Janar Buratai, Tsofaffin Jami’an Tsaro 10 da ke Cikin Kwamitin Yakin Zaben Bola Tinubu

Abuja - A ranar Asabar aka ji labari an fitar da sunayen wadanda za su yi wa Asiwaju Bola Tinubu aikin yakin neman takarar shugaban kasa a APC.

Legi.ng ta bibiyi cikakken jerin da jam’iyyar APC ta fitar na kwamitin mutum 422, ta fahimci akwai tsofaffin jami’an tsaro da za su bada gudumuwarsu.

Ga jami’an sojoji da suka yi ritaya da sunayensu ya shiga cikin kwamitin yakin neman zaben:

1. Air Marshall Siddique Abubakar

Tsohon shugaban hafsun sojojin sama, Air Marshall Siddique Abubakar mai ritaya shi ne Shugaban yakin neman zaben shugaban kasa na APC a jihar Bauchi.

2. Janar Tukur Yusuf Buratai

Janar Tukur Yusuf Buratai mai ritaya ya samu matsayin Mataimakin Darekta a kwamitin tsaro. Buratai wanda yanzu Jakada ne ya yi shugaban sojojin kasa.

Kara karanta wannan

2023: Cikakkun Sunayen Yan Kannywood Da Suka Samu Shiga Kwamitin Kamfen Din Tinubu

3. Janar Abdulrahman Bello Dambazzau

Wani tsohon hafsun sojojin kasa a jerin shi Janar Abdulrahman Bello Dambazzau mai ritaya. Tsohon Ministan yana cikin masu bada shawara wajen dabaru.

4. Janar Mohammed Magoro

Janar Mohammed Magoro (mai ritaya) yana cikin iyayen kwamitin takaran na 2023. Magoro ya rike mukaman Minista da Sanata a Kebbi da ya yi ritaya a soja.

5. Janar Jibril Abdulmalik

Darektan kwamitin tsaro na kwamitin yakin neman zaben shi ne Manjo Janar Jibril Abdulmalik mai ritaya, zai jagoranci wasu tsofaffin sojoji a wannan kwamitin.

6. Janar Abayomi Olanishakan

Janar Abayomi Olonisakin (mai ritaya) zai taimakawa tsohon shugaban PTTDS wajen wannan aiki. Shi ma Olanishakan ya rike gidan soja daga shekarar zuwa 2021.

7. Janar Ladan Yusuf

Birgediya Janar Ladan Yusuf ya samu shiga cikin wannan kwamiti a matsayin Magatakarda. Yusuf ya taba zama mai ba gwamnan Bauchi shawara a harkar tsaro.

Kara karanta wannan

Tirkashi: Sunan Sanata PDP, Chimaroke Nnamani Ya Fito Cikin Kwamitin Kamfen APC

8. Janar Patrick Akpa

Sunan Manjo Janar Ademu Akpa (Rtd) ya fito a kwamitin. Tsohon sojan ya dade da zama ‘dan siyasa, domin ya yi takarar gwamna a jihar Kogi a karkashin APC.

Sauran jami’an tsaro

A jerin akwai wasu tsofaffin jami’an tsaron baya ga sojoji. Mun fahimci kwamitin yana kunshe da tsohon jami’in hukumar kwastam da tsohon Sufetan ‘yan sanda.

9. IGP Musliu Smith (mai ritaya)

10. DCG Garba Goronyo

Babu sunan Osinbajo

Kun ji labari an ki daukar Yemi Osinbajo, tsohon sakataren gwamnati da tsohon shugaban majalisa da wasu kusoshin APC a kwamitin yakin zaben na badi.

A 'yan kwamitin mai mutum fiye da 400, mun ji akwai sauran wadanda suka yi takara da Bola Tinubu a APC irinsu Rotimi Amaechi da Dr. Ahmad Lawan.

Asali: Legit.ng