Magoya bayan Peter Obi Sun Ji Zafi, Sun Kai Karar El-Rufai Wajen Kamfanin Twitter

• Nasir El-Rufai ya fito Twitter ya caccaki magoya bayan ‘Dan takaran LP a 2023, Peter Obi
• A dalilin maganar da El-Rufai ya yi, an samu wanda ya kai korafi domin a taka masa burki
• Gwamnan Kaduna ya tunawa ‘Yan ‘Obidients’ cewa dole a samu wadanda za su saba da su

Kaduna - Wasu daga cikin magoya bayan Peter Obi wadanda su ke yi wa kansu lakabi da ‘Obidients’, sun fusata da kalaman da Nasir El-Rufai ya yi.

A ranar Litinin, 15 ga watan Agusta 2022, Gwamna Nasir El-Rufai ya yi magana a shafin Twitter kan gangamin da ake shirin yi wa Peter Obi a Kaduna.

Masoyan ‘dan takaran shugaban kasar na jam’iyyar hamayya ta Labor Party sun sha alwashin tara mutane miliyan biyu a kan titi domin su nuna karfinsu.

Kara karanta wannan

Shehu Sani: Yadda Gwamna El-Rufai Yake Taimakawa Wajen Jawo Matsalar Tsaro

Amma Gwamnan Kaduna ya maida masu martani cewa ba za su samu wadannan mutane a zahiri ba, sai dai buyagin wofin kurum a shafin sada zumunta.

Daga yin wannan magana ‘Yan ‘Obidients’ da ke dandalin suka shiga yi wa Gwamnan raddi, ta kai wasu sun gabatar da korafi a kansa ga Twitter.

Kamar yadda ya shaida da kansa, Malam El-Rufai ya nuna wani masoyin Peter Obi mazaunin kasar Jamus ne ake zargin ya kai karar maganar da ya yi.

Sakon da kamfanin sadarwan ya aikowa Gwamnan ya nuna Twitter ta binciki maganar da yayi, kuma ba ta same shi da aikata abin da ya saba doka ba.

A karshe dai ba a goge wannan magana ba kamar yadda magoya bayan na Obi suka nema.

Maganar da El-Rufai ya yi

“Ido rufe ‘Yan ‘Obidients’ suka fito, za su zagi duk wanda suka saba da shi, amma ba za su yarda a saba da su ba

Kara karanta wannan

Rashin tsaro: Sanatan APC Ya Fadi Tushen Matsala, Yace Gwamnati Ba ta Shirya ba

Kuma sun manta mutane su na da ra’ayinsu. Wani daga cikinsu a Jamus ya gagara hakura da maganar da na yi.

Ga martanin @Twitter nan a kasa. HAR YANZU DARIYA NAKE YI!”

- Nasir El-Rufai

Da wata ta soki maganar El-Rufai, sai ya nuna mata matakin da gwamnatinsa ta dauka na kare Ibo a lokacin da aka yi masu barazanar barin Arewa.

Matsalar tsaro a Kaduna

An ji labari Shehu Sani ya yi tsokaci game da kokawar da Nasir El-Rufai yake yi a kan matsalar rashin tsaro, har ya aikawa shugaban kasa takarda.

Sanata Shehu Sani yace duk sai da ya yi irin wannan maganganu a majalisa, amma Gwamnati ya yake shi, aka rika nuna yana zuzuta matsalar ne.

Asali: Legit.ng