Abubuwa Sun Kwabewa Trump, 'Yan Democrat Za Su Samu Yadda Suke So a Majalisa
- Jam’iyyar Democrat ta samu kujerun da suka ba ta damar karɓe ikon Majalisar Dattawan Amurka daga hannun Republican
- Democrat ta samu nasarori a Texas, North Carolina, South Carolina, Ohio, Kansas da Iowa, yayin da ta kuma riƙe kujerunta a Georgia da New Hampshire
- An yi hasashen cewa Democrat za ta karɓe Majalisar Wakilai, lamarin da zai rage damar Shugaba Donald Trump na aiwatar da manufofinsa a Majalisa
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
Birnin Washington, Amurka - Jam’iyyar Democrat mai adawa da Shugaba Donald Trump ta samu rinjaye a Majalisar Dattawan Amurka.
Jam'iyyar ta samu rinjayen ne bayan nasarorin da ta samu kan ’yan takarar jam’iyyar Republican a zaɓen tsakiyar wa’adin mulki na shekarar 2026.
Source: Getty Images
Tashar CBS News ce ta bayyana wannan hasashe kan sakamakon zaɓen, bayan Democrat ta samu nasarori a jihohi da dama da aka yi fafatawa mai zafi.
Wannan nasara ta ba jam’iyyar damar karɓe ikon majalisar daga hannun Republican, ko da yake har yanzu ba a tabbatar da yawan kujerun da za ta mallaka ba.
Democrat ta samu nasarori a jihohi da dama
A cewar hasashen, Democrat ta samu nasarar ƙwace kujeru a Texas, North Carolina, South Carolina, Ohio, Kansas da Iowa.
Waɗannan jihohi sun kasance wuraren da fafatawar ta yi zafi a ƙarshen yaƙin neman zaɓe, duk da cewa a baya ana ganin Republican na da rinjaye a wasu cikinsu.
Haka kuma, Democrat ta yi nasarar riƙe kujerunta a jihohin Georgia da New Hampshire, lamarin da ya taimaka mata wajen samun rinjayen da take buƙata.
A halin yanzu, ba a bayyana ainihin yawan kujerun da Democrat za ta mallaka a majalisar ba.
Yadda Democrat ta samu rinjaye
Kafin zaɓen, jam’iyyar Republican ce ke da rinjaye da kujeru 53 daga cikin 100 na Majalisar Dattawa, yayin da Democrat ke da kujeru 47.
Domin samun rinjaye, Democrat na buƙatar ƙarin kujeru huɗu. A wannan karon, fiye da kashi ɗaya bisa uku na kujerun majalisar ne aka fafata a kansu.
Tun kafin fara zaɓen, ana ganin tsarin jihohin da ake fafatawa zai iya amfani wa Democrat, domin Republican ce ke kare kujeru da dama.
Sai dai yawancin jihohin da Republican ke kare kujerunta, jihohi ne da Shugaba Donald Trump ya samu gagarumar nasara a zaɓen da ya gabata.
A watannin ƙarshe kafin zaɓen, yaƙin da Amurka ke yi da Iran, wanda ya jawo rashin jin daɗin jama’a, da kuma tsadar fetur da dizal sun sanya ƙarin jihohi cikin waɗanda Democrat ke fafatawa da Republican a cikinsu.
Republican ta kashe daruruwan miliyoyin daloli wajen ƙoƙarin kare kujerunta a jihohin Texas, Alaska, Iowa, Kansas, Nebraska da Ohio.
Duk da wannan gagarumin kashe kuɗi, Democrat ta samu kujerun da suka ba ta damar karɓe rinjayen majalisar.
Nasarar za ta shafi gwamnatin Trump
A shekarar 2022 ne Democrat ta samu rinjaye a Majalisar Dattawa a karo na ƙarshe, kafin Republican ta sake karɓe ikon majalisar a zaɓen 2024.
Sabon rinjayen Democrat zai yi tasiri sosai ga yadda ake tafiyar da harkokin siyasa a Washington, musamman yayin da Shugaba Trump ke shiga shekaru biyun ƙarshe na wa’adinsa na mulki.
Da samun rinjaye a majalisar, Democrat za ta iya hana amincewa da mutanen da Trump ya naɗa zuwa manyan muƙaman gwamnati, tare da sarrafa irin ƙudurin da za a gabatar domin kaɗa ƙuri’a a zauren majalisar.
Hakan na iya takaita damar Trump na samun amincewar Majalisa kan wasu dokoki da manufofinsa.
Baya ga Majalisar Dattawa, an kuma yi hasashen cewa Democrat za ta samu rinjaye a Majalisar Wakilai ta Amurka.
Source: Getty Images
Ilhan Omar ta lashe zabe
A wani labarin kuma, kun ji cewa 'yar majalisar wakilan Amurka, Ilhan Omar, ta sake lashe zaɓe a gundumar Minnesota ta 5 bayan ta doke ɗan takarar jam'iyyar Republican, John Nagel.
A watan Mayu, jam'iyyar Democrat ta Minnesota (DFL) ta amince da ita a matsayin 'yar takararta yayin babban taron jam'iyyar na jihar.
Asali: Legit.ng
