Kano: Abubuwa 5 Da Ya Kamata Ku Sani Game Da Maryam Shetty Da Tinubu Ya Sauya Sunanta

• Shugaba Bola Tinubu ya sauya sunan Maryam Shettima da Dakta Mariya Mahmoud a mukamin minista daga jihar Kano
• Tinubu ya zabi Shetty ne a ranar Laraba 2 ga watan Agusta kafin daga bisani ya sauya sunanta a yau Juma’a
• Shetty, bayan nada ta mukamin ministan, mutane sun yi ta cece-kuce a kai inda su ke ganin ba ta cancanta ba

Jihar Kano – Kwanaki biyu bayan an saka sunan Dakta Maryam Shettima da aka fi sani da Shetty a jerin sunayen ministoci, Shugaba Tinubu ya sauya sunanta a yau Juma’a.

Tinubu ya sauya sunanta da Dakta Mariya Mahmoud wacce tsohuwar kwamishina ce a jihar Kano lokacin mulkin Abdullahi Umar Ganduje.

Punch ta tattaro cewa a ranar Alhamis 3 ga watan Agusta kafafen yada labarai sun dauki dumi inda wasu ke yabon nadin Shetty yayin da wasu kuma ke kushe Tinubu a kan nadin nata.

Kara karanta wannan

Jerin Ministoci: Dalilin Da Yasa Tinubu Ya Maye Gurbin Maryam Shetti Da Abokiyar Karatunta Mariya Mahmoud

Ga jerin abubuwa biyar da ya kamata ku sani game da Maryam Shettima Ibrahim:

1. Asalin sunanta shi ne Dakta Maryam Shettima Ibrahim wacce aka fi sani da Maryam Shetty.

2. An haife ta a ranar 8 ga watan Afrilu na shekarar 1979. Yanzu haka ta na da shekaru 44 kenan a duniya, cewar BBC.

3. Shetty ta kasance ‘yar siyasa kuma mai rajin kare hakkin al’umma. Shetty ita ce shugabar kungiyar #WeBelieve wacce kungiya ce ta jam’iyyar APC.

4. Shetty ta kammala karatun jami’a a Bayero da ke Kano inda ta karanta harkar kula da kashi na dan Adam. Ta kuma yi digiri na biyu a sashen kula da kashi a jami’ar London ta Gabas.

5. A baya an taba zabanta inda wakilci Najeriya a babban taron Majalisar Dinkin Duniya (UN), Tori News ta tattaro.

Kara karanta wannan

Bidiyo: Yadda Maryam Shetty Ta Samu Labarin Cire Sunanta a Cikin Majalisa, Abinda Ta Yi Ya Ja Hankali

Tinubu Ya Janye Maryam Shetty, Ya Maye Ta Da Mariya Mahmud Daga Kano

A wani labarin, Shugaba Tinubu ya maye gurbin Maryam Shetty da Dakta Mariya Mahmoud a mukamin minista daga jihar Kano.

Tinubu ya sake mika jerin sunayen ministoci 19 a ranar Laraba 2 ga watan Agusta zuwa majalisar Dattawa.

A yau Juma'a 4 ga watan Agusta shugaban ya sauya sunan Shetty da ake ta cece-kuce a kanta.

Asali: Legit.ng