Da Dumi-Dumi: Bamu yadda a yi zaɓen fidda gwani ba, Matasan APC sun barke da zanga-zanga a jihar Ekiti
- A yau Alhamis, jam'iyyar APC mai mulki ta shirya gudanar da zaben fidda gwani a jihar Ekiti
- Sai dai zaben ya zo da matsaloli, yayin da mambobin jam'iyyar suka ɓarke da zanga-zanga a hedkwata domin nuna adawar su
- Masu zanga-zanga sun zargi cewa gwamnan jihar, Kayode Fayemi. ya shirya maguɗi a zaɓen
Ekiti - Mambobin jam'iyyar APC mai mulki reshen jihar Ekiti sun fara zanga-zangar nuna adawa da zaɓen fidda ɗan takarar gwamnan jihar.
Jaridar The Cable ta ruwaito cewa APC ta shirya gudanar da zaɓen fitar da gwani ne a yau Alhamis, 27 ga watan Janairu, 2022.
Asali: UGC
Mambobin waɗan da suka mamaye hedkwatar jam'iyya ta jiha, sun zargi gwamnatin APC dake mulkin jihar da shirya manaƙisa a zaɓen.
Duk da tuni aka fara tantance masu zaɓen a wasu gundumomin jihar, amma mambobin jam'iyya dake zanga-zanga a Sakateriya sun ce ba za su yi zaɓen ba.
"Ba mu yarda da zaɓen ba, ba bu wani zaɓen fidda gwani," Mambobin APC suka cigaba da faɗa a Sakatariya.
Wasu jiga-jigan APC sun bukaci a ɗage zaben
Wannan na zuwa ne bayan mamba a majalisar dattawan Najeriya daga jihar Ekiti, Opeyemi Bamidele, ya bukaci a ɗage zaben fidda gwanin.
Kazalika ɗaya daga cikin masu hankoron tikitin takarar gwamna karkashin APC, ya goyi bayan dakatar da shirin zaben fitar da gwanin a yau Alhamis.
Da safiyar yau ne, mutum bakwai daga cikin yan takara dake neman tikitin APC suƙa bayyana janye wa daga zaɓen baki ɗaya.
A cewarsu, sun ɗauki wannan matakin ne bisa zargin shirya magudi da gwamnan jihar, Kayode Fayemi, ya yi.
A wani labarin na daban kuma Ɗaruruwan mambobin PDP a jihar da take mulki, sun sauya sheƙa zuwa APC
Jam'iyyar PDP mai mulki a jihar Edo ta gamu da cikas, yayin da ɗaruwawan mambobinta suka koma APC a mazaɓar Ovia.
Masu sauya sheƙan sun bayyana cewa sun ɗauki matakin ne saboda ayyukan raya ƙasa da ɗan majalisa mai wakiltar Ovia a tarayya ke yi.
Asali: Legit.ng
