An Bude Iyakar Legas Domin Shigo da Motoci, Gwamnati Ta Yi Watsi da Tsohon Tsari

• Gwamnatin tarayya tayi na’am da bude iyakokin kasa domin a rika shigo da abubuwan hawa
• Wannan dama da aka bada ta shafi iyakar Seme, ‘yan kasuwa za su iya shigo da motoci daga yanzu
• Tun a lokacin gwamnatin baya aka aika takarda zuwa FEC, an saurari koken ‘yan kasuwa da kwastam

Abuja - Ganin korafi sun yi yawa, Gwamnatin tarayya ta amince a bude wata daga cikin iyakar kasar nan da nufin shigo da kaya daga kasashen waje.

A ranar Alhamis aka samu labari daga Vanguard cewa an bada umarnin bude iyakar nan ta Seme da ke garin Legas da nufin a shigo da abubuwan hawa.

Darektan tafiye-tafiye ta titi a ma’aikatar sufurin tarayya, Ibrahim Musa ya bayyana cewa za a dawo shigo da motoci da duk abubuwan hawa ta iyakar.

Kara karanta wannan

Tinubu: Tsare-Tsaren Sabon Shugaban Najeriya Na Daukar Idon Duniya – Birtaniya

Ibrahim Musa ya yi jawabi ne a wajen taron da kuniyar ECOWAS ta shiryawa jami’an Najeriya da Benin a sakamakon koke-koke da ‘yan kasuwa su ke yi.

Rahoton ya ce masu shigo da kaya ta iyakar Seme sun kai kuka, don haka aka dauki wannan mataki.

'Yan kasuwa sun kai kuka

Darektan zirga-zirgar ya shaidawa jami’an ECOWAS da su ka ziyarci kan iyakar Seme-Krake cewa ya san lokacin da ‘yan kasuwa su ka nemi alfarma.

Kafin Muhammadu Buhari ya bar mulki, masu kasuwanci a yankin sun roki karamar Ministar sufuri ta amince a rika shigo da kaya ba tare da wani kaidi ba.

A cewar Ibrahim Musa, tsohuwar Ministar ta umarce su da su rubuta takarda a kan batun, kuma su aikawa gwamnati, a karshe aka yi la’akari da bukatar.

Kara karanta wannan

Tserewa Zai Yi: Gwamnati Ta Haskawa Kotu Hadarin Bada Belin Godwin Emefiele

Kwastam ta ga kudi ya ja baya

Shugaban hukumar kwastam na iyakar, Dera Nnadi ya shaida cewa kudin-shigan da su ke samu ya ragu da aka haramta shigo da motoci ta iyakokin kasa.

Dera Nnadi ya yi bayanin yadda tsohuwar Minista ta amshi koke-kokensu, ta kai maganar zuwa gaban FEC domin ganin gwamnatin tarayya ta bude iyakoki.

Tun a lokacin, ma’aikatar ta sanar da majalisar FEC ta amince da bukatun da su ka gabatar.

Richard Montgomery ya yabi Tinubu

An rahoto Jakadan Birtaniya a Najeriya, Richard Montgomery ya ce Duniya ta na lura da tsare-tsaren da Shugaba Bola Tinubu yake kawowa da ya hau mulki.

Bayan ya zauna da Kashim Shettima a jiya, Montgomery ya ce cire tallafi da kuma gyara tsarin kudin kasar waje za su taimaka wajen jawo hannun jari.

Asali: Legit.ng