'Inconclusive': Kotu Ta Ayyana Zaben Gwamnan Zamfara a Matsayin Wanda Bai Kammala Ba, Za a Sake Zabe

• Kotun daukaka kara ta yi hukunci kan shari’ar zaben gwamnan jihar Zamfara a yau Alhamis 16 ga watan Nuwamba
• Kotun ta ayyana zaben a matsayin wada bai kammala ba inda ta bukaci sake zabe a wasu kananan hukumomi uku
• Legit Hausa ta ji ta bakin wani jigon jam'iyyar APC kan wannan hukunci na kotu a zaben jihar Zamfara

Abdullahi Abubakar, kwararren editan siyasa, kasuwanci da al'amuran yau da kullum ne, ya na da gogewar aikin jarida sama da shekaru uku.

Jihar Zamfara – Kotun daukaka kara ta raba gardama kan shari’ar zaben gwamna jihar Zamfara, kamar yadda Channels TV ta tattaro.

Kotun da ke zamanta a Abuja ta ayyana zaben a matsayin wanda bai kammala ba inda ta umarci sake zabe a kananan hukumomi guda uku.

Kara karanta wannan

Bayan tsige gwamnan Kano, Malamin addini ya yi hasashen sakamakon hukuncin zaben Kaduna da Nasarawa

Wane hukunci kotun ta yanke a zaben Zamfara?

Kananan hukumomin da abin ya shafa sun hada da Maradun da Birnin Magaji da kuma karamar hukumar Bukuyun, cewar Daily Trust.

Kotun ta yanke wannan hukunci ne a yau Alhamis 16 ga watan Nuwamba a Abuja inda ta yi fatali da hukuncin karamar kotun a baya.

Har ila yau, kotun ta bayyana cewa kotun sauraran korafe-korafen zabe ta yi kuskure wurin kin yin amfani da shaidun jam’iyyar APC.

Wane hukunci karamar kotu ta yanke?

Gwamna Dauda Lawal na jam'iyyar PDP ya yi nasara a karamar kotun da ta yanke hukunci a kwanakin baya.

Karamin Ministan Tsaro a yanzu, Bello Matawalle wanda ya yi takara a jam'iyyar APC shi ya kalubanci hukuncin karamar kotun a baya.

Kotun ta kuma yi fatali da sakamakon zaben da jam’iyyar APC da kuma hukumar zabe ta INEC su ka bayar a karamar hukumar Maradun.

Kara karanta wannan

Kano: Wane hali ake ciki a birnin bayan kwace kujerar Abba Kabir da kotun daukaka kara ta yi?

Martanin jigon jam'iyar APC kan hukuncin

Legit Hausa ta ji ta bakin wani jigon jam'iyyar APC a jihar Gombe, Honarabul Muhammad Abubakar Auwal Akko.

Akko ya ce wannan hukunci abin a yaba ne inda ya ce hukuncin ya yi daidai da abin da mutanen Zamfara su ka zaba.

A cewarsa:

"Wannan hukunci na kotun daukaka kara a jihar Zamfara abin a yaba ne, an yi hukunci daidai da abin da mutane suka zaba.

"Bangaren shari'a ce kadai ta rage wanda talaka ya ke da sauran kwarin gwiwa a kanta.

"Mu na fatan kotun koli za ta tabbatar da wannan hukunci kamar yadda wannan hukunci ya kasance."

Dauda ya sanya dokar ta baci a harkar ilimi

Kun ji cewa, Gwamna Dauda Lawal Dare ya sanya dokar ta baci a bangaren ilimin jihar.

Dauda ya ce hakan ya zama dole ganin yadda gwamnatin baya ta kashe bangaren har kwano.

Asali: Legit.ng