Yanzu-Yanzu: Mataimakin Shugaban Jam'iyyar PDP Ya Riga Mu Gidan Gaskiya

• Mataimakin shugaban jam'iyyar PDP na ƙasa yankin Kudu maso Yamma, ya riga mu gidan gaskiya
• Hon. Olasoji Adagunodo ya kwanta dama ne a ƙasar Amurka, bayan ya yi wata ƴar gajeruwar rashin lafiya
• Majiyoyi masu ƙarfi sun tabbatar da cewa mai yankan ƙauna ta yi halin ta aƙan mamacin wanda ya ke babban jigo ne a jam'iyyar PDP

Jihar Osun - Mataimakin shugaban jam'iyyar Peoples Democratic Party (PDP), na yankin Kudu maso Yamma, Hon. Olasoji Adagunodo, ya yi bankwana da duniya.

A cewar rahoton Sahara Reporters, Adegunodo, tsohon shugaban jam'iyyar PDP ne a jihar Osun.

Hon. Seyi Adeniyi, hadimin gwamnan jihar Ogun, Ademola Adeleke, kan harkokin watsa labarai, ya tabbatar da mutuwar Olasoji, a wani rubutu da ya yi a shafin sa na Facebook, ranar Talata, 9 ga watan Mayu 2023.

Kara karanta wannan

Karin Bayani: Mutane 40 Sun Nutse a Wani Hadarin Jirgin Ruwa a Arewacin Najeriya

A kalamansa:

“Shugaban jam'iyyar PDP na yankin Kudu maso Yamma, Soji Adagunodo ya mutu.”

An samo cewa jigon na jam'iyyar PDP ya mutu ne a ƙasar Amurka, a cewar rahoton Osun Defender, wata jarida a jihar. An dai sanar da mutuwar sa ne a ranar Talata, 9 ga watan Mayun 2023.

Shugaban matasan jam'iyyar PDP na yankin Kudu maso Yamma, Seyi Bamidele, ya tabbatar da aukuwar lamarin, inda ya ce jigon jam'iyyar, ya riga mu gidan gaskiya ne a ƙasar Amurka, rahoton jaridar Vanguard ya tabbatar.

A cewar shugaban matasan, Adagunodo, ya kwanta dama ne bayan ya yi wata ƴar gajeruwar rashin lafiya a ƙasar Amurka.

A kalamansa:

"Eh da gaske ne mataimakin shugaban jam'iyyar PDP na ƙasa, yankin Kudu maso Yamma, Hon. Soji Adagunodo, ya riga mu gidan gaskiya. Ya kwanta dama ne bayan ƴar gajeruwar rashin lafiya a ƙasar Amurka. Da yammacin nan aka sanar mana da labarin bankwanan sa da duniya."

Kara karanta wannan

Rikicin PDP: Atiku Abubakar, Peter Obi, Ayu da Gwamnan G-5 Sun Haɗu a Wuri Ɗaya, Bayanai Sun Fito

Matar Tsohon Shugaban Majalisar Dattawa Ken Nnamani, Ta Koma Ga Mahaliccinta

A wani rahoton na daban kuma, kun ji cewa matar tsohon shugaban majalisar dattawa, Sen Ken Nnamani, ta riga mu gidan gaskiya.

Mrs Jane Nnamani, ta mutu ne a wani asibiti a cikin birnin Enugu, inda ta je a yi mata wata ƴar gajeruwar tiyata.

Asali: Legit.ng