Shugaban kasa a 2023: Tinubu ya yi ganawar sirri da Orji Kalu a Abuja

• Babban jigon jam'iyyar APC, Asiwaju Bola Tinubu, ya shiga labule tare da tsohon gwamnan jihar Abia kuma bulaliyar majalisar dattawa, Orji Uzor Kalu, a Abuja
• Shugabannin biyu sun yi ganawar ne a ranar Asabar, 20 ga watan Nuwamba a gidan Kalu
• Ana zaton ganawar tasu ba zata rasa nasaba da hada-hadar siyasa kan wanda zai gaji shugaba Buhari a 2023 ba

Abuja - Jagoran jam’iyyar All Progessives Congress (APC) na kasa, Asiwaju Bola Tinubu, na cikin wata ganawa da tsohon gwamnan jihar Abia kuma bulaliyar majalisar dattawa, Orji Uzor Kalu, a Abuja.

Jaridar Punch ta rahotio cewa Tinubu ya isa gidan Kalu da karfe 4:25 na yammacin yau Asabar, 20 ga watan Nuwamba.

Yan siyasar sun rungume junansu tare da yin gaishe-gaishe a tsakaninsu.

Kara karanta wannan

Hankula sun tashi a jihar Nasarawa kan kisan wasu makiyaya

An tattaro cewa bayan gaisawar sai suka shiga cikin ganawar sirri.

Majiyar ta yi bayanin cewa kafin ganawar sirrin, Kalu ya yi godiya ga Allah a kan warkwar Tinubu cikin sauri.

Tinubu ya dawo Najeriya a ranar 8 ga watan Oktoba, bayan ya shafe wasu watanni a Landan, inda aka yi masa aiki a gwiwa.

Zuwa yanzu ba a san dalilin ganawar tasu ba amma ana ganin ba zai rasa nasaba da wasu ci gaba na siyasa da tattalin arziki a kasar ba.

Ziyarar na zuwa ne a daidai lokacin da ake ganin shugabannin biyu na hararar kujerar shugaban kasa Muhammadu Buhari a 2023.

Su dukkaninsu sun kasance tsoffin gwamnonin jihohinsu daga 1999 zuwa 2007.

2023: Tinubu ya samu gagarumin goyon bayan sarakuna 300 domin ya gaji kujerar Buhari

A wani labarin, mun ji cewa akalla sarakunan gargajiya sama da 300 daga kudu maso yamma ne ke goyon bayan takarar tsohon gwamnan jihar Lagas, Sanata Bola Tinubu, a zaben shugaban kasa na 2023.

Kara karanta wannan

Shugabancin 2023: Ku jira don jin ta bakinsa a watan Janairu - Fashola game da takarar Tinubu

Sanata Dayo Adeyeye, shugaban kungiyar yakin neman zaben Tinubu ne ya bayyana hakan a Gbongan, jihar Osun, rahoton Punch.

Ya bayyana hakan ne yayin kaddamar da kungiyar mai suna ‘South West Agenda for Asiwaju for 2023’ a mazabar Irewole.

Asali: Legit.ng