2023: Jerin Jihohi 28 da Za a Yi Zaben Gwamnoni a Najeriya a Ranar Asabar

• Yayin da zaben gwamnoni ya gabato, yana da muhimmanci a san adadin jihohin da za a yi zabe a Najeriya
• Akalla akwai jihohi 28 da za a kada kuri’u a gobe Asabar 18 ga watan Maris a Najeriya bayan dage zaben daga 11 ga watan na Maris
• Rahoto ya bayyana wadannan jihohin da kuma wasu jihohin da ba za a yi zaben gwamna ba a ranar ta Asabar

Najeriya - Bayan kammala zaben shugaban kasa da na ‘yan majalisun tarayya, sakamako daga hukumar zabe ta INEC ya fito, wadanda basu ci zabe ba sun bayyana tafiya kotu.

Baya ga haka, sauran zaben jihohi; inda za a zabi sabbin gwamnoni ko kuma masu komawa da kuma ‘yan majalisun dokoki na jiha.

‘Yan Najeriya za su fito ne domin kada kuri’unsu a ranar Asabar 18 ga watan Maris, bayan dage zaben daga ranar 11 ga watan na Maris.

Kara karanta wannan

Sakamakon Zaɓen Gwamnoni Na 2023: Jerin Zaɓaɓbun Gwamnoni 5 Da Suka Ci Zaɓe Da Ƙuri'u Mafi Ƙaranci

Gaba daya, jam’iyyun siyasa 18 ne ke da ‘yan takarar gwamna da ‘yan majalisu a Najeriya, ba a dukkan jihohin kasar bane kuma za a yi zaben.

Dalilin da yasa wasu jihohin ba za a yi zabe ba

A bayyane yake, akwai jihohi 28 da za a kada kuri’u a Najeriya cikin 36 saboda akwai jihohin da zabensu ya bambanta da saura.

Kamar jihohin Anambra, Bayelsa, Edo, Ekiti, Imo, Osun da Ondo, duk suna da lokutan yin zabensu na daban ba na ranar Asabar mai zuwa ba.

Samun mabambantan lokacin zabe a jihohin yana da nasaba da hukunce-hukuncen kotu da suka sanya ake yin zaben daban.

Sai dai, zaben ‘yan majalisun jihohi a tare ake yi, kuma za a zabi ‘yan majalisu 993 a fadin jihohin Najeriya, kamar yadda bayanan INEC suka nuna.

Kara karanta wannan

Karin bayani: INEC ta fadi ranar da za a karasa zaben da ba a kammala ba a Najeriya

Jihohin da za a yi zaben gwamnoni a Najeriya

1. Abia
2. Adamawa
3. Akwa Ibom
4. Bauchi
5. Benue
6. Borno
7. Kuros Riba
8. Delta
9. Ebonyi
10. Enugu
11. Gombe
12. Jigawa
13. Kaduna
14. Kano
15. Katsina
16. Kebbi
17. Kwara
18. Legos
19. Nasarawa
20. Neja
21. Ogun
22. Oyo
23. Filato
24. Ribas
25. Sokoto
26. Taraba
27. Yobe
28. Zamfara

An tura EFCC jihohin Kano, Jigawa da Katsina

A jajiberin zabe, hukumar yaki da cin hanci da rashawa ta EFCC ta bayyana tura jami’anta bangarori daban-daban na jihohin Kano, Katsina da Jigawa.

Wannan na zuwa ne a shirin hukumar na tabbatar da an yi zabe cikin tsanaki a jihohin da ke Arewa maso Yamma a Najeriya.

An samu hargitsi a zaben shugaban kasa da aka yi a wasu jihohin Najeriya, ciki har da jihar Kano.

Asali: Legit.ng