Wata Sabuwa: An Sake Bankado Yadda Aka Bayar da Cin Hancin N650m don Tazarcen Obasanjo

• Farouq Aliyu ya ce ya ƙi karɓar N250m da aka ba shi domin ya goyi bayan yunƙurin tsohon Shugaba Olusegun Obasanjo na neman wa’adin mulki na uku
• Ya ce tsohon Kakakin Majalisar Wakilai, Aminu Masari, shi ma ya ƙi N400m da aka ba shi domin goyon bayan yunƙurin
• Farouq Aliyu ya ce marigayi Muhammadu Buhari, Atiku Abubakar da George Akume sun taka muhimmiyar rawa wajen dakile yunƙurin neman wa’adin mulki na uku

​​​​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Tsohon Shugaban Marasa Rinjaye na Majalisar Wakilai, Farouq Aliyu, ya yi ikirarin cewa ya ƙi karɓar N250m da aka ba shi domin ya goyi bayan yunƙurin tsohon Shugaba Olusegun Obasanjo na neman wa’adin mulki na uku.

Farouq Aliyu ya kuma ce Kakakin Majalisar Wakilai a lokacin, Aminu Masari, ya ƙi karɓar N400m da aka ce an ba shi domin ya goyi bayan wannan yunƙuri.

Kara karanta wannan

Dickson: Jagoran NDC na kasa ya fadi dalilin kin shiga APC, ya aika sako ga Kwankwaso da Obi

Jaridar Daily Trust ta ce ya bayyana hakan ne da yake magana a shiri da aka yi da shi wanda aka wallafa a ranar Juma'a, 18 ga watan Satumban 2026.

Majalisa ta yi watsi da kudirin sauya kundin tsarin mulki

Batun wa’adin mulki na uku na daga cikin batutuwan siyasa masu cike da ce-ce-ku-ce da suka mamaye mulkin Obasanjo, wanda ya kasance shugaban Najeriya daga 1999 zuwa 2007.

A watan Mayun 2006, Majalisar Dokokin Tarayya ta yi watsi da wani kudiri da ya nemi sauya wasu tanade-tanaden Kundin Tsarin Mulkin Najeriya.

Sauyin da kudirin ya nema zai bai wa Obasanjo damar sake tsayawa takarar shugaban ƙasa a wa’adin mulki na uku a jere. Sai dai Obasanjo ya sha musanta cewa ya nemi wa’adin mulki na uku.

Ya ce shirin wa’adi na uku ya kasance gaskiya

Farouq Aliyu ya dage cewa yunƙurin wa’adin mulki na uku ya kasance gaskiya, jaridar Vanguard ta kawo rahoton.

Kara karanta wannan

Tirkashi: ADC ta bankado makarkashiyar da ake kullawa a Arewa gabanin zaben 2027

A cewarsa, a lokacin da ake tattaunawa kan batun, Nuhu Ribadu, wanda a lokacin shi ne Shugaban Hukumar Yaƙi da Cin Hanci da Rashawa (EFCC), ya nemi ya je Abuja domin ganawa da Obasanjo.

Farouq Aliyu ya ce da farko ya ƙi amincewa da buƙatar Ribadu, amma daga baya ya amince ya gana da Obasanjo.

Ya ce lokacin da ya je Abuja, sun tattauna kan batun wa’adin mulki na uku, kuma ya bayyana cewa yunƙurin ba zai yi nasara ba.

‘An ba ni N250m amma ban karɓa ba’

Tsohon ɗan majalisar ya ce wani mutum da Ribadu ya tura shi wurinsa ya ba shi N250m domin ya goyi bayan yunƙurin. Sai dai bai bayyana sunan mutumin ba a yayin hirar.

“Batun wa’adin mulki na uku gaskiya ne. A zahiri, an ba ni N250m. Ban karɓa ba,” in ji shi.

Ya kuma yi ikirarin cewa an ba Masari N400m, amma ya ƙi karɓa. Ya ce Abdul Ningi, wanda a lokacin shi ne Shugaban Masu Rinjaye a Majalisar Wakilai, shi ma an ba shi N400m, amma ya ƙi karɓa.

Farouq Aliyu ya kuma yi ikirarin cewa an bai wa wasu ’yan majalisa mafi ƙarancin N50m domin su goyi bayan yunƙurin.

Kara karanta wannan

Peter Obi ya yi maganar sayen hannun jari a matatar Dangote, ya ba 'yan Najeriya shawara

Waɗanda ya ce sun dakile yunƙurin

Tsohon Shugaban Marasa Rinjayen ya ce marigayi tsohon Shugaba Muhammadu Buhari, tsohon Mataimakin Shugaba Atiku Abubakar da Sakataren Gwamnatin Tarayya, George Akume, sun taka muhimmiyar rawa wajen dakile yunƙurin Obasanjo na neman wa’adin mulki na uku.

Waɗannan kalamai na Aliyu sun sake dawo da batun da ya kasance ɗaya daga cikin manyan ce-ce-ku-ce na siyasar Najeriya a ƙarshen mulkin Obasanjo.

Gargadin Obasanjo ga IBB kan Atiku

A wani labarin kuma, kun ji cewa tsohon gwamnan jihar Cross River, Donald Duke, ya bayyana yadda Ibrahim Babangida ya gargadi tsohon shugaban kasa Olusegun Obasanjo kan mataimakinsa Atiku Abubakar.

A cewar Duke, alakar da ke tsakanin Obasanjo da Atiku ta fara tabarbarewa yayin da shugaban kasar ke shirin neman wa’adi na biyu.

Asali: Legit.ng