Ana Tsaka da Shan Ruwa, 'Yan Bindiga Sun Kai Hari, Sun Sace Malamin Musulunci a Arewa

• Miyagu sun sake kai hari yankin Iyara da ke karamar hukumar Ijumu a jihar Kogi inda suka sace malamin Musulunci, Quasim Musa
• Maharan sun yi garkuwa da babban limamin garin Iyara da ke jihar bayan sun yi ta harbe-harbe domin firgita mutanen yankin
• Lamarin ya faru ne bayan shan ruwa a daren jiya Litinin 25 ga watan Maris kamar yadda rundunar 'yan sanda ta tabbatar

Abdullahi Abubakar, Editan Legit Hausa ne a bangaren siyasa, kasuwanci da al'amuran yau da kullum ne, ya na da gogewar aikin jarida sama da shekaru uku.

Jihar Kogi - Wasu 'yan bindiga sun sace fitaccen malamin addinin Musulunci a jihar Kogi da ke Arewacin Najeriya.

Maharan sun sace babban limamin ne na Iyara da ke karamar hukumar Ijumu a jihar mai suna Sheikh Quasim Musa.

Kara karanta wannan

Kano: Daina amfani da soshiyal midiya da wasu sharuɗa da kotu ta kafawa Murja Kunya

Yaushe aka sace malamin Musuluncin Kogi?

Tribune ta tattaro cewa an sace Musa ne da daren jiya Litinin 25 ga watan Maris a garin Ilukpa da ke karamar hukumar.

Wata majiya daga yankin ta ce maharan sun birkita mutanen garin da harbe-harbe kafin su dauke malamin su tafi da shi.

Wani daga cikin iyalan malamin da ya bukaci a boye sunansa ya ce har zuwa yanzu ba su samu bayani daga maharan ba.

Majiyar ta ce:

"Ya ku 'yan yankin Iyara, rashin tsaro da ke samun kasar ya shafe mu a wannan yanki namu."

"A ranar 25 ga watan Maris, wasu 'yan bindiga da ake zargin Fulani ne sun sace babban limamin Iyara, Sheikh Quasim Musa bayan harbe-harbe."

Al'ummar Kogi sun roki addu'a daga jama'a

Har ila yau, majiyar ta yi Allah wadai da harin musamman a wannan wata mai albarka na Ramadan, cewar Daily Post.

Kara karanta wannan

'Yan ta'addan Boko Haram sun kai mummunan hari a Yobe, sun hallaka soja

Ta bukaci jama'an yankin da su dage da addu'a domin ganin an ceto malamin daga hannun miyagun.

Kakakin rundunar 'yan sanda a jihar, SP William Aya ya tabbatar da faruwar lamarin a yau Talata 26 ga watan Maris.

Maharan sun farmaki dakunan daliban Jami'a

Kun ji cewa wasu mahara sun kai hari dakunan kwanan dalibai mata a Jami'ar Gwamnatin Tarayya da ke Lokaja a jihar Kogi.

Maharan sun raunata dalibai guda biyu tare da sace musu wayoyi da kudi da sarki yayin harin da suka shafe awa biyu su na yi.

Asali: Legit.ng