraba, Shugaba Buhari ya sake cillawa zuwa kasar Turkiyya domin halartar wani taron.

Jirgin Shugaban Kasa, Muhammadu Buhari da Hajiya Aisha, ya tashi daga tashar jirgin Nnamdi Azikiwe dake Abuja zuwa birnin Istanbul, Kasar Turkiyya a ranar Alhamis 16 ga watan Disamba.

Hadimin Shugaban Kasan, Buhari Sallau, ya bayyana hakan a hotunan da ya saki a shafinsa na Facebook.

Shugaba Buhari ya dawo daga Turkiyya

Daga karshe, shugaba Muhammadu Buhari ya dawo Najeriya bayan shafe kwanaki uku da yayi a kasar Turkiyya tare da uwargidarsa, Hajiya Aisha Buhari.

Kara karanta wannan

Abinda Shugaba Buhari ke yi kullum don kawo karshen matsalar tsaro a Najeriya

Mai magana da yawun Shugaban, Malam Garba Shehu, ya bayyana cewa Buhari ya dura Najeriya ne daidai karfe 2:35.

A cewarsa:

“Shugaba Muhammadu Buhari ya dawo Abuja bayan halartan taron hadin kan Afrika da Turkiyya tsawon kwanaki uku da akayi a Istanbul.“

Saura kwanaki akalla 10 kafin shekarar 2021 ta kare, ba a dai san ko shugaban zai kara tafiya zuwa wata kasa ba.

Asali: Legit.ng

Online view pixel