Aminu Abdulsalam Ya Bayyana Mutanen da Yake Zargi da Yunkurin Hana Shi Takara a Kano
- Abdulsalam Gwarzo ya nuna yatsa kan wasu da yake zargin akwai hannunsu a cire shi daga cikin jerin 'yan takara
- Ya ce kotun tarayya da ke Kano ta bayar da umarnin wucin gadi a ranar 27 ga Oktoba, amma INEC ba ta sanar da su ba sai bayan kwana biyu
- Dan takarar ya ce NDC ta shigar da ƙara kan INEC, sannan za ta nemi shiga shari’ar da ta haifar da umarnin kotun
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
Jihar Kano - Dan takarar gwamnan jihar Kano a ƙarƙashin jam’iyyar NDC, Abdulsalam Gwarzo, ya zargi gwamnatin jihar da ƙoƙarin hana shi shiga zaɓen gwamna na shekarar 2027.
Gwarzo ya yi zargin cewa wasu jami’an gwamnatin jihar sun haɗa kai da wasu mutane masu alaƙa da jam’iyyar APC wajen shirya shigar da ƙara a kotu domin hana INEC wallafa sunansa da na mataimakinsa, Mustapha Kwankwaso.
Source: Facebook
Dan takarar gwamnan na jam'iyyar NDC ya bayyana hakan ne yayin wata hira da gidan talabijin na Arise TV.
Yadda aka hana wallafa sunayensu
Dan takarar ya nuna damuwa kan rashin sanya sunayensu a cikin jerin sunayen ’yan takarar gwamna da INEC ta fitar a ranar 10 ga Oktoban 2026.
Ya ce kafin lokacin, hukumar ba ta sanar da su wata matsala da ta shafi cika ƙa’idojin zaɓe ko sharuddan jam’iyyarsu ba.
A cewarsa, daga baya ne suka gano cewa wasu mutane sun garzaya Babbar Kotun Tarayya da ke Kano a ranar 17 ga Oktoba, inda suka nemi umarnin wucin gadi na hana INEC wallafa sunayensu.
Gwarzo ya ce kotun ta amince da buƙatar tare da bayar da umarnin a ranar 27 ga Oktoba. Sai dai ya tambayi dalilin da ya sa INEC ta jira har zuwa ranar 29 ga Oktoba kafin ta sanar da su cewa umarnin kotu ne ya sa aka cire sunayensu.
Ya kuma yi zargin cewa wani babban lauya mai matsayin Senior Advocate of Nigeria (SAN), wanda ke da alaƙa da APC, da kuma mai ba jam’iyyar shawara kan harkokin shari’a a jihar Kano ne suka jagoranci shigar da ƙarar.
Ya bayyana yadda lamarin ya gudana a matsayin abin da ke tayar da tambayoyi, yana zargin cewa akwai yiwuwar wasu masu ruwa da tsaki sun yi wata yarjejeniya da gwamnatin jihar da INEC.
Gwarzo ya ce ba a miƙa musu umarnin kotu ba
A yayin hirar, Gwarzo ya ce shi da mataimakinsa ba su karɓi takardar umarnin kotun ba, haka kuma ba a miƙa wa jam’iyyar NDC takardun shari’ar da aka fara da su ba.
Ya ce wannan ne ya sa suke ganin akwai buƙatar kalubalantar umarnin, musamman ganin cewa ba su samu damar gabatar da nasu bayanai a gaban kotun ba.
Dan takarar ya bayyana cewa NDC ta riga ta shigar da wata ƙara ta daban a kan INEC, inda take neman kotu ta tilasta wa hukumar saka sunayensu cikin jerin ’yan takarar gwamna.
Ya kuma ce jam’iyyar za ta nemi kotu ta ba su damar shiga shari’ar da aka samu umarnin wucin gadi a cikinta, domin su gabatar da matsayarsu.
NDC za ta kalubalanci umarnin kotun
Gwarzo ya jaddada cewa ba za su amince da cire sunayensu ba tare da bin hanyoyin shari’a ba, yana mai cewa za su fuskanci umarnin kotun tare da kalubalantarsa.
Ya ce bayanan da takardun da suke da su sun nuna cewa shi da mataimakinsa sun bi dukkan matakan da suka dace wajen cika sharuddan tsayawa takara.
Ya kuma bayyana kwarin gwiwar cewa tsarin shari’a zai warware matsalar, yana mai nanata cewa babu wani daga cikinsu da ya karya dokar zaɓe ko wata ƙa’ida da ta shafi cancantar tsayawa takara.
Source: Facebook
INEC ta yi magana kan cire sunan Gwarzo
A wani labarin kuma, kun ji cewa hukumar INEC ta bayyana cewa ba ta da wata matsala da takarar dan takarar gwamnan Jihar Kano na jam'iyyar Nigeria Democratic Congress (NDC), Abdulsalam Gwarzo.
Hukumar ta ce dalilin da ya sa ba a ga sunan Gwarzo a sabon jerin sunayen ‘yan takarar zaben 2027 da ta fitar ba shi ne umarnin kotu, ba wai ta ki amincewa da takararsa ba.
Asali: Legit.ng
