Jerin Duka Shugabannin PDP 9 da Aka Yi Rabuwar Tsiya da Su Daga 1999 zuwa 2023

• Irinsu Audu Ogbeh, Adamu Mu’azu, Modu Sheriff, Uche Secondus sun yi mulki babu dadi a PDP
• A tsawon shekaru 25 da kafa PDP, an yi shugabanni kusan 20, wasu ba a ji dadin zama da su ba
• Iyorchia Ayu shi ne na karshen wanda ake neman a kare da rigima da shi a gidan Wadata a PDP

Abuja - Wannan rahoto yana kunshe da mutanen da suka jagoranci Jam’iyyar PDP a cikin rigingimu, a karshe dai aka tunbuke su daga kujerarsu.

Alex Ifeanyichukwu Ekwueme ne ya fara shugabantar PDP a 1998. Daga wancan lokaci zuwa yanzu, an samu shugabannin da aka yi fada da su.

1. Solomon Lar (1998-1999)

A wani rahoto na Daily Trust, an ji cewa tsamin da alakar Solomon Lar da Olusegun Obasanjo tayi, ya jawo aka yi waje da shugaban jam’iyyar PDP a 1999.

Kara karanta wannan

"Dama Na Faɗa" Gwamna Wike Ya Maida Martanin Kan Maye Gurbin Shugaban PDP Na Kasa

2. Barnabas Gemade (1999-2001)

Barnabas Gemade ya gaji Lar a ofis, amma shi ma bayan kusan shekaru biyu ya samu sabani da shugaban kasa na lokacin, bai iya zarcewa a ofis a 2001 ba.

3. Audu Ogbeh (2001-2005)

Abubuwa sun fara tafiya da Audu Ogbeh tiryan-tiryan, daga baya sukar da yake yi wa gwamnatin tarayya ta jawo wani mutumin na Benuwai ya yi murabus.

4. Prince Vincent Ogbulafor (2008 - 2010)

Vincent Ogbulafor ya karbi jagorancin PDP NWC ne a 2008, amma Umaru Musa Yar’adua yana rasuwa aka tsige shi bayan ya nuna mulki zai tsaya a Arewa.

5. Dr. Okwesileze Nwodo (2010)

Tsohon Gwamnan Enugu, Dr. Okwesileze Nwodo bai dade a matsayin shugaban PDP ba aka tunbuke shi, a lokacinsa an yi ta samun sabani da Gwamnoni.

6. Dr. Bamanga Tukur (2012-2014)

A lokacin Bamanga Tukur ne PDP ta rasa wasu jiga-jigan ta zuwa jam’iyyar APC, a karshe dai dole ya sauka daga kujera a 2014 bayan an matsa masa lamba.

Kara karanta wannan

Rikici Ya Kara Tsanani Bayan Umarnin Kotu, Shugaban PDP Na Ƙasa Ya Shiga Tsaka Mai Wuya

7. Adamu Mu'azu (2014-2015)

Ahmad Adamu Mu’azu ya maye gurbin Bamanga Tukur daga Arewa maso gabas, amma ganin APC ta doke PDP a zaben 2015, aka dage sai da aka canza shi.

7. Ali Modu Sheriff (2015-2016)

Tun da Ali Modu Sheriff ya karbi shugabancin PDP ake rikici, a maimakon ya karasa watanni ukun Adamu Muazu, sai ya nemi ya zarce a mulki, da rigima aka rabu.

8. Uche Secondus (2017-2021)

Sai da kotu ta tsige Prince Uche Secondus sannan ya yarda ya mika ragamar jam’iyyar adawa ta PDP a 2021, daga shugabancin riko, ‘dan siyasar ya ji dadin ofis.

9. lyorchia Ayu (2021 - 2023)

A cikin shugabannin PDP da ba ayi rabuwar mutunci da su ba akwai Iyorchia Ayu idan ta tabbata an kore shi, tun da Atiku Abubakar ya samu takara ake sa-in-sa.

Shugabannin jam’iyyar PDP na kasa

A wani rahoto da muka taba kawowa, kun ji a shekaru 23 da kafuwar jam’iyyar PDP a Najeriya, ta yi shugabanni da-dama, fiye da goma daga Arewa suka fito.

Kara karanta wannan

Rikicin PDP ai Yanzu Aka Fara – Fitaccen Gwamna Ya Ragargaji Shugaban Jam’iyya

Dr. Alex Ekwueme ne ya fara rike wannan kujera a matsayin rikon kwarya. An samu shugabanni irinsu Vincent Ogbulafor da Uche Secondus daga Kudu.

Asali: Legit.ng