Shahararrun Shugabannin 'yan Bindiga Sun Mika Wuya, Sun Saki Mutum 16 a Katsina

• An bayyana yadda wasu tsageru suka mika wuya tare da mika makamansu ga sojojin Najeriya a jihar Katsina da ke Najeriya
• An kuma bayyana cewa, sun saki mutane 16 da suke rike dasu, inda suka yi alkawarin zama mutane na gari
• Gwamnati ta sha alanta aniyar karbar dukkan wadanda suka mika wuya cikin yan ta’adda tare da ba su kulawa ta musamman

Jihar Katsina - Rundunar Sojin Najeriya ta tabbatar da cewa wasu fitattun shugabannin ƴan bindiga da suka dade suna addabar al’umma a Arewa maso yammacin kasar sun mika wuya da kansu tare da mika wasu daga cikin mutanen da suka yi garkuwa da su.

A wata sanarwa da rundunar ta fitar a ranar Asabar, 14 ga Yuni, 2025, ta bayyana cewa shugabannin ƴan bindigar sun hada da Kamulu Buzaru, Manore, Nagwaggo, Lalbi, Alhaji Sani, Dogo Baidu, Dogo Nahalle da Abdulkadir Black.

Rundunar ta ce waɗannan shugabanni sun bayyana aniyarsu ta daina aikata ta’addanci da rungumar zaman lafiya da jituwa da sauran jama’a.

Sun mika bindigu da fursunoni

A cewar wani bangare na sanarwar:

“Sojoji sun karɓi makaman da suka mika kuma an adana su cikin aminci.”

Baya ga hakan, ƴan bindigar sun saki mutum 16 da suka hada da mata bakwai da yara tara da suka yi garkuwa da su a da.

Sanarwar ta ce:

“A matsayin wani bangare na jajircewarsu wajen barin aikin ta’addanci, sun bayyana niyyarsu ta sakin sauran mutanen da ke hannunsu kafin 15 ga Yuni, 2025.”

Wadanda aka sako an mika su ga hukumomin karamar hukuma domin kulawa da su da kuma dawo da su ga iyalansu.

Sojoji sun ci gaba da ba da tsaro a yankin

Rundunar sojin ta bayyana cewa ana ci gaba da samun zaman lafiya a yankunan da abin ya shafa, inda dakarunta ke ci gaba da tsare muhimman wurare tare da sa ido domin tabbatar da dorewar zaman lafiya da tsaro.

Sanarwar rundunar ta ce:

“Ana ci gaba da ba da tsaro a yankin don samar da kwanciyar hankali. Sojoji na ci gaba da kasancewa a wuraren da suka dace domin tabbatar da cewa zaman lafiya ya dore.”

Martani daga al’umma da masu ruwa da tsaki

Wasu daga cikin shugabannin al’umma da ke yankunan da lamarin ya shafa sun bayyana jin dadinsu kan wannan ci gaba, inda suka yi kira ga sauran da ke da hannu a ta’addanci da su ma su tuba su dawo cikin al’umma.

Wani dattijo a jihar Zamfara, Malam Lawal Muhammad, ya ce:

“Idan da gaske ne sun tuba, muna maraba da hakan. Amma dole a tabbatar da cewa ba dabara ce kawai ta sake dawowa da wata muguntar ba.”

Gwamnatin tarayya da ta jihohi da dama sun sha bayyana shirin karbar waɗanda suka tuba daga ta’addanci, tare da basu horo da hanyar dogaro da kai domin sake komawa rayuwa ta gari.

Yadda tsageru suka kashe hafizin Al-Kur'ani

A wani labarin, gwamnatin jihar Katsina ta yi magana kan halin da matashin da ya haddace Al-Kur'ani wanda ƴan bindiga suka sace yake ciki.

Gwamnatin ta bayyana cewa Abdulsalam Rabiu Faskar, mahaifinsa da ɗan uwansa har yanzu suna raye amma suna hannun masu garkuwa da su.

Wannan na ƙunshe ne a cikin wata sanarwa da kwamishinan yaɗa labarai da al’adu, Dr Bala Salisu-Zango, ya fitar a ranar Juma’a a Katsina, cewar rahoton jaridar Daily Trust.

Asali: Legit.ng