Yanzu-Yanzu: Kotu ta Halasta Wa Jonathan Yin Takarar Shugaban Kasa a 2023
- Ana kwana guda zaben fidda gwani na yan takarar shugaban kasa na APC, kotu ta ce Goodluck Jonathan zai iya yin takara a 2023
- A kwanakin baya, an rika tafka muhawara kan cancantarsa duba da cewa akwai doka da ta ce idan mataimaki ya karasa wa'adin mai gidansa tamkar ya yi nasa ne
- Sai dai a hukuncinta, kotun ta ce an kafa wannan dokar ne bayan Jonathan ya yi wa'adin Yar'adua don haka dokar ba za ta yi aiki a kansa ba don lokacin da ya yi mulkin ba a yi dokar ba
Bayelsa - Babban kotun tarayya da ke Yenagoa, Jihar Bayelsa, ta yanke hukunci cewa tsohon shugaban kasa Goodluck Jonathan zai iya yin takarar shugabancin kasa a zaben 2023.
Jaridar Daily Trust ta rahoto cewa jam'iyyar ta yanke hukuncin ne ranar jajiberin zaben fidda gwani na yan takarar shugaban kasa na jam'iyyar ta APC.
An alakanta Jonathan da jam'iyyar APC mai mulki a yanzu bayan siya masa fom din takarar shugaban kasa kan Naira miliyan 100.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Amma, an riga bayyana mabanbanta ra'ayoyi kan cancantarsa shiga takarar shugabancin kasar.
Sai dai, a ranar Juma'a, kotun ta ce Jonathan, wanda ya sha kaye a zaben 2015 a hannun Shugaba Muhammadu Buhari, yana iya neman kujerar shugaban kasar, The Punch ta rahoto.
Sai bayan da Jonathan ya karasa wa'adin Yar'Adua aka yi dokar, don haka ba za ta yi aiki a kansa ba - Kotu
Alkalin, Mai shari'a Isa Hamma Dashen, wanda ya bada hukuncin a ranar Juma'a, ya ce dokar da aka kafa daga baya ba za ta shafi takarar Jonathan a 2023 ba.
A karar da Andy Solomon da Idibiye Abraham suka shigar, sun nemi kotun ta tabbatar da cewa dokar da aka yi daga baya na hana mataimakan shugaba da suka gaji shugabanninsu yin mulki sau biyu bata shafi Jonathan ba.
Jonathan ya karbi mulki a hannun marigayi Yar'adua ne bayan ya rasu a 2010 kuma ya sake takara a 2011 ya ci zabe.
Buratai: Tsohon Babban Hafsan Sojojin Ƙasan Najeriya Ya Ba Wa APC Gudunmawar Motar Kamfen Ƙirar Najeriya
A wani rahoton, tsohon babban hafsan sojin kasa kuma Jakadan Najeriya a Jamhuriyar Benin, Janar Tukur Buratai; Babban Kwamishinan Najeriya a Jamhuriyar Zambia, Nwanebike Oghi da kuma wasu jakadu na musamman a ranar Laraba sun bai wa shugabancin jam’iyyar APC kyautar motoci kirar bas mai daukar mutum 18.
Farar motar, wacce kamfanin Innoson Motors ne ya kerata sabuwa ce kuma a jikinta a rubuta “Jakadu na musamman ne su ka bayar da kyautarta,” The Punch ta ruwaito.
Sun gabatar da motar ne a babban ofishin jam’iyyar da ke Abuja bayan wakilan sun yi taron sirri da shugaban jam’iyyar, Sanata Abdullahi Adamu.
Asali: Legit.ng
