Wani shahararren dan siyasar arewa ya fice daga APC, ya bayyana dalilinsa
- Jam’iyyar All Progressives Congress (APC) reshen jihar Kaduna ta rasa wani babban jigonta
- Samaila Suleiman, tsohon dan majalisar wakilai ya bayyana cewa ya sauya sheka ne saboda rabuwar jam’iyyar a matakin kasa
- Sai dai kuma, Suleiman bai bayyana ko wacce jam’iyya zai koma ba bayan ficewar tasa
Kaduna – Tsohon dan majalisar wakilai daga jihar Kaduna, Samaila Suleiman, ya sauya sheka daga jam’iyyar All Progressives Congress (APC) mai mulki.
Mista Suleiman, wanda ya wakilci mazabar Kaduna ta tsakiya a majalisar dokokin tarayya, ya ce ya yi murabus ne saboda zargin rabuwar kai a jam’iyyar a matakin kasa, Premium Times ta rahoto.
Asali: Facebook
Sai dai kuma rahoton ya kawo cewa tsohon dan majalisar bai bayyana wacce jam’iyyar siyasa zai koma ba.
Mista Suleiman, a cikin wata wasika ta murabus da ya aike zuwa ga shugaban unguwa da karamar hukumarsa, ya ce:
“Na rubuta a hukumance domin sanar maka da hukuncina na yin murabus daga matsayin mamba na APC.
“Wannan hukunci nawa ya zama dole saboda karya tsarin damokradiyyar cikin gida da rabuwar jam’iyyar a dukkan matakai, musamman a matakin kasa.
“Dan Allah ka sani cewa murabus din nawa ya fara nan take. Tare da wasikar ga lambar rijista na.”
APC ta gamu da gagarumin cikas a wata jihar kudu yayin da kansiloli 5 suka fice, sun koma PDP
A wani labarin, wasu yan majalisar karamar hukumar Obanliku a jihar Cross River su biyar sun sauya sheka daga jam’iyyar All Progressives Congress (APC) zuwa Peoples Democratic Party (PDP).
Labarin sauya shekar kansilolin biyar ya bayyana ne a karshen mako lokacin da aka gabatar da su a gaban mai neman takarar gwamna na PDP a jihar, Sanata Gershom Bassey, Thisday ta rahoto.
Kansilolin wadanda shugaban PDP a karamar hukumar Obanliku, Hon. Justine Ejisekpe, ya gabatar da su a gaban mai neman takarar gwamnan sune, Hon. Adida Justin, Hon. Ololo Francis, Hon. Helen Ejikang, Hon. Ogor Doris da Hon. Polycarp Ugiugbong.
Asali: Legit.ng
