Remi Tinubu Ta yi Martani kan Sukar da Ake Yi Mata dangane da Ba Mata Jarin Kosai

• Uwargidan shugaban kasa, Bola Ahmed Tinubu, Remi Tinubu, ta sha suka kan wasu kalamai da ta yi dangane bada jari ga mata
• Remi Tinubu ta fito ta yi martani kan sukar da ake yi mata, inda ta bayyana cewa ba zata daina tallafawa mata masu kananan sana'o'i ba
• Uwargidan shugaban kasar ta jero jerin mata masu kananan sana'o'i da suke samun tallafi don bunkasa kasuwancinsu daga gareta

​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Jigawa - Uwargidan shugaban kasa, Sanata Oluremi Tinubu, ta yi martani kan sukar da aka yi mata dangane da bada jari ga masu kananan sana'o'i.

Remi Tinubu ta ce babu wani adadin suka ko karkatar da bayanai da zai dakatar da sadaukarwarta wajen tallafawa mata 'yan kasuwa masu ƙananan sana'o'i a faɗin ƙasar nan.

Kara karanta wannan

El Rufa'i: Dalilin kotu na ci gaba da fatali da bukatar belin tsohon gwamnan Kaduna

Tashar TVC ta ce Remi ta yi wannan bayanin ne a ranar Litinin, 29 ga watan Yunin 2026 a garin Hadejia da ke jihar Jigawa, lokacin ƙaddamar da sabon babban ɗakin taro na Abubakar Maje Haruna da aka gina a Fadar Sarkin Hadejia.

Remi Tinubu ta kare shirinta

Yayin da take jawabi a wurin taron, Sanata Remi Tinubu ta yi watsi da rahotannin da ke yawo a kafofin sada zumunta game da shirinta na bunkasa tattalin arziki.

Uwargidan shugaban kasar ta bayyana cewa cewa shirin an yi shi ne domin inganta rayuwar matan karkara da kuma ƙarfafa ƙananan sana'o'i.

A matsayin ɓangare na shirin, ta sanar da tallafin kuɗi Naira miliyan 200 ga mata 2,000 masu ƙananan sana'o'i a jihar Jigawa.

Kowace mace da ta amfana za ta karɓi Naira 50,000 domin faɗaɗa da kuma dorewar kasuwancinta, jaridar Tribune ta kawo labarin.

Me Remi ta ce kan sukar da ake yi mata?

Kara karanta wannan

Amurka ta samu nasara mafi girma cikin shekaru 25 a farmakin da ta kawo Najeriya

Yayin da take mayar da martani ga sukan da ake yi na cewa shirin yana nufar masu sayar da ƙosai (akara) kawai, uwargidan shugaban kasar ta ce tallafin ya haɗa da nau'ikan 'yan kasuwa masu ƙananan sana'o'i da dama.

“Na ji mutane suna magana kan masu sayar da ƙosai. Ba masu sayar da ƙosai kawai ba ne. Muna tallafa wa masu sayar da tumatir, masu sayar da masara, masu sayar da kayan miya da sauran 'yan kasuwa da dama masu ƙananan sana'o'i."

"Manufarmu ita ne mu taimaka wa mata su haɓaka kasuwancinsu kuma su dogara da kansu ta ɓangaren kuɗi."

- Sanata Oluremi Tinubu

Remi Tinubu na bunkasa jarin mata

Sanata Oluremi Tinubu ta jaddada cewa haɓaka mata yana nan a matsayin muhimmiyar dabara ta rage talauci, haɓaka kuɗaɗen shiga na gidaje, da kuma bunkasa haɓakar tattalin arziki a matakin karkara.

Ta ƙara da cewa Najeriya tana da wadatar albarkatun jama'a, inda ta ba da tabbacin cewa gwamnatin Shugaba Bola Tinubu za ta ci gaba da aiwatar da shirye-shiryen da ke inganta walwalar 'yan ƙasa, musamman mata da mutane masu rauni.

Uwargidan shugaban kasar ta kuma jaddada cewa Najeriya mallakin daukacin 'yan ƙasarta ce, kuma ta yi kira da a haɗa gwiwa domin samun ci gaba da bunkasa ƙasa baki ɗaya.

Kara karanta wannan

Kungiyar Obidient ta bada tabbaci kan takarar Obi da Kwankwaso a 2027 duk da hukuncin kotu

Kalubalen da Remi Tinubu ta fuskanta

A wani labarin kuma, kun ji cewa uwargidan shugaban kasa, Remi Tinubu, ta tuna baya kan kalubalen da ta fuskanta saboda auren musulmi.

Oluremi Tinubu ta bayyana cewa ta taba fuskantar tsangwama da wariyar addini saboda kasancewarta Kirista da ta auri Bola Tinubu.

Uwargidan shugaban kasar wacce fasto ce a cocin Pentecostal, ta ce ta taba fuskantar suka daga wani malamin Musulmi da ya kira ta arniya.

Asali: Legit.ng