Shagari Zuwa Buhari: Lokuta 9 da Aka Rantsar da Shugabannin Kasa a Tarihin Najeriya

• A ranar yau, 29 ga watan Mayun 2023, za a samu canjin mulki daga tsoho zuwa sabon shugaban kasa
• Bola Ahmed Tinubu zai karbi ragamar shugabancin Najeriya a hannun Shugaba Muhammadu Buhari
• Kafin yanzu, an rantsar da shugabannin farar hula daga Oktoban shekarar 1979 zuwa yau a Najeriya

Abuja - Ganin ana bikin rantsar da sabon shugaban kasa a Najeriya, rahoton nan ya tuna da baya, ya dauko lokutan da aka yi irin haka a baya a tarihi.

1. Alhaji Shehu Shagari - 1979

Mutumin farko da aka fara rantsarwa a matsayin shugaban kasa a salon mulkin nan shi ne Shehu Usman Aliyu Shagari, wanda aka yi bikin hawansa mulki a ranar 1 ga watan Oktoba, 1979.

An yi biki ne a filin Tafawa Balewa da ke Legas, inda Mai shari’a Atanda Fatai Williams ya rantsar da shi.

Kara karanta wannan

Babban Makusancin Tinubu Ya Fadi Lokacin Da Sabon Shugaban Kasar Zai bayyana Ministocinsa

2. Alhaji Shehu Shagari (Tazarce) - 1983

Bayan shekaru hudu sai aka sake rantsar da Shehu Shagari a sakamakon nasarar da ya samu a zaben 1983. A wannan farfajiya dai aka sake yin bikin da ya zama na karshe a garin Legas.

3. Olusegun Obasanjo - 1999

Bayan shekaru 20 da mika mulki ga farar hula, sai aka rantsar da Janar Olusegun Obasanjo (mai ritaya), wannan karo a matsayin zababben shugaban kasa da ya lashe zabe a 1999.

Wannan karo Obasanjo ya hau mulki a ranar 29 ga Mayu. Alkalin Alkalai, Mohammed Lawal Uwais ya rantsar da shi a filin Eagle Square da ke sabuwar birnin tarayya na Abuja.

4. Olusegun Obasanjo (Tazarce) - 2003

Kamar yadda aka rantsar da shi a karon farko, haka Olusegun Obasanjo ya dawo filin Eagle Square domin ya fara wa’adinsa na biyu a sakamakon nasara da ya yi a zaben tazarce.

Kara karanta wannan

Tawagar Biden Ta Iso Najeriya Don Rantsar da Sabon Shugaban Najeriya Bola Ahmad Tinubu

5. Umaru Musa Yar'Adua - 2007

Ranar 29 ga watan Mayun 2007 ya zama karon farko a tarihi da aka canza gwamnati a mulkin farar hula, Alkalin Alkalai, Idris Legbo Kutigi ya rantsar da Umaru Musa Yar'Adua.

Sai dai Shugaba Umaru Musa Yar'Adua bai cika wa’adinsa ba, rai ya yi halinsa a shekarar 2010.

6. Goodluck Jonathan - 2010

A ranar 6 ga watan Mayun 2010 sai Mai shari’a Justice Aloysius Iyorgyer Katsina-Alu ya rantsar da mataimakin shugaban kasa, Goodluck Jonathan a matsayin shugaban Najeriya.

7. Goodluck Jonathan (Zabe) - 2011

Bayan ya kare wa’adin tsohon mai gidansa, sai Goodluck Jonathan ya shiga zabe a 2011 kuma ya yi nasara don haka Alkalin Alkalai ya kuma rantsar da shi a filin Eagle Square a Abuja.

8. Muhammadu Buhari - 2015

A 2015 aka sake kafa tarihi a Najeriya, jam’iyyar adawa ta karbe mulki a zabe. A ranar 29 ga watan Mayu Alkalin Alkalai Mahmud Mohammed ya rantsar da Muhammadu Buhari.

Kara karanta wannan

Uhuru Kenyatta Ya Ba Tinubu Muhimman Shawarwari Gabannin Rantsar Da Shi

9. Muhammadu Buhari (Tazarce) - 2023

Bayan an sake yin zabe a 2023, Mai girma Buhari ya sake yin nasara. Wannan karo Ibrahim Tanko ya rantsar da shugaban a bikin rantsuwa na bakwai da aka yi a Eagle Squre.

Wanene Bola Tinubu

Kun samu rahoto dauke da tarihin Bola Tinubu, wanda gogaggen dan siyasa ne kuma jagora wanda ya hidimatawa kasarsa a bangarori dabam-dabam.

Sabon shugaban kasar ya yi gwamna a jihar Legas tsakanin Mayun 1999 zuwa Mayun 2007.

Asali: Legit.ng